耶利米书 29章24节 到 29章32节   背景资料  上一笔  下一笔
Chit段经文是继续指出假先知示玛雅,想beh透过祭司西番雅威胁先知耶利米。M̄-koh先知耶利米m̄-nā无因为án-ne就噤若寒蝉,m̄敢出声,却是随时传出上帝kā惩罚示玛雅ê信息。

第24到25节,「尼希兰人示玛雅」,伊是kah先知以西结同时期被掠到巴比伦去ê,mā是第8节所提起ê假先知之一。伊冒用上帝ê名写phoe hō͘耶路撒冷「玛西雅ê kiáⁿ西番雅祭司kah所有其他众祭司,以及耶路撒冷所有ê人民」,chit种信,等于是一封公开谴责先知耶利米ê信。

第26到28节,chit段经文内容是记载示玛雅所写ê信:

伊以上帝ê名下命令,beh任命西番雅取代「耶何耶大」当耶路撒冷ê大祭司,而且chit张phoe mā同时寄hō͘「所有其他ê众祭司,以及耶路撒冷所有ê人民」,án-ne,等于是冒用上帝ê名撤换耶何耶大。Koh讲,伊讲出beh撤换耶何耶大ê理由,就是认为耶何耶大无「尽责任」kā先知耶利米掠入狱,因为án-ne,已经无法度胜任大祭司ê职分了。伊ài祭司西番雅去接替大祭司ê职分。伊认为先知耶利米是一个「狂人」,因为án-ne,伊ài西番雅tī接替大祭司了后,kā先知耶利米掠起来,m̄-nā án-ne,iáu koh khah用「铁枷套tī伊ê颔颈上」。理由是先知耶利米bat写phoe hō͘受掠tī巴比伦ê犹大人民,讲in「流亡ê时间会真长」(参考第10节),就是teh指「七十年」,而且ài in tī巴比伦「建造房屋,定居来,mā tio̍h种作,食田里ê土产」(参考第5节)。

伊认为先知耶利米m̄-nā无讲安慰、鼓舞ê话,反tńg讲chit种会带hō͘人民恐慌、不安ê信息。因为,伊tī国家动乱ê时chūn,无帮助民心ê稳定,反tńg鼓励人民tī巴比伦做奴隶安定落来,这对当时受掠tī巴比伦ê犹大人民来讲,确实是真痛苦ê信息,因为必定有真chē人会失去信心。
Tùi chia mā thang看出当时被掠到巴比伦ê以色列人民中,假先知并无因为án-ne而消失,颠倒ê,in照常是寄生tī苦难ê人民中间。

第29到32节,「祭司西番雅」kā收tio̍h ê信读hō͘先知耶利米听。先知耶利米就kā伊tùi上帝hia得tio̍h启示,koh一pái写phoe hō͘ tī巴比伦俘虏营ê以色列同胞。Tī phoe内,伊清楚指出示玛雅是一个假先知,因为上帝并无「差派伊,伊却自封为先知」,ná亲像示玛雅认为先知耶利米是「自封为先知」仝款。因为án-ne,上帝beh严厉惩罚chit种冒用上帝ê名ê假先知。先知耶利米并且传出上帝ê惩罚方式如下:

一是上帝beh「惩罚示玛雅kah伊êkiáⁿ-kiáⁿ孙孙」,这表示示玛雅此后bē koh再出现。

二是kah前一位假先知哈拿尼雅所受ê惩罚仝款,就是「无法度活teh看见」上帝释放了犹大人民ê奇妙作为。换句话mā teh暗示示玛雅会真紧to̍h往生。

三是上帝认为示玛雅ê信息是假ê,是teh「鼓舞」犹大人民「背叛」上帝,并无为上帝ê子民带来真正幸福。

重新查询 专卷研经 耶利米书系列
错误回报,请联系comm[@]fhl.net