耶利米书 26章12节 到 26章24节   背景资料  上一笔  下一笔
Chit段经文是先知耶利米对chiah-ê祭司kah众先知控告伊ê辩白,mā得tio̍h其中一kóa审案官员kah长老肯定ê回应,这mā表示tī he样动荡不安ê世代中,m̄是每一个人lóng财迷心窍,丧失良知,iáu是有人愿意注意听上帝忠实奴仆先知传出ê信息。

Koh讲,chit段经文mā提起同是约雅敬王时代,另外一位先知乌利亚因为传讲上帝ê信息,结果被约雅敬王处死,伊ê尸体iáu被tàn tī平民ê坟地,表示侮辱伊。先知耶利米则讲家己得tio̍h保护,无遇tio̍h chit种结果。

第12到15节,chit段经文是先知耶利米对控告伊ê事件提出申诉。伊讲「上主差我」去「宣布chiah-ê诅咒圣殿kah chit-ê城ê话」,并m̄是家己乱放话。伊koh一pái呼吁大家一定会「悔改,服从上主」,mā只有án-ne才能挽tńg来á是改变上帝本来beh毁灭ê计画。伊无在意chiah-ê祭司kah众先知怎样罗织罪名控告伊,因为伊是尽上帝先知ê本分。因为án-ne,伊向chiah-ê审问伊ê官员表示无论in ài怎样对待伊,伊mā bē向in求情。M̄-koh伊mā提出严厉ê警告,若是in「杀害」伊,就beh为tio̍h án-ne事「偿付杀害无辜者ê血债」,因为伊是「由上主差遣来警告」in ê使者。上帝ê使者被杀害,上帝绝对bē静默不语。

第16节,tùi chit节thang看tio̍h tī政府官员中,mā有比较khah清楚状况ê人出来表达意见。In向chiah-ê祭司kah假先知讲先知耶利米是「奉上主—咱上帝ê名讲话,无应该处死」,这tú好讲出两点:一是in确认先知耶利米真正是奉上帝ê名传达信息。二是in认为无应该处死上帝ê先知。

第17到19节,m̄-nā是政府官员中有人反对处死先知耶利米,连参与审案ê「长老中间有人」mā khiā起来反对chit项控告案。In讲约tī主前715到686年犹大王「希西家」统治ê时,出现一位先知「摩利沙人」弥迦,向王提出上帝hō͘伊ê信息(参考弥迦书三:12),希西家王是因为听从先知弥迦所传达ê信息,而且伊是「敬畏上主,得tio̍h上主ê欢心」,并且积极进行宗教改革,「就án-ne上主改变心意,无kā原订ê灾难降tī in身上」,hō͘犹大国tī siōng危困ê时chūn得tio̍h解救。Chiah-ê长老mā提出警告讲,「chit-má咱会自招大难ā」,因为in看tio̍h大家疏忽、轻视先知耶利米ê话语,真可能为tio̍h án-ne为国家kah人民带来大灾难。

第20到23节,chit段经文真重要,说明tī先知耶利米仝时代mā有另外一位先知,就是「基列・耶琳人—示玛雅ê kiáⁿ乌利亚」,伊mā是「奉上主ê名讲预言」,而且所传出ê预言mā是讲犹大kah耶路撒冷会被上帝毁灭ê信息。结果「约雅敬王连同伊ê兵丁kah官员」,teh听了后「就想刣伊」。Á先知「乌利亚知影了这阴谋」了后,就「惊惶地逃往埃及」去避难。M̄-koh约雅敬王显然并无放过先知乌利亚,iáu特别派宫廷大官「亚革波ê kiáⁿ以利拿单」到埃及去kā乌利亚带tńg来犹大交hō͘约雅敬王,约雅敬王果然kā上帝ê奴仆先知乌利亚「处死」,并且iáu「Kā伊ê尸体tàn tī平民ê坟地」。

第24节,比起先知乌利亚,先知耶利米thang讲算是好字运ê了,伊因为得tio̍h「沙番ê kiáⁿ亚希甘ê保护」chiah无被处死。

重新查询 专卷研经 耶利米书系列
错误回报,请联系comm[@]fhl.net