Tùi第10节开始直到chia章结束，是一一数算犹大诸王ê罪状，mā包括耶路撒冷城ê人民在内。Chit段是关系犹大王约哈斯ê问题。

头前已经讲过chiah-ê王包括约哈斯、约雅敬、约雅斤等。Tī古代，国王kah国家ê关系是分bē开ê，因为án-ne，当上帝对一个国王讲出惩罚ê时chūn，mā等于是beh惩罚hit-ê国家仝款。因为án-ne，读chiah-ê经文ê时会发见国王被掠到它国，mā就是teh表明chit-ê国家已经被敌人phah败，m̄-nā是国王受掠，人民mā连带受灾。

第10节，「约哈斯」是伊ê御用名号，伊ê本名叫「沙龙」，是约西亚ê第四个kiáⁿ（参考历代志上三：15），约哈斯继承in父亲约西亚ê王位。约西亚是一位bē-bái ê国王，bat因发见申命记chit本经典，而大力推动宗教改革运动，先知耶利米mā bat参与伊ê改革工作（参考列王记下第廿二到廿三章25节）。可惜，约西亚因为派军队投入亚述对抗埃及ê战争，tī米吉多被埃及所败，并且阵亡（参考列王记下廿三：29）。Chit节chia讲「m̄-thang为已故ê王啼哭」、「m̄-thang为伊哀悼」，指ê就是chit-ê已故ê王约西亚，因为人民敬爱伊。M̄-koh「beh为伊ê kiáⁿ约哈斯啼哭」，因为伊「仿效伊祖先ê pháiⁿ模样，做上主看做邪恶ê事」（参考列王记下廿三：32）。换句话讲，伊一上任，就摧毁了in父亲留落来美好ê信仰典范。结果被埃及王所俘掳，「永远无法度tńg来，无法度koh再看见家己ê故土」，因为伊后来就死tī埃及（参考列王记下廿三：34）。

第11到12节，chit两节是重复叙述第10节尾段ê诗歌。