耶利米书 17章1节 到 17章18节   背景资料  上一笔  下一笔
这是真特别ê一章,提起有关守安息日ê问题,而且是一再重复chit-ê问题,thang看出先知耶利米ê认知中,一再提醒信仰ê中心态度:遵守安息日,就是tī实行kah上帝之约。

为甚么遵守安息日对以色列民族是hiah-ni̍h重要?而且是kah in性命ê生存以及国家ê存亡有关?这kah上帝所颁布ê诫命有密切关系。有关十诫第四诫论到守安息日ê规定有两主要ê背景:一是kah上帝ê创造有关。Tī出埃及记第二十章ê记载守安息日ê诫命,是因为上帝tī创造ê时,tī第七工就歇困了,并且设定chit工做圣日。因为án-ne,要求所有ê以色列民族代代kiáⁿ孙lóng一定tio̍h遵守这安息日,因为这是上帝赐福ê日子(出埃及记二十:8—11,创世记二:2—3)。另外一背景kah出埃及ê经验有绝对ê关系。Tī申命记第五章15节提起守安息日ê主要原因,是为tio̍h beh记念上帝用大能大力ê手带领in出埃及。无论是tùi创造ê背景来看,á是tùi出埃及ê历史经历来看,lóng kah性命ê存亡有关。要求以色列人民守安息日mā是teh提醒in绝对bē-tàng bē记得拯救ê恩典,并且tio̍h用真诚ê态度回应上帝拯救ê疼。

因为án-ne,先知耶利米kúi-nā pái呼吁家己ê同胞tio̍h会记得遵守安息日ê时chūn,便teh表示以色列人民bē记得带领in出埃及ê性命主宰—耶和华上帝。先知耶利米希望in ē-tàng ân-ân记tiâu拯救ê主耶和华上帝,而siōng重要、mā是siōng基本ê态度,就是tùi遵守安息日开始。

Chit段经文真清楚讲tio̍h以色列人民之所以后来会亡国,而且被巴比伦帝国俘虏去做奴隶,原因就是因为in去敬拜虚假ê偶像神明,引起耶和华上帝ê愤怒。Chit点mā是kui本耶利米书ê中心信息之一。

第1节,先知耶利米传达上帝ê信息,讲上帝beh伊用「铁笔写ê」、「钻石针刻」等记落来犹大人民犯罪ê情形,这表示in ê罪非常确实,无法度抵赖。而且是记录tī in献祭拜偶像ê所在。

第2到4节,chit两节讲述犹大人民拜偶像ê普遍kah严重性,明明是到处可见(参考耶利米书二:20),chē到ná亲像塞满kui个khiā起ê生活环境仝款(参考十六:18)。四界lóng thang看见拜「女神亚舍拉」ê祭坛kah神柱。因为án-ne上帝beh惩罚in,hō͘「敌人掠夺」in,phah败in,抢夺in所有ê一切。Koh khah严重ê是上帝beh hō͘ in受掠离开上帝赏赐hō͘ in代代khiā起ê土地,被「流放到生份地方作敌人ê奴隶」,这是因为上帝无法度原谅以色列人民所犯ê罪行,他ê怒火一直teh「火烧」tio̍h。

第5到13节是一首诗歌,chit首诗歌thang分做两个段落,一是第5到8节,ē-sái讲是对诗篇第一篇ê诠释。诗篇第一篇是用「好人」kah「pháiⁿ人」为对比,chia是用信赖世人,kah信靠上帝ê人做对比。然后是第9到13节,chit段诗歌说明上帝惩罚悖逆ê子民ê时,绝对罪证确凿。Chit段诗歌特别提起上帝对人心内ê鉴察,是伊惩罚人ê凭据。

第5到6节,chit两节是提起óa靠世人力量ê人最后会亲像栽种tī「沙漠中ê灌木,长tī炕旱ê旷野,长tī荒芜ê盐地」一般,面临lian去ê结果。Ná亲像会失去上帝看顾、保守ê人,受tio̍h诅咒一般,性命bē「有幸福」。

