Chit段经文ē-sái讲是先知耶利米心内ê痛苦kah告白，tī chia伊提起家己ê乡亲亚拿突人（参考一：1）想beh杀害伊，原因是in无法度忍受先知耶利米所传出ê信息。另外，真有可能是因为先知耶利米支持约西亚王进行宗教改革而hō͘ chiah-ê祭司受tio̍h严重ê打击，因为约西亚王m̄-nā革除了真chē参与祭拜偶像ê祭司（参考列王记下廿三：5），甚至kā所有ê祭司集中tī耶路撒冷管理，m̄-koh hiah-ê过去参与偶像祭拜ê祭司却无得参与圣殿献祭ê工作（参考列王记下廿三：9），这等于剥夺了过去in tī以色列人民中lóng受尊崇ê地位。

第18到19节，先知耶利米tī chia讲伊原本都m̄知有人beh谋害伊，是上帝亲自启示伊，伊chiah知影ê。Chit句「趁这树茂盛ê时chūn kā它phut掉」，这是teh指先知耶利米正积极参与约西亚王ê改革运动，因为án-ne用「树茂盛」来形容先知耶利米是王宫当红ê先知。In想beh趁机会杀害先知耶利米并hō͘宗教改革运动彻底消灭。

第20节，chit节mā出现tī耶利米书第二十章12节。

先知耶利米向上帝祈祷，讲kā家己ê案情lóng呈现tī上帝面前，伊祈求「鉴察人ê心思意念」ê上帝，替伊「伸冤」。

第21到23节，chit节真清楚指出beh阴谋杀害先知耶利米ê，就是「亚拿突」人，in是先知耶利米ê乡亲（参考耶利米书一：1）。主要是因为伊传讲上帝ê信息hō͘ in oh得忍受。因为án-ne，in威胁先知耶利米m̄准koh再继续传扬上帝ê信息。上帝因为án-ne决定beh严惩亚拿突人，而且是无任何人thang佳哉免得。