雅各书 1章1节 到 1章18节   背景资料  下一笔
Chit章就已经kā kui本书信ê几个重要题旨表达得非常清楚,包括有:信心kah智慧ê问题;面对试探ê事;财富ê危险;注意听kah实际行为;对苦难者ê关心等等。

    第1节,「我—雅各」,这是作者自我绍介。M̄-koh ná亲像tī简介chit本书信ê时有提过ê,chit位雅各并无一定就是作者ê名,有可能是借用「雅各」ê名写chit张phoe。因为当时耶稣基督ê兄弟雅各tī初代教会内真有影响力,因为án-ne,用伊ê名写phoe,对当时某一kóa读者来讲真紧to̍h ē-tàng得tio̍h效果。

  Koh讲,chit位作者自称是「上帝kah主耶稣基督ê奴仆」,这「奴仆」一词mā表示「奴仆」ê意思。Chia表达两种意思,一是teh指完全属tī主人,无家己ê自由。二是家己甘愿成做主人ê奴仆。

    「散居tī全世界ê上帝ê子民」,chit句话tī中文《和合本》是采用原希腊文写ê「十二支派」chit-ê词而用「散tòa十二个支派之人」。其实,tī雅各书写做ê时chūn,所讲ê十二支派已经不存在。而且chit本书信mā m̄是写hō͘犹太教徒看ê,因为án-ne,这用「十二之派」chit-ê词,是早期教会基督徒自喻为「新以色列人民」á是「新以色列选民」。《现代中文译本》kā它翻译做「全世界ê上帝ê子民」就是根据chit种了解。

    Tī chit段经文中并无一个明确ê主题,m̄-koh讲tio̍h三个重要ê内涵,包括有:tú-tio̍h试探ê时,怎样用信心kah智慧搭配去克服。Koh讲,mā简略地讲tio̍h有关贫贱kah富贵之间ê差别。三是讲tio̍h每一个人ê性命lóng会tú-tio̍h考验kah试探,m̄-koh一定会坚持到底chiah会得胜。

    第2到4节,chia提起「遭遇各种试炼」,这是teh指tī信仰上tú-tio̍h迫害。Koh讲,所谓信仰上ê迫害,并无尽然lóng是teh指政治、宗教上ê,有ê时mā是生活kah工作上ê,亲像破病久了,真容易hō͘人郁卒(参考五:14);koh亲像tú-tio̍h不公义ê事mā会hō͘人失去信心(参考二:6)。作者认为试炼乃是hō͘人tī信心上koh khah成熟ê一种方式,因为án-ne,应该kā它当做是一种「thang庆幸ê事」,而且tio̍h「忍耐到底ē-tàng达tio̍h十全十美」。

  第5到8节,作者提起hō͘信心koh khah完备ê方式,就是祈求上帝赐hō͘智慧。Á祈求siōng重要ê态度就是m̄-thang有任何giâu疑,因为上帝会听人ê祈祷。如果向上帝祈求,iáu「三心两意,摇pái不定」,chit种人无论祈求甚么,lóng bē有任何效果。

    Koh讲,圣经讲tio̍h智慧,意思是teh指认bat上帝ê旨意。照箴言第二章6节ê记载,智慧是tùi上帝赏赐chiah得tio̍h,而这智慧是包括「知识kah悟性」。

    第9到11节,chit段经文kah上段经文完全不相连。M̄-koh thang kā chit段经文对照以赛亚书第四十章6到7节来看。

    「贫贱」,chit-ê词指ê是卑微ê意思。Chit种人「蒙上帝提升」,确实是一件真值得「欢喜」ê事。因为贫贱本身就是真大ê试炼,ē-tàng赢过chit种试炼后,会得tio̍h上帝ê赐福而提升伊tī上帝面前ê重要位置,这当然是件真欢喜ê事。相对tī「富贵ê人被贬低」,表示丧失本来财富,mā应该是值得欢喜ê事,因为án-ne伊chiah会知影财富本身ná亲像花草仝款不可靠。并且因为án-ne知影tńg来óa靠上帝,而bē kā所有性命ê时间tī「事业上孜孜经营」,结果是丧失对上帝ê认bat,这就等于丧失性命仝款,因为上帝是性命ê赏赐者。

  第12到15节,chit段经文是谈及有关「试炼」ê问题。第12节提起「性命ê冠冕」,指ê就是永恒ê性命。冠冕mā是赏赐ê意思。一般人看「冠冕」lóng是属tī hiah-ê高贵、有权势ê人所有。M̄-koh hit种ê冠冕是暂时ê,ná亲像花草树木仝款,真紧to̍h会凋谢。Á雅各书ê作者则认为chit种属tī永恒性命ê冠冕并m̄是专门为某一kóa人准备ê,却是为所有tī信仰上会堪得考验ê人所准备ê。因为「性命ê冠冕」是来自天顶ê奖赏(参考腓立比书三:14)。

    Ài beh特别注意第13节所讲ê,上帝「不试诱人」。会试诱人心ê,是人心内ê私欲。因为án-ne「一个人受试诱,是hō͘家己ê欲望勾引去ê」。作者tī chia真清楚讲tio̍h一个连结关系,就是「欲望」会致使「罪恶」,而「罪恶」带来ê结果就是「死亡」。使徒保罗tī罗马书第七章讲这就是人ê贪欲,伊用「本性」来描述,是罪ê表现,而罪hō͘咱迈向死亡。

    第16节,「m̄-thang被愚弄」,这「愚弄」一词表示欺骗ê意思。

    第17节,作者tī chia强调「一切美善ê事务kah各种完美ê恩赐lóng是tùi天顶来ê」,原因只有一个,因为是完全ê(参考马太福音五:48)。上帝是「一切光ê创造主」,chit句话thang tùi创世记第一章3到5节。光,teh代表性命(参考约翰福音一:4)。

    第18节,chit节thang参考创世记第一到二章记载ê创造故事有关。


重新查询 专卷研经 雅各书系列
错误回报,请联系comm[@]fhl.net