耶利米书 25章1节 到 25章14节   背景资料  上一笔  下一笔
Chit章主要年代背景是主前605年,chia开始讲时间是tī约雅敬统治犹大国ê第四年。列王记下第廿四章1到2节有chit种记载讲:「约雅敬在位年间,巴比伦王尼布甲尼撒侵犯犹大。约雅敬被迫臣服伊三年,然后背叛伊。上主hō͘巴比伦、叙利亚、摩押,kah亚扪ê军队来攻打约雅敬,消灭犹大,tú亲像上主借伊ê奴仆众先知所讲ê。」

Chit章mā ē-sái讲是耶利米书第一部分(第一到廿五章)ê总结论。

Tùi第1节就thang清楚看tio̍h chit章信息ê背景,就是头前所提起ê,是tī约雅敬王执政ê第四年,mā就是主前第605年ê时chūn,先知耶利米传出上帝ê信息,主要就是tī劝勉犹大人民tio̍h悔改归向上帝,m̄-thang koh再继续拜偶像神明了。M̄-koh显然ê,犹大人民是听bē落去上帝透过先知传来ê chit种声音,结果引起上帝ê忿怒。因为án-ne,上帝决定徵召巴比伦王尼布甲尼撒带领军队去攻打犹大。Á这就应验ā第7节所提起ê讲in「为家己招来惩罚」。

第1节,chit节讲出明确ê年代,就是「约西亚ê kiáⁿ约雅敬做王统治犹大国ê第四年」,chit年mā是「尼布甲尼撒作巴比伦王ê第一年」,这tī主前605年。先知耶利米「tùi上主领受伊beh hō͘犹大人民ê信息」,这表示伊所讲ê信息,kah当时假先知假冒上帝ê名传达ê信息无相仝ê。

第2到3节:「约西亚做王统治犹大国ê第十三年」,乃是主前627年。Á chit-má是主前第605年,án-ne前后共计有「二十三年」时间,「上主不断来」向先知耶利米讲话,而且ài伊kā所得tio̍h ê信息「不断来」向犹大人民「转告」,m̄-koh犹大人民心刚硬,因为「in lóng是m̄听」。

第4到7节,chit段经文清楚描述犹大人民m̄听从上帝ài in遵守ê事,包括有:劝犹大人民tio̍h「放弃邪恶ê生活,改变罪恶ê行为」;「m̄-thang敬拜服事别ê神,m̄-thang拜lín所造ê偶像」等,ē-sái讲是无论上帝怎样讲,差派真chē「奴仆—先知」向犹大人民苦劝,in「m̄听,mā m̄-chhap」,m̄-nā án-ne,in iáu「用家己所造ê偶像激怒」上帝,为家己招来上帝忿怒ê惩罚。

第8到11节,就是因为犹大人民屡劝「m̄听从」,因为án-ne,上帝采取严厉ê惩罚方式,就是徵召「北方ê诸民族」,kah「巴比伦王尼布甲尼撒」当他ê「奴仆」,「攻击」犹大「这土地kah所有ê居民」,beh hō͘犹大成做「永远荒废,成做hō͘人惊骇唾弃ê所在」。因为巴比伦帝国军队攻击ê手段是残酷ê,因为án-ne,受tio̍h攻击了后ê犹大人民,kā「无koh有欢笑,mā无koh有婚宴喜庆ê声音」,「灯盏无油」表示乌暗罩tiâu tī每一个家庭á是公共场所。这mā说明续落来lóng kā是一片死亡、惊惶kah不安。而且「石磨上无谷物」,这表示完全无收成,背后表达ê就是「土地会荒废」,原因是男丁lóng去相战,而且是死tī战场,田园无法度种作生产五谷。Kui个国家「成做hō͘人恐怖ê所在」,而且犹大附近ê国家mā lóng会受tio̍h牵连。Án-ne,「列国要臣服巴比伦七十年」,是teh指tùi巴比伦统治犹大国开始,mā就是tùi约雅敬被俘虏ê主前605年起(参考列王记下廿四:1,耶利米书四十六:2),到主前538年巴比伦被波斯帝国消灭ê chit段期间。主前538年,波斯皇帝塞鲁士chiah允准受掠ê犹太人tńg去故乡(参考历代志下三十六:20—23)。

第12到13节,「七十年后」,上帝又ài「因巴比伦kah伊ê王所犯ê罪惩罚in」,chit句话thang参考耶利米书第五十章17到18节,chit两节lóng提起一个基本观念:上帝拣选亚述来惩罚北国以色列,然后用巴比伦帝国惩罚南国犹大,并m̄是讲亚述á是巴比伦chiah-ê强国就ē-tàng随心所欲地beh所beh为,in iáu需听从上帝ê旨意。Koh khah重要ê,无论是亚述á是巴比伦,lóng是上帝拣选来惩罚家己子民ê「奴仆」(参考廿五:9),而in却自认为比拣选in ê上帝iáu koh khah伟大,想beh kah上帝比高低(参考以赛亚书十四:12—14),因为án-ne,上帝决定对巴比伦王kah人民采取严厉ê惩罚。Á惩罚巴比伦ê方式就是用in过去对付列国ê方法。

第14节,chia所讲ê「列强」,其实就是波斯帝国,而波斯帝国是由数个族群结盟起来ê帝国。巴比伦m̄听从上帝ê旨意,专做pháiⁿ事,结果就是带来上帝严厉ê「报应」。这报应ê方式,就是照in所做残忍ê方法,临到家己ê身上。


重新查询 专卷研经 耶利米书系列
错误回报,请联系comm[@]fhl.net