以赛亚书 7章1节 到 7章25节   背景资料  上一笔  下一笔
第七章kah第八章lóng提起上帝beh惩罚in ê预言。先知以赛亚kah其他ê先知lóng仝款,一再提醒上帝ê子民,性命ê óa靠只有上帝,m̄是军事武器,mā m̄是政治势力,上帝chiah是人性命真正重要ê基石。Bē记得上帝,chhōe自认有力量ê对象来协助,有可能暂时thang得tio̍h帮助,m̄-koh结局会失去所有。除非帮助者mā是出tī上帝ê旨意,若无,想beh óa靠人ê气力得tio̍h拯救,he是非常愚戆ê想法。

Tī chit章经文提起一个重要ê名词,就是「以马内利」。这Tī圣经中有三pái提起,除了tī第14节提起,mā tī第八章8节提起,了后tī马太福音第一章22到23节引用先知以赛亚chit段话koh提起。Chit位词真清楚teh说明:上帝kah你同在。用chit位词teh表明上帝就是帮助者,因为有上帝kah咱同在,就m̄免担心大风涌ê吹袭kah摇动。Chit种信息,对当时原本「非常惊惶」ê南国犹大人民来讲,应该是真大ê鼓舞,可惜ê是国王听bē落去chit种信息。

第1节,「亚哈斯作犹大王」,伊大概是tī主前735年左右执政,当时年约20岁,总共执政有16年ê时间,直到主前719年左右。Tī伊任内发生北国以色列联合邻国叙利亚ê军队,共同攻打耶路撒冷,这大概是tī亚哈斯执政ê两年后,就是tī主前733年。Chit pái进攻,虽然无攻落耶路撒冷,m̄-koh却hō͘犹大失去大约十二万精兵,而且大约有二十万人民(包括妇女而同在内)hông掠去撒马利亚,连同真chē财物mā被劫行(参考历代志下廿八:5—8)。后来因为有一位先知俄德出来谴责北国以色列军队chit种行为,北国以色列chiah kā chiah-ê被俘虏ê犹大人民释放tńg去(参考历代志下廿八:9—15)。

第2节,「叙利亚军队开进以色列境内」,这表示两国同盟,以色列hō͘叙利亚军队进入,主要就是beh kah in组成联军进攻犹大。因为án-ne,当chit-ê消息传到耶路撒冷ê时,犹大ê亚哈斯kah人民lóng非常惊恐不安。作者用「树枝tī狂风中摇摆」,表示社会非常动荡不安。

第3到6节,这是上帝ài先知以赛亚去传达信息hō͘惊惶中ê亚哈斯王。上帝ài先知以赛亚带伊kiáⁿ「施亚雅述」同齐去见亚哈斯王。Chit-ê名ê意思是「少数人teh-beh 回乡」(参考十:20—22)。Tio̍h注意chia ê「少数」,表示真chē人kā因为án-ne丧失性命,因为只有少数人ē-tàng保存性命。先知以赛亚用伊ê kiáⁿ「施亚雅述」Chit-ê名ê意义,是beh警告亚哈斯王,若是去走chhōe亚述帝国军援,到最后会ná亲像「施亚雅述」Chit-ê名仝款,只有少数人ē-tàng保存性命。因为án-ne,ài先知以赛亚去kā亚哈斯王讲,m̄-thang惊惶叙利亚kah北国以色列ê联军。Beh hō͘亚哈斯知影,真正ē-tàng帮助伊ê,就是全能ê上帝,并m̄免惊他国ê强兵武力,ài伊改变态度,对上帝有信心。同时mā hō͘亚哈斯王知影,虽然以色列kah叙利亚联盟,m̄-koh「的确另外有阴谋」,目的是逼犹大加入in,合力抵抗亚述帝国ê兴起。Koh讲,chia mā特别提起另外一则比较khah恐怖ê事,就是牵乱讲到窜夺王位ê事,就是in想kā亚哈斯废掉,然后拥戴叙利亚人「伊比勒ê kiáⁿ做王」。

