耶利米书 28章1节 到 28章17节   背景资料  上一笔  下一笔
Chit章是针对假先知哈拿尼雅所讲ê话。一般人民实在真oh清楚知影án怎分辨真假先知?因为tī先知运动中,in传讲信息ê时lóng有一个特点,lóng会用「上主对我讲」chit种句型出现。另外一方面,mā tùi先知耶利米ê话发见,伊对tī哈拿尼雅所讲有关犹大王国未来ê预言,先知耶利米并无确定是m̄是是tùi上帝来ê启示,á是根据伊家己ê意念所讲ê。后来,先知耶利米chiah tùi上帝hia得tio̍h确实ê启示,知影哈拿尼雅chìn前所讲ê并m̄是出tī上帝。因为án-ne,伊就讲出上帝对哈拿尼雅ê惩罚。

Tio̍h注意ê是:先知有可能常常得tio̍h上帝ê启示,m̄-koh并m̄是in所讲ê一切信息lóng是tùi上帝来ê启示。哈拿尼雅过去bat得tio̍h上帝ê启示,因为án-ne,伊可能想:chit-má国家危急,民心bē稳,有可能传讲chit种信息thang帮助伊ê国家、社会稳定pah。Koh讲,伊mā有可能误解了大约一百年前,先知以赛亚时代传出ê信息。当时亚述帝国国王西拿基立带兵进攻耶路撒冷ê时,犹大王希西家差人去见先知以赛亚,先知以赛亚就传出安慰鼓励ê信息,以及上帝teh-beh亲自派天使攻击亚述帝国ê军队,解救犹大城耶路撒冷ê被困危机(参考以赛亚书三十七:21—38)。哈拿尼雅可能受tio̍h chit件历史事件ê影响,因为án-ne mā传出像先知以赛亚chit种上帝会解围ê信息。M̄-koh当时面对国家陷入危机ê时,希西家王ê态度是忏悔,并请先知以赛亚向上帝祈求拯救(参考以赛亚书三十七:1—4)。当年ê犹大希西家王是用披麻、拆裂衫裤ê方式,带文武百官到圣殿去忏悔;chit-má ê犹大王西底家则想用家己ê气力来解困。两个之间ê境况完全无仝,结果当然mā bē仝款。做一个先知一定tio̍h有chit种判断能力,而且一定tio̍h有一个基本ê观念:悔改,走chhōe上帝ê怜悯chiah是生存ê唯一方法(参考以西结书三十三:11)。

第1节,「西底家做王ê第四年五月」,chit-ê时间应该是主前593年。「基遍人押朔ê kiáⁿ哈拿尼雅先知」tī耶路撒冷圣殿tú-tio̍h先耶利米,并且kah耶利米「讲话」,讨论有关国家兴衰ê问题。

第2到4节,chit段经文是哈拿尼雅当tio̍h圣殿ê「祭司kah群众面前」,伊mā是用上帝ê名讲话,伊讲「Tī两年内」,上帝beh kā巴比伦王「辖制」犹大人民ê锁枷hō͘「粉碎」,并且beh kā「尼布甲尼撒王掠夺到巴比伦去ê圣殿器皿」lóng总「全部运tńg来」到耶路撒冷。M̄-nā án-ne,连同hông掠去做人质ê「约雅斤」王kah所有hông掠去巴比伦做奴隶ê「犹大人」mā lóng tio̍h「带tńg来」,chit种信息真清楚表明:巴比伦帝国会被摧毁。

第5到9节,chit段经文是先知耶利米听ê回应。Chit种回应ná亲像伊chìn前tī圣殿向祭司kah人民转告上帝hō͘伊ê信息仝款,就是teh指出有kóa假冒上帝知名ê先知,所传出来ê信息是假ê,m̄-thang听信chit种话(参考耶利米书廿七:16—17)。事(tāi)先先知耶利米回应讲「m̄-koh愿án-ne!愿上主照你所讲ê话成全!」真可能是先知耶利米iáu未是得tio̍h上帝明确ê启示,hō͘伊知影哈拿尼雅所传讲ê信息并m̄是tùi上帝来ê启示。M̄-koh伊ài哈拿尼雅「注意听」伊bat传讲过ê信息,就是第廿七章16到17节。换句话讲,先知耶利米ài先知哈拿尼雅想看māi,上帝怎样可能hō͘伊得tio̍h ê启示,是kah先知哈拿尼雅chit-má所传出ê信息完全颠倒?而chit点mā是一般民众感觉非常困惑ê所在。因为两位lóng是先知,而且lóng是奉上帝ê名传讲信息。不过先知耶利米提醒哈拿尼雅ê话,除非犹大人民会晓把握时间赶紧归向上帝,悔改认罪,若无,chiah-ê灾难lóng会tī预言了后临到。最后,先知耶利米讲如果一个先知beh传讲「和平」ê信息,就一定tio̍h等chit种信息应验ê时chiah算是真正。原因是当先知预言有灾难来临ê时,若是无看见hiah-ê人即使悔改,上帝是bē改变他既定ê毁灭计画。

