耶利米书 15章1节 到 15章21节   背景资料  上一笔  下一笔
Chit章thang清楚看tio̍h犹大玛拿西王所做ê事,确实是hō͘上帝kah犹大人民关系破裂ê罪魁祸首,mā是上帝siōng无法度原谅ê一位犹大国王。列王记下第廿一章1到17节真详细地记载犹大王玛拿西án怎背叛上帝ê旨意,除了tī耶路撒冷圣殿里设置偶像神明外,伊ê双手koh khah是沾满无辜者ê血(参考列王记下廿四:4)。Á玛拿西却是犹大历代国王中在位siōng久长ê一位,总计统治五十五年,mā因为án-ne,伊对犹大人民ê影响非常深远,尤其是tī宗教心灵上影响koh khah大,伊带领人民tùi原本敬拜创造万物ê上帝,改为拜虚假无用ê偶像神明。Tī伊超过半世纪ê统治之下,历代志ê作者用chit种一句话来形容当时ê kui个犹大景况:「虽然上主警告玛拿西kah伊ê人民,in iáu是m̄肯听。」(历代志下三十三:10)

第1节,「即使摩西kah撒母耳khiā tī我面前向我祈求,我mā不怜悯chiah-ê人」,这清楚显示出上帝ê心非常疼痛。Chit句mā强化第十四章11节记载上帝对先知耶利米讲ê,无koh听伊为以色列人民祈祷ê声音,这mā显示出上帝ê忿怒已经是达tio̍h顶点ê状态。这mā是耶利米书记载上帝第四pái表示拒绝垂听先知为犹大人民发出ê任何祈祷声音(参考七:16、十一:14、十四:11—12)。上帝m̄-nā拒绝听犹大人民任何祈祷ê声音,甚至iáu决定kā犹大人民「赶走!叫in tùi我面前滚开」,这lóng teh表明上帝kā掩面无愿意koh再看见犹大人民,mā是表明beh放弃他kah犹大人民ê约。

第2节,thang参考第十四章ê 12节。

Chia提起「病死」、「战死」、「饿死」等,这三项lóng是先知耶利米信息ê主要内容之一。伊一再强调上帝会用「战争」、「饥荒」、「瘟疫」等三种方式来惩罚悖逆ê以色列人民。Tī chia mā增加第四项是「受掠」,表示上帝ê惩罚jú来jú重,上帝ê忿怒已到极点,因为「受掠」mā是teh说明iáu大将会hō͘灭亡,人民chiah会「受掠」去做奴隶。

第3到4节,chit两节koh khah进一步提起顶面所讲「四种灾害」ê情景,kah顶面所讲四种惩罚相对应。而且特别提起上帝chiah-ni̍h受气ê原因,就是因为玛拿西王ê罪。「被刀剑刣死」,这是属tī战争;「被野狗拖行尸体」、「被天空ê飞鸟啄食」、「被野兽吞食」等,这三项lóng tī说明战死á是饿死、病死ê人,无法度掩埋尸体了后呈现出来ê恐怖景象,hiah-ê尸体khǹg荒郊野外,á是城市街道中chhut-chāi野兽飞鸟啄食、吞食。上帝ài先知耶利米提醒犹大人民,他tio̍h用chiah-ê严厉ê方法惩罚in,hō͘ in连想beh收尸体、埋葬尸体ê机会mā无,因为in会hō͘敌人「掳」去做奴隶。所有chiah-ê事件ê发生lóng只有一个理由:犹大人民m̄-nā弃sak上帝ê教示,mā拒绝听从上帝忠实奴仆先知ê苦劝。Á这lóng kah「玛拿西王tī耶路撒冷ê恶行」有关系。

第5到9节,是一首短诗,说明耶路撒冷tú-tio̍h到巴比伦帝国侵犯ê惨状。

耶路撒冷原本是上帝ê圣城,结果却是杀害上帝奴仆ê所在,mā是弃sak上帝ê城市,甚至是充满tio̍h偶像崇拜ê城市,taⁿ tī上帝惩罚下,城里ê人kā bē得tio̍h任何人ê「可怜」,mā bē为in「悲伤」,向in「问好」。因为in「背离」上帝,而且是「转身不理」上帝,mā因为án-ne,上帝决定「无koh抑制家己ê忿怒」,决定beh像手the̍h簸箕teh「筛糠秕」一般,kā chiah-ê悖逆ê子民「筛散」,只因为为in「不悔改」认罪。上帝甚至beh hō͘ in「少年力壮ê青年人」战死战场,致使「寡妇会比海沙khah chē」,这是非常恐怖ê惩罚。有ê老母会因为「丧失七个kiáⁿ」而「晕倒」到无法度喘过气来,因为伊所有ê希望lóng破灭,甚至连「残存ê人」mā无法度留落来。可见上帝ê惩罚确实非常严重。