第5节提起信靠世人ê气力,chia第7节讲「专心信靠」上帝ê人,是「jōa-ni̍h-á幸福」,tú好kah第6节ê「无可能有幸福」成对比。Á chia ê「幸福」,kah源源不断ê水涌出来有关,mā thang解释做「富裕」ê意思。

第7到8节,chit两节相对tī第5到6节ê诗歌。

第8节ê「树根伸入水中」kah第6节ê「长tī炕旱ê旷野」、「荒芜ê盐地」成明显对比。「伸入水中」,mā表示非常坚固,bē摇动,性命力真强。Á「树叶常青,不断结出果子」,chit种诗句ná亲像诗篇第一篇所描述ê,栽种tī水边ê果子树,按照季节结果子,树叶永bē凋零。

第9到10节,「人心比甚么lóng诡诈」、「腐败」,一般人无法度「测透」别人ê心内意念,m̄-koh上帝却是看人心内ê意念而作判断(参考掖母记上十六:7);上帝m̄-nā是「察验人ê肺腑」,而且iáu会照人ê行为来「报应」(参考耶利米书十一:20)。

第11节,chit节ê句话真可能是取材自古老ê箴言(参考箴言廿三:5)。有ê人是「以不正当手段发财」,m̄-koh chit种人,就算拥有真chē财富,mā是枉然,因为ná ná亲像「一只鸟孵m̄是家己下ê蛋」仝款,ná亲像俗语所讲ê「无采工」,mā ē-sái讲是个「阿西」。

第12节,chia提起「圣殿像灿烂ê宝座」,这是因为圣殿ê至圣所内有上帝ê约柜,表明因为有上帝同在,chiah hō͘圣殿成做众人向往敬拜ê圣地,mā因为án-ne hō͘圣殿拥有上帝同在ê「灿烂」光芒。这是早tī大卫时代就已经选定了地点,由所罗门王建造起来。

第13节,先知耶利米真清楚koh一pái表白讲上帝是「以色列ê希望」,chit句话tī第十四章8节a句、22节c句lóng特别强调是「唯一ê希望」,因为chit位上帝是带领in祖先行出埃及ê全能者,mā是宇宙万物ê创造者,因为án-ne,离开chit位独一ê真神,只会hō͘人「蒙羞」,一点帮助mā无。

第14节,chit节thang参考第十五章18节。

先知耶利米以身躯ê痛苦ê样式来表达心内ê苦闷,伊祈求上帝「医」,并m̄是伊肉体上真正破病,却是一种心灵上ê痛苦,只有上帝才能hō͘伊得tio̍h安慰。伊希望上帝ē-tàng帮助伊减轻痛苦,án-ne伊就ē-tàng「颂赞」上帝。

第15节,chit节thang参考第二十章8节。

Chit节thang清楚thang看出先知耶利米心内会苦闷ê原因,就是伊传达上帝「警告」ê信息hō͘犹大同胞,m̄-koh伊ê同胞显然并无领受,甚至用真轻视ê话语回应伊讲,就hō͘上帝ê惩罚「实行pah」,其实,in mā是teh暗指先知耶利米是假先知(参考耶利米书十八:18),伊所传达ê信息根本就bē实现。  

第16节,chit节是先知耶利米teh向上帝告白,伊是一再为以色列同胞向上帝祈求,希望伊ê同胞ē-tàng避免「苦难」,mā从来m̄-bat有ài上帝「降灾祸tī in身上」。这mā teh表示伊ê同胞中有人谣传说伊lóng是讲诅咒同胞ê话,其实并无。

第17到18节,chit两节thang看出先知耶利米已经遇tio̍h ê恐吓、威胁(参考十五:15)。因为án-ne,伊koh一pái向上帝呼求,成做伊「遭难ê时惟一ê避难所」。伊深深知影,任何地方lóng无安全,除非有上帝ê庇护。伊祈求上帝严厉惩罚hiah-ê威胁「迫害」伊ê人,chiah-ê人就是hō͘上帝奴仆「惊惶」惊惶、受tio̍h侮辱ê恶徒。


重新查询 专卷研经 耶利米书系列
错误回报,请联系comm[@]fhl.net