Chit章主要teh绍介先知耶利米被上帝拣选ê经过，特别强调上帝拣选伊，并m̄是tī伊成长了后，却是早tī伊iáu未出世chìn前，上帝就已经计画beh拣选伊做奴仆，表示上帝是按计画进行他拯救ê工作。这mā teh说明当上帝决定拣选一个人来当他ê奴仆ê时，人是无能力thang推辞，只有ē-tàng顺服。Á上帝hō͘被拣选ê奴仆唯一ê保证，就是beh kah他ê奴仆做伙（参考一：8）。Chit种kah奴仆做伙ê应允，并无表示奴仆bē受苦，却是hō͘奴仆有够额坚忍ê心志，不屈服，有刚硬如铜墙铁壁般ê气力，thang抵挡会tiâu所有ê恶势力（参考一：9）。

Chit章mā真清楚说明上帝会透过异象传达信息，chit种看见异象ê记事，tī先知运动中一再出现，先知耶利米mā不例外。Tī这章ê异象表明有灾难来自北方，就是巴比伦帝国ê入侵。

Chit段经文记载先知耶利米被上帝呼召、拣选出来当奴仆ê经过，向犹大人民讲话ê时代背景。每一个先知lóng有被上帝呼召ê简短告白，其中先知耶利米ê siōng特别，伊讲当iáu tī母亲ê腹中就已经被上帝拣选。换句话讲，伊是lóng无拒绝ê机会kah力量。

第1节，「chit部册是耶利米ê语录。」chit句话有意表示chit本册m̄是耶利米家己写ê，若án-ne，则有可能是伊ê秘书巴录所记落来ê（参考耶利米书三十六：4—6、11—18、26、32、四十五：1）。Chit节mā绍介先知耶利米ê家族是属tī「便雅悯」支派ê祭司。因为án-ne，照祭司ê条例，先知耶利米mā是祭司。Kah先知以西结仝款，lóng是出身祭司家族（参考以西结书一：3），却被上帝呼召出来当先知。

「亚拿突」，这是属tī便雅悯支派境内四座属tī祭司亚伦kiáⁿ孙khiā起ê城镇之一（参考约书亚记廿一：17—18）。Chit-ê城设tī耶路撒冷东北方大约五公里ê所在。今á日ê名称是「亚拿大」（Anata），是阿拉伯人khiā起ê村镇。

第2到3节，chit两节绍介先知耶利米ê时代背景，讲是tī「约西亚统治犹大国ê第十三年」，这大约是tī主前627年。照列王记下第廿二章2节ê记载，约西亚王算是一个bē-bái ê君王，作者án-ne评论伊讲：「约西亚做上主看做对ê事，跟tòe先祖大卫ê脚步，不偏左不偏右。」甚至讲：「tī伊以前，无一个王像伊hit种尽心、尽意、尽力地事奉上主，遵行摩西所颁布ê律法，tī伊以后，mā无一个王像伊hit种。」（列王记下廿三：25）tī chit时chūn「上主向耶利米讲话」，而且是「常常」向耶利米讲话。M̄-koh tī「约西亚ê kiáⁿ」约雅敬统治犹大了后ê君王，lóng无想beh听先知耶利米传达上帝ê信息，一直到西底家王结束统治，犹大人民「被掠到巴比伦去」做奴隶止，这是tī主前586年。

第4到5节，chia讲先知耶利米尚且iáu未生出来，iáu tī母亲ê胎中，上帝「已经选召了」伊，chit句话表明上帝早已经有计画。Tī圣经中类似chit种先知有kúi-nā位，亲像先知撒母耳（参考撒母耳记上一：11）、参孙（参考士师记十三：3—5）、行洗礼约翰（参考马太福音一：13—17），in ê出世lóng kah上帝ê拣选有密切关系。值得注意ê是使徒保罗mā是án-ne告白家己，是tī iáu未出世chìn前就被上帝拣选（参考加拉太书一：15）。

Chia讲上帝拣选先知耶利米是beh指定伊「作万国ê先知」，这「先知」，意思是teh指替上帝传达信息者。因为án-ne，伊一定tio̍h忠实传达上帝ê话语（参考申命记十八：18—19，列王记上廿二：14）。

第6节，这是先知耶利米拒绝接受上帝ê呼召。伊讲家己「太少年」，「无口才」，chit种话语真亲像摩西回应上帝ê呼召仝款（参考出埃及记四：10、六：12）。当先知耶利米用「太少年」一词来回应ê时，其实真清楚，he是一种逃避、推辞ê意思。上帝拣选人，bē受tio̍h年纪ê影响，就亲像上帝呼召亚伯拉罕出哈兰ê时，亚伯拉罕ê年纪是75岁（创世记十二：4），摩西被呼召ê时，则80岁（参考使徒行传七：30—35），而上帝呼召先知撒母耳传话ê时，hit时伊iáu是细汉gín-á（参考撒母耳记上三：8—10）。

第7到8节，上帝回答先知耶利米，ài伊「m̄-thang自认为少年」，上帝拣选伊就是beh「宣布」上帝ê一切话」，这真清楚表示上帝呼召先知耶利米，是beh伊kā上帝讲ê话lóng照实讲出来hō͘犹大人民听。上帝为tio̍h beh坚定先知耶利米ê心，因为án-ne ài伊「mài惊」，他会kah伊「同在，tio̍h保护伊」，上帝chit种应允先知耶利米ê话，以及ài伊去传hō͘犹大人民ê话是一再出现（参考耶利米书一：19、十：5、十五：20、三十九：17、四十二：11、四十六：27—28）。

第9节，就án-ne上帝「伸手摸」先知耶利米ê「嘴唇」，这是一种象徵性ê讲词，表示上帝beh「Kā该讲ê话khǹg tī」伊ê「嘴中」，先知耶利米只传讲上帝beh伊讲ê信息。Mā表示伊所讲ê，lóng是出tī上帝ê授与。

第10节，chit节说明先知ài先知耶利米去执行ê工作，就是beh「向万国万民做根除、拆毁、破坏、推翻、重建，kah种植ê工作」，这说明先知耶利米一生ê主要工作。Chit句话mā thang清楚看出两项主要内容：

一是「根除」，了后就续落来tio̍h「种植」。「根除」，这是连根拔起，只有án-ne才能彻底改变。

二是「拆毁、破坏、推翻」，然续后落来是「重建」。Chit部分就是穿插tī「根除」kah「种植」中间。因为「根除」ê时，就需要进行「拆毁、破坏、推翻」ê工作，然后才能「重建」，mā就是重新栽种。