第10节,tùi chit节到第21节ê chit段经文,是先知耶利米kah上帝之间ê对话。第10到12节是先知耶利米提出ê疑问,而第13到14节则上帝ê回答;第15到18节是先知耶利米koh一pái回应上帝,然后第19到21节是上帝回答先知耶利米。

「我老母为何生我?」chit句话mā thang参考第二十章14到15节。表示对性命tú-tio̍h痛苦ê时ê一种艰苦心感受。先知耶利米tī chia提起家己ê孤独情况是家己「无借钱hō͘别人,mā无向别人借钱」,这表示无kah亲友发生金钱上ê纠纷,á是有任何无清楚ê瓜葛,m̄-koh却遇tio̍h别人ê「诅咒」。

第11到12节,先知耶利米认为家己真尽责,照上帝ê指示去做m̄-nā「尽事奉」ê「职责」,而且iáu为家己ê同胞向上帝「哀求」,m̄-koh却换来同胞ê无谅解,甚至对伊怀有恨意。M̄-koh事实上是巴比伦帝国kah「铜混合ê铁」仝款坚硬,会带hō͘犹大人民惨重ê伤害。

第13到14节,chit两节是上帝回应先知耶利米所提问ê话。Mā thang参考第十七章3到4节。

无错,上帝确实是为tio̍h beh惩罚犹大人民tī「全国各地所犯ê罪」,特别差派巴比伦帝国来侵犯in,m̄-nā beh来「掠夺in ê财宝」,mā tio̍h hō͘ in tī「生份ê所在受敌人奴役」,这是上帝对犹大人民ê惩罚。

第15节,chit节到第18节是先知耶利米继续向上帝发出呼声。

Tùi chit节thang真清楚提起先知耶利米面临被谋刣ê危险。有两种人是先知耶利米所提起想beh杀害伊ê敌人,一是第十一章18到23节先知耶利米伊ê乡亲亚拿突人想刣伊。二是第十八章18节所提起ê,先知耶利米认为hiah-ê专门传达假信息ê假先知、众祭司,因为先知耶利米拆破伊ê白贼,致使in想出所有ê办法beh阻扰伊传达上帝ê信息,甚至用不实ê罪名控告伊(参考廿六:7—11)。Chiah-ê人包括有圣殿总监巴施户耳(参考二十:1—2)。

第16节,chit节真可能是teh指主前621年ê背景,约西亚王时代tī圣殿中发见「约」册(指申命记),niâ后开始进行ê宗教改革运动。先知耶利米指出,就是因为得tio̍h上帝ê律法,人民ê「心内充满喜乐」kah ǹg望。先知耶利米确实是忠实tī上帝ê奴仆伊讲上帝对伊讲ê话,「句句我lóng注意听」,m̄-nā无歪曲上帝ê信息,mā无bē记得上帝ê任何一句话。Chit句「我是属tī你ê」,是一句立约ê用语,表示出先知耶利米确实是照上帝所交带ê事去做。

第17节,chit节thang参考第十六章到2节。先知耶利米是单身,m̄-koh soah koh hō͘家己ê同胞敌视,因为án-ne koh khah显得孤独。因为所有ê亲友lóng离开伊,这hō͘伊陷入了自我「哀怨」ê状态。

第18节,chit节充分显示出先知耶利米心中ê艰苦心。伊问上帝「为甚么不断受苦」?Chia ê「受苦」,包含被误解kah被威胁beh杀害伊。伊讲这是一种性命ê「创伤」,m̄-koh为甚么「bē-tàng医」。伊甚至怀疑上帝ná亲像「干涸ê小溪hit种靠不住」,这表示先知耶利米怀疑上帝bē记得呼召伊ê时ê应允?

第19到21节,chit段经文是上帝回答先知耶利米所提问ê问题,mā是上帝koh一pái坚定先知耶利米ê信心。上帝鼓励ê方式,是beh先知耶利米悔改,全心óa靠他,m̄-thang对上帝有怀疑。上帝用「tńg来」、「收留」、「重新」、「归向」等用词,lóng teh表示上帝beh重建先知耶利米ê心灵,hō͘伊tī极大ê挫折中,重新koh再出发。上帝ài先知耶利米会记得「只传达必要ê信息」,上帝iáu-koh看伊是他所拣选ê奴仆。上帝koh一pái表示beh kah伊「同在」,并且beh「保护」伊ê「安全」,hō͘伊tī众人面前ná亲像「铜墙」一般ê坚强,m̄惊人ê攻击。M̄-nā án-ne,tī面临灾难来临ê时,上帝会「tùi邪恶强暴ê人手中」kā伊「抢救出来」。

重新查询 专卷研经 耶利米书系列
错误回报,请联系comm[@]fhl.net