雅各书 3章1节 到 3章18节   背景资料  上一笔  下一笔
第三章到第四章lóng是谈及生活上ê行为。作者特别tī第三章1到12节,以及第四章11到12节等等两处经文lóng提起有关说话ê问题,这m̄-nā关系tio̍h对信仰ê认知问题,koh khah是关系tùi信心延伸出来到实际行动。

	圣经中除了箴言以外,会讲tio̍h有关嘴舌问题ê,就是用约伯记kah诗篇为siōng chē,所谈ê就是描述嘴舌对人造成ê利益kah伤害(参考约伯记二十:16、三十四:3,诗篇三十四:13、三十七:30,箴言六:16—19、十二:19)。

	雅各书ê作者Tī chit章中特别提起嘴舌ê事,就是希望大家tio̍h注意:tī一个信仰团契中,若是无注意hit-ê siōng微小ê事,就真容易造成极大ê伤害。Ná亲像tī前一章作者所提起ê,hiah-ê卑微、贫困ê信徒进入教会参加聚会,却受tio̍h冷漠ê款待,hit种伤害之结果是非常大ê。千万m̄-thang看轻一个卑微ê人tī咱中间,ná亲像m̄-thang疏忽嘴舌chit-ê微小ê器官tī咱身躯上仝款,小khóa一受伤,lóng会造成咱全身不爽快。仝款ê,tī一个以耶稣基督做中心ê信仰团契中,若是有一个卑微ê兄姊受tio̍h伤害,mā会大大影响kui个信仰团契。

    雅各书第三章之经文,主要提起两个主题,其一就是讲tio̍h嘴舌tī人ê言行举止上带来ê影响,其二就是有关属天kah属地ê智慧之间ê差别。
第1节,「教师」,这tī早期教会中扮演 ná亲像犹太人拉比(教师)ê角色,in专门负责教导ê工作。因为「教师」ê角色kah地位崇高,因为án-ne,并m̄是每一个人lóng ē-tàng当教师。当教师若是犯错,就「tio̍h比别人受koh khah严重ê裁判」,因为教师就是tī用言语教导人怎样认bat上帝旨意kah教示,所以,伊ê错误教导所带来ê影响非常大,伊所受ê批判mā比一般人严重。

第2到4节,作者开始tùi一个普遍ê哲理开始讲起,chit-ê哲理就是tī chiah-ê世界上,chhōe bē-tio̍h「无过错」ê人。箴言ê作者甚至讲义人mā会「tiāⁿ-tiāⁿ跋倒」(箴言廿四:16)。每一个人lóng会犯错,m̄-koh犯错mā区分做故意á是m̄是故意ê。Chia所指ê错误,是teh指m̄是故意ê,而且m̄是真严重ê。因为án-ne,会反省,就会有控制ê效果。Ná亲像一只马,只需一个小小ê「嘴环」就ē-tàng控制它,mā像一艘大船,只需用「一个小小ê舵」就ē-tàng kā它「操纵」,就ē-tàng「跟tòe舵手ê意思」航行。

第5到8节,Tī chit段经文中作者真详细地叙述嘴舌对人ê影响力是jōa-ni̍h-á大,作者除了顶面所讲用马ê嚼环kah船舵来譬喻,主要teh凸显嚼环kah马匹tī体积上ê对比,船舵kah船身mā是仝款。最后则用chit种类譬喻式带入嘴舌kah人身躯ê对比,说明影响力大ê,并无一定体积就大,反tńg是siōng微小ê体积,却是有siōng重要ê气力。作者用此来说明一个人如果对家己ê「嘴舌」(讲话)ē-tàng控制ê好,ná亲像手握tòa马嚼环ê人仝款,thang kā马驱致使非常稳定,就ná亲像船长ē-tàng用小小ê舵控制整艘大船。

雅各书ê作者有意说明「嘴舌」虽然体积真小,m̄-koh却ē-tàng「讲大话」,chit-ê意思是teh指自我膨胀、夸口ê话。另外一方面,「讲大话」mā是teh指影响真大。作者讲「星之火kám m̄是ē-tàng燎原」这是咱非常熟悉ê一句俗语,主要teh说明m̄-thang看轻嘴舌只是身上小小ê器官而已,却ē-tàng造成极大影响,它影响所及ê全身。做一个人用嘴舌讲出无妥当当ê话语ê时,造成ê罪恶m̄-nā会污染咱全身,严重ê时甚至会毁坏kui个人。作者tī chia特别提起人有各种ê能力,ē-tàng控制chit世界上ê各种动物,m̄-koh,却常常无法度控制家己ê嘴舌。

注意第8节所提起ê「毒气」,这字mā thang当做「飞箭」解释。Án-ne就会明白一个人若是无注意tio̍h讲话ê内容ê时,就kah-ná看tio̍h一支有含剧毒ê飞箭射出去仝款,伤害了对方,mā hō͘家己陷入犯罪中。

	第9到12节,chit段经文lóng是相对ê句型,包括颂赞kah诅咒、甜kah苦、甘甜kah咸涩等。注意第12节ê「无花果树无法度结橄榄;葡萄树无法度结无花果」chit句话,这是一句中东地带真流行ê俗语,意思就是除非天地颠倒,若无,这是无可能发生ê事。作者tī chia讲仝款ê一个泉水,无可能同时涌出甘甜kah咸涩两种无仝气味ê水。

第13节,「好行为」、「美好ê生活」,lóng是teh指具体行动产生出来ê结果。作者koh一pái tńg来到chit本书信siōng本来ê一个主题:有好ê行为,ē-tàng证明一个人真正认bat上帝。

第14节,一个会「自夸」ê人,mā就是诗人所讲ê「狂傲ê人」(参考诗篇十四:1),chit种人心中bē有上帝。作者强调「讲白贼」就是「对敌真理」ê行为。因为真理就是上帝,当人讲白贼ê时,就是m̄承认上帝。

第15到16节,chit两节kah第17到18节是相对ê经文;前两节提起属地上ê「智慧」,kah后两节讲ê属天顶ê「智慧」是无仝ê。作者提起属地上ê「智慧」,其实是「属情欲」ê,mā属tī「魔鬼ê」,这包括「嫉妒kah自私」、「纷乱kah各种邪恶ê行为」等。M̄-koh属tī天顶ê「智慧」是「纯洁」、「和平、谦和、友善、充满tio̍h仁慈」、「无偏私、无虚假」等。

最后作者用土地kah掖种子做譬喻,kā「和平」ê种籽掖tī土地上,必定会收tio̍h正义ê果子。耶稣基督tī登山宝训讲:「Hō͘ 人和平ê 人实在有福气,因为in 会成做上帝ê kiáⁿ 儿!(全民版)」(马太福音五:9)若beh见证福音,siōng基本ê事就是:不制造纷乱、斗争,却是推动和平。因为如果无「和平」,以基督ê名建立起来ê教会就无见证。

重新查询 专卷研经 雅各书系列
错误回报,请联系comm[@]fhl.net