以赛亚书 9章8节 到 9章21节   背景资料  上一笔  下一笔
Tùi第8节开始,一直到第十章4节,Tī chit段落中thang kā它分做四个小段落,就是第九章8到12节、第13到17节、第18到21节、第十章1到4节等等。Tī chit四个段落ê最后,lóng是用「上主ê受气无停息;伊iáu-koh beh举手责phah in」chit句话,作为段落ê结尾。

Chit段经文真清楚讲tio̍h上帝beh兴起以色列人民ê敌人,hō͘ chiah-ê敌人来完成上帝惩罚以色列人ê工作。

第8到10节,上帝ê奴仆已经kā信息传达hō͘以色列人民了,就等tio̍h看以色列人民是m̄是愿意听从。Chia ê「全体以色列人民」,是teh指北国以色列全体人民。原本希伯来文是teh指「以法莲」,因为北部十个支派是用以法莲为首。可惜北国以色列人民太骄傲,m̄知上帝ê惩罚teh beh来临,无论in怎样防范都无用。

第11到12节,「上主鼓动in ê敌人」,chia ê敌人是teh指亚述人、叙利亚人,kah非利士人。Mā就是围tī以色列四周ê附近国家kah族群。原因是「上主ê受气无停息」,mā teh表示以色列人民并无想beh听从上帝ê话语。

第13节,「以色列人民」,chia所指ê是全体以色列民族。先知ê信息不时是借用他国ê惨痛经验作为教材,呼吁以色列人民tio̍h警诫、注意,赶紧「悔改」才能停息上帝ê忿怒。可惜到chit-má in iáu是「不悔改,不tńg来到上帝面前」,只好面对上帝忿怒ê审判。

第14到15节,上帝beh「phut掉」以色列领袖kah人民ê「头尾」。Chia所指ê「以色列」,应该是指南国犹大ê领导阶层kah贵族。所谓ê「头」是teh指领导人,而「尾」,是teh指假先知。

第16到17节,上帝特别tio̍h严厉惩罚ê对象,就是chit群领导者,因为in是kā人民引入歧途ê罪魁祸首。M̄-koh听从chiah-ê错误ê信息,á是故意去违背上帝旨意ê人,上帝mā会惩罚,因为「所有ê人lóng无法无天」。这已经teh暗示上帝ê惩罚就是hō͘以色列人民phah败仗,致使国家灭亡,人民hông掠去做奴隶,无任何一个人会佳哉免得受难,即使是孤儿kah寡妇lóng仝款。

第18到19节,chia讲当领导阶层者chiap-chiap犯罪ê时,人民mā tòe学习in ê pháiⁿ模样,连带hō͘ kui个社会倾向邪恶,像「火烧刺phè ê火蔓延」,koh kah-ná「森林tio̍h火」,表示kui个社会败坏、堕落到非常严重。因为án-ne,上帝已经「震怒了」,他ê惩罚会亲像一团大火烧,结果会「毁灭了人民,一个mā不留落来」。

第20节,chit节真值得注意,表示因为敌人围困ê情景非常严重,iau饿到彼此交换gín-á煮充饥。Chit种情形后来mā发生tī南国犹大,时间是tī主前第588到586年代,巴比伦帝国围攻耶路撒冷城长到十八个月,后来城内无任何食物kah水,in mā是交换gín-á煮,甚至iáu有老母煮家己ê婴á来食(参考耶利米书十九:9,耶利米哀歌二:20、四:10),mā有kiáⁿ食父老母ê肉充饥(参考以西结书五:10)。

第21节,「玛拿西kah以法莲人互相攻击」,chit句话真值得注意,chit两个族群原本是亲骨肉,in lóng是约瑟tī埃及所生ê gín-á,表示北国以色列虽然表面上看起来是同宗族ê人,tī he ê时mā闹内讧。Koh讲,chit节经文已经清楚指出一件事:若是连父母kah kiáⁿ lóng会为tio̍h beh存活落去,而食对方ê肉,亲兄弟ê关系就koh khah bē有深刻ê情感thang讲。

重新查询 专卷研经 以赛亚书系列
错误回报,请联系comm[@]fhl.net