先知耶利米án-ne讲,mā是teh警告哈拿尼雅注意,过去ê先知hō͘人民怀念,á是hō͘人民尊崇,乃是因为in并无为tio̍h beh取悦掌权者而讲话,mā无为tio̍h beh迎合民意,奉承达官显要而传讲假ê信息,in甚至是冒性命ê危险,勇敢指出国王政策ê错误。M̄-koh,chiah-ê伟大ê众先知,所预言ê灾难却一一临到,而hiah-ê传讲「平安ê信息」ê先知,一定tio̍h接受考验,tio̍h等到伊所传讲ê平安来临,危险真正过去à,án-ne chiah真正证实伊所讲ê信息是tùi上帝来ē-tàng算数。

第10到11节,先知耶利米「颔颈上ê枷担」,这是上帝beh伊做来挂ê(参考廿七:2),为tio̍h是beh教导犹大以色列人民。M̄-koh chit-má哈拿尼雅竟当tio̍h众人面前kā先知耶利米颔颈上ê枷担解开、取落来,这mā表示伊所传ê信息tú好kah先知耶利米传讲ê信息完全颠倒;先知耶利米挂tī颔颈上ê枷担,是表示iáu大将被巴比伦帝国所囚困;哈拿尼雅则折断这枷担,表示上帝kā解开chit种困境。M̄-koh tio̍h注意ê是,m̄是上帝beh伊去解开这枷担,却是伊家己认为tio̍h beh解开。这tú好表示伊无上帝hō͘伊ê信息。然后,哈拿尼雅the̍h断裂ê枷担当tio̍h众人面前讲,上帝beh像伊hit种折断先知耶利米颔颈上ê枷担,「折断尼布甲尼撒王加hō͘各国ê枷担」,而且是「两年内」就会实现。M̄-koh先知耶利米并无koh做任何辩驳,伊「离开」圣殿。事实上伊已受tio̍h极大ê侮辱,因为哈拿尼雅是当tio̍h众人面前侮辱伊,m̄-koh伊无反击,因为伊知影上帝ê奴仆受tio̍h侮辱,上帝必定bē静默不语。这mā是伊chìn前对tio̍h hiah-ê议会官员所讲过ê话,无论是侮辱á是杀害上帝ê奴仆,lóng会因为án-ne付出代价(参考廿六:15)。

第12到14节,chit-má上帝koh一pái下命令,ài先知耶利米kā上帝ê信息转告hō͘哈拿尼雅,而chit-ê信息竟然是beh kā原本用「木头」做成ê枷担,改成「一个铁ê枷担来代替」,这已经teh表明原本无hiah-ni̍h严重,chit-má反tńg会因为哈拿尼雅假借上帝ê名发言,而且因为侮辱上帝ê奴仆先知,而hō͘犹大国kah人民受tio̍h koh khah大ê侮辱kah灾难。第14节chit句「甚至ài kā野兽mā交hō͘尼布甲尼撒王支配」,tú好kah第廿七章6节所讲ê相对应。先知耶利米指出上帝已经决定,ài kā kui个犹大国lóng由巴比伦帝国统治,á是管辖,甚至连动物lóng包括在内,无一件物件ē-tàng逃过tī巴比伦ê统治之下。

第15到17节,chit两节真清楚看出先知耶利米是得tio̍h了上帝ê启示,因为án-ne,伊拆破哈拿尼雅假借上帝ê名讲ê虚构ê白贼。因为án-ne,上帝必定会追究chit种人ê罪(参考耶利米书十四:15)。即使哈拿尼雅原本是先知,m̄-koh却利用上帝ê名欺骗人民,这等于是乱使用上帝ê名,是真可恶ê行为。先知耶利米真清楚kā哈拿尼雅讲,上帝beh「消灭」伊,而且时间就是tī「今年内」,这比伊冒用上帝ê名宣告讲「两年内」ê时间iáu koh khah短,这说明伊连想beh看tio̍h「和平」、犹大人民被释放ê日子都无机会。原因是伊ê话hō͘犹大人民m̄听从上帝ê先知耶利米传达ê信息。果然,就tī「hit年七月,哈拿尼雅死去。」chit句话tú好应验ā先知耶利米ê预言,这mā表示先知耶利米chiah是真正先知。

重新查询 专卷研经 耶利米书系列
错误回报,请联系comm[@]fhl.net