Tùi chit章开始，是记载犹大末期ê一kóa片段，一直到第廿六章24节止。M̄-koh chit段经文中并m̄是照时间顺序写做，其实，kui本耶利米书并m̄是照时间前后排序，却是kā一kóa事件记述落来，主要teh说明犹大ê君王、领袖，以及人民等，in弃sak上帝ê严重情形，以及后来领受tio̍h严厉ê惩罚之结果。

Chit一章记载hiah-ê讨厌伊、想beh谋害伊性命ê人却来chhōe伊，请伊协助走chhōe解救京城耶路撒冷被围困ê危机，看起来犹大beh解救被围城ê困境真oh，因为án-ne chiah会想tio̍h beh chhōe先知耶利米来帮忙。如果m̄是in已经无计thang施，根本bē chhōe先知耶利米，因为in lóng真讨厌伊，连听lóng无想beh听伊所讲ê话，因为伊所讲ê lóng是有关耶路撒冷会hō͘敌人所拆毁ê恶言，人民听lóng会真oh过，而且认为先知耶利米是teh妖言惑众，故意制造危机。Tī犹大人民眼中ê先知耶利米，ná亲像一个「谣传四围恐怖」ê人（参考耶利米书二十：10），因为先知耶利米一直teh传讲耶路撒冷城会被巴比伦帝国所困ê预言。M̄-koh犹大人民硬是m̄听，in欢喜听假先知kah祭司所讲ê hiah-ê听来hō͘人感觉良好ê虚假信息（参考耶利米书十四：14）。

Chit章thang分做两段，第一段是第1到10节，这是tī犹大王西底家ê时代为背景。第二段是第11到14节，这是tī约雅敬做王ê时代。

第1到2节，chia所讲ê「巴施户耳」并m̄是头前第二十章ê所讲ê「音麦ê kiáⁿ，圣殿总监巴施户耳祭司」，却是kah第三十八章1到6节ê巴施户珥仝款。Á chia所提起ê chit位「西番雅祭司」，kah第三十七章3节是仝一个人，in lóng是当时tī耶路撒冷拥有极高ê地位ê人。In奉犹大西底家王ê差遣，去请求先知耶利米代向上帝求救。原因是「巴比伦王尼布甲尼撒正率领军队围困chit-ê城」。M̄-koh这实在是真讽刺ê事，因为in既m̄听先知耶利米ê苦劝，甚至iáu讥讽伊，mā设计beh杀害伊，chit-má当敌人来围困首都耶路撒冷ê时，in chiah来请求伊为in向上帝祈求解围。

第3到7节，chit段经文是上帝ài先知耶利米回应chiah-ê代表国王西底家来请求ê官员ê话。Chit段话真清楚，上帝决定beh摧毁犹大国，而且是用严重ê方法作惩罚，包括用「战火、饥荒，kah瘟疫」等，因为上帝beh「用全部ê气力，tī忿怒、义忿，kah大受气之下痛击」in，然后kā in交hō͘巴比伦王尼布甲尼撒，kah其他想beh杀害in ê敌人，chiah-ê仇敌一点mā「bē怜悯」in。Chit种回应ē-sái讲是非常严厉，差不多无转圜ê余地。恐惊tio̍h犹大全国顶下lóng以真诚ê心忏悔认罪chiah有可能得tio̍h上帝ê拯救。

第8到10节，「上主kā活路死路lóng pái tī lín面前」，这是一种性命ê选择，看是beh生，是beh死，并无中间ê路thang chhōe。Chia清楚讲出，只有投降chiah是生路，抵抗ê，一定会tú-tio̍h「战死、饿死、病死」ê结果，m̄-koh chiah-ê显然m̄是西底家王kah伊ê臣仆想beh听ê话。这是因为上帝决定beh「惩罚chit-ê城，毁灭chit-ê城」，kā chit-ê城kah人民「交hō͘巴比伦王」。

第11节，chia特别提起「大卫后代」，mā就是「王室」ê人tio̍h注意听上帝ê话。上帝要求in一定tio̍h「ta̍k工」想tio̍h公义ê行为，因为这是上帝hō͘人性命siōng大ê恩典，忽略chit种事，就是忽略上帝ê恩典。Chia所谓「ta̍k工」，意思是teh指每工siōng重要ê第一件事，就是beh「tùi欺压者手中解救被压迫ê人」，这是成做一个公义ê君王á是社会领袖应该有ê使命kah责任。Mā是上帝拣选ê奴仆beh尽ê义务（参考创世记十八：19，以赛亚书四十二：1、6，阿摩司书五：24，弥迦书六：8）。如果īnm听从上帝chit种命令，一定会惹上帝受气。

第13到14节，chit两节是先知耶利米针对耶路撒冷城ê居民所传出ê信息。先知耶利米kā当时ê耶路撒冷人民讲，即使hit-ê城地势险要，上帝若是伸手来攻击，mā无人ē-tàng抵挡。会án-ne讲是因为耶路撒冷城ê人民可能认为in有占优势ê地理环境，kah坚固ê城墙thang做为军事屏障，无人ē-tàng攻破in ê城墙。过去tòa hia ê耶布斯人就是bat án-ne夸口，讲大卫带军队来攻打，in只需要派出「盲人kah跛子」也ē-tàng phah败大卫（参考撒母耳记下五：6），m̄-koh上帝kah大卫同在，虽然耶路撒冷城座落tī险要ê山丘上，iáu是hō͘大卫攻打落来。Taⁿ上帝beh成做耶路撒冷城ê敌人，就算有koh再显要ê地理要件，mā无用。