Chit段经文有kóa混乱，m̄-koh iáu是ē-tàng理出一段头绪。Tī第14到15节经文中，显然阻断了kui章经文思路ê脉络。因为tī第廿三章7到8节koh一pái出现chit两节经文ê内容。因为án-ne，chit章ê第14到15节编辑tī chia，确实真不调kah，m̄-koh iáu是thang看出编辑上ê手路，是beh hō͘ tī差不多完全失望中ê犹大人民ē-tàng有悔改ê意念，想看上帝虽然是tī受气中ài先知耶利米传出惩罚ê话语，是希望in ē-tàng明白上帝是一个慈悲满满ê上帝，他一再ài他ê人民悔改tńg来到他ê面前。只要in悔改，慈悲ê上帝一定会kā in tùi苦难中拯救出来，并带领in tńg来到祖先ê土地。

第14到15节，以前以色列人民lóng会tī chiù-chōa ê时，lóng会用「带领以色列人出埃及ê永生上主」ê名chiù-chōa，表示chit位上帝只要讲tio̍h，就会照所应允ê做到。M̄-koh in chit-ê代ê犹大以色列人民已经重新成做巴比伦ê奴隶了。所以誓词会改变成做指chit位上帝，是带领in tùi被「放ta̍k」ê各国tńg来到chit片「祖先ê土地」。

第16到18节，chit节开始继续头前所讲到ê上帝之惩罚。Chia讲上帝beh差派ná亲像「讨海人」、「猎人」到各地去打击犹大人民，chiah-ê讨海人、猎人ná亲像巴比伦、亚述、埃及等列强，因为犹大人民无论tī jōa-ni̍h-á隐密ê所在拜ná「thang憎恨ê假神」，lóng清楚暴露tī上帝「目睭前，无法度隐藏」，chit种「邪恶kah罪过」，绝对无法度得tio̍h上帝ê赦免、赦免。

第19到20节，chia m̄-nā讲tio̍h犹大人民会重回上帝应允之地，而且会hō͘列国lóng来归向chit位全能ê上帝。先知耶利米用chiah-ê诗歌来教导以色列同胞认bat上帝，讲只有带领in祖先行出埃及ê hit位上帝，chiah是真正拯救者，是以色列民族ê避难所，mā是所óa靠ê盘石，永bē摇动。Chia koh一pái强调：只要是tùi人ê手造出来ê神，lóng是假神。因为是人所造ê神，表示chit-ê神比人软弱，tio̍h听从人ê指挥。

第21节，上帝beh hō͘「列国知影」他ê「大能大力」，这表示上帝beh koh一pái出手kā被掠到各地去ê以色列人民tùi巴比伦kah列强ê手中拯救出来。Án-ne，列国ê人民就会知影「耶和华」上帝ê名。Á这mā说明只有真正神，chiah有chit种能力，tùi巴比伦帝国手中kā所有成做奴隶ê以色列人民带出来。