Chit段经文thang分做两段落，一是第12到15节，chit段是特别hō͘西底家ê信息，先知耶利米敦促犹大ê西底家王，不要理会hiah-ê假先知ê话，伊建议西底家王继续臣服tī巴比伦帝国，m̄-thang想beh kah几个弱小国家kah埃及联盟来对抗巴比伦帝国，伊强调chit种想法是错误ê。第二段是第16到22节，是针对犹大ê人民讲话，内容是重复劝大家向巴比伦帝国投降。

第12到13节，先知耶利米tī chia真清楚kā西底家王讲，ài伊「臣服」tī巴比伦，kā「巴比伦王」加hō͘伊ê「枷担」giâ起来，强调án-ne in就「ē-tàng生存」落来。伊仝款提出警告，若是拒绝上帝hō͘伊ê信息，等于是拒绝上帝ê话，上帝一定会用真严酷ê「战祸、饥荒，kah瘟疫」来惩罚悖逆ê人民。

第14到15节，先知耶利米警告西底家，m̄-thang koh再听信hiah-ê用各种法术讲「m̄-thang向巴比伦王投降ê众先知」，因为in所传ê chit种信息，lóng m̄是上帝ê启示。伊指出chiah-ê假先知是假冒上帝ê名teh「欺骗人」，如果听信假先知chit种话ê人kā会kah传讲假信息ê假众先知仝款落场，就是「lóng tio̍h灭亡」。因为上帝m̄-nā会惩罚假先知，连听从跟tòe ê人民mā会受tio̍h仝款ê惩罚（参考耶利米书十四：16）。

第16到17节，先知耶利米m̄-nā警告「祭司」，mā同时对全体犹大「人民」提出警告，ài大家注意chit件事，就是ài大家一定tio̍h「臣服」tī巴比伦，若是m̄听从，in chit-má所khiā起ê所在，真紧to̍h会变成「废墟」。

第18节，chit节是一种反讽ê讲法。Mā就是讲：如果chiah-ê人是真正先知，in bē总是去四界放话，in应该为耶路撒冷teh beh灭亡，恳求上帝ê怜悯chiah-tio̍h；in应该直接kah上帝对话，chiah会真正明白上帝ê旨意，却m̄是总是讲家己得tio̍h上帝ê启示。

第19到20节，chit两节讲出犹大ê遭遇，就是「犹大王约雅敬ê kiáⁿ约雅斤」，伊kah一阵幕僚lóng被掠到巴比伦去（参考列王记下廿四：12），只「留落来圣殿ê铜柱、铜海、铜座，kah其他一kóa宝物」（参考列王记廿五：13）。时间是tī主前597年。

第21到22节，chit两节提起ê事是大约tī西底家王ê时代发生，时间是主前586年，犹大灭亡。西底家王kah厝内人tī耶路撒冷城破ê时tī逃走途中受掠，尼布甲尼撒王tī伊面前刣死伊ê kiáⁿ，并且挖出伊ê两只目睭，然后用铜链锁tiâu伊，kā伊带到巴比伦去（参考列王记下廿五：1—8）。圣殿kah王宫贵重物件lóng被巴比伦帝国搜刮殆尽，m̄-koh ná mā只是暂时由巴比伦保管而已。上帝hō͘了犹大人民一个全新ê希望：上帝beh kā chiah-ê物件「运tńg来，khǹg tī原所在」，这表示有一工，上帝beh koh一pái复兴犹大ê以色列人民。