第7到9节,上帝继续透过先知以赛亚传达信息hō͘亚哈斯王。Beh hō͘亚哈斯清楚知影,以色列kah叙利亚ê联盟计画一定bē成功,m̄-koh khah重要ê是特别提起北国以色列teh beh tī 65年内亡国,这是非常hō͘人大tio̍h惊ê信息。其实,北国以色列是tī主前721年被亚述帝国hō͘消灭(有关北国以色列灭亡ê情况,在列王纪下第十七章有真详细ê记载),比起先知tī chia所讲ê时间提早koh khah chē。先知以赛亚提醒犹大王亚哈斯一定会信靠上帝,m̄-thang kah北国以色列、叙利亚等同盟,ná亲像第7节所提起,chit项结盟是bē成功ê。

第10到11节,先知以赛亚向亚哈斯王提出建议讲,若是m̄相信先知ê信息,伊thang向上帝祈求一个明确ê记号,好加添伊对上帝ê信心。这有可能是因为先知以赛亚ài伊m̄-thang走chhōe外国军援,tio̍h专心óa靠上帝ê带领ê时,亚哈斯王认为这并bē-tàng行。因为án-ne,先知以赛亚做出chit种建议,beh帮助伊确信这是上帝ê信息。Á chit句「记号可能来自阴间,mā可能来自天顶」,意思是teh指上帝掌管ê宇宙间,lóng可能出现记号,因为上帝并m̄是只掌管天顶,mā掌管tio̍h阴间。

第12节,亚哈斯王回答先知以赛亚,认为向上帝祈求记号,是对上帝有所怀疑(试探),伊m̄敢án-ne祈求。表面上看起来伊kah-ná真有信心ê款,其实不然。因为伊原本就怀疑上帝,上帝疼惜伊,愿意显现一个记号作为确实ê保证,好坚定伊ê信心。M̄-koh伊拒绝,tú好讲出伊ê怀疑kah m̄信,mā显示了伊ê愚戆。

第13到16节,先知以赛亚当然清楚亚哈斯王ê心态,因为án-ne,用真严苛ê话回应了伊,讲伊「iáu koh khah hō͘上帝厌烦mah」Chit句谴责ê话语,意思是teh指怎样ē-tàng对上帝hiah-ni̍h无信心。先知直接讲出上帝beh亲自hō͘伊一个记号,就是:「有闺女会有娠生kiáⁿ,并要求hō͘伊号名『以马内利』。」这意思是「上帝kah咱同在」。Tī耶稣出世ê时,马太福音作者mā引用chit节经文(参考马太福音一:23),来表示耶稣ê降生,就是teh代表上帝kā进行他奇妙ê拯救。先知以赛亚讲chit句话,是teh kā亚哈斯王讲,上帝kā永远kah他ê子民同在。先知同时表示:当chit-ê预言beh出世ê婴á iáu未长大chìn前,「两个暴君ê国土lóng tio̍h荒废」;而chit两个暴君,就是teh指叙利亚王利汛kah以色列王比加。Chit句话mā说明叙利亚kah以色列lóng会hō͘灭亡。Á这预言果然分别tī主前732年kah主前721年应验ā。

第17节,先知直接kā亚哈斯王讲,因为伊m̄信上帝,对上帝用藐视ê态度,因为án-ne,上帝beh降灾祸tī伊kah伊ê人民身上。Chit种灾祸是「自以色列tùi犹大分裂出来了后,无发生过」,就是teh指灭亡。后来chit件事tī亚哈斯ê kiáⁿ玛拿西执政ê时,koh khah败坏。Chia讲会灭亡tī亚述,m̄-koh亚述后来被巴比伦帝国所灭,然后就是tī主前586年,巴比伦帝国消灭了犹大。

第18到19节,chia特别提起两个强大国家,一是埃及,另外一是亚述。先知以赛亚tī chia用两种昆虫来表示chit两个强猛国家ê气力,伊用「胡蝇」来表示埃及,「黄蜂」表示亚述。Koh讲,用「胡蝇」kah「黄蜂」,mā teh表示in ê数量极chē,除非有上帝ê帮助,若无,人ê气力根本无法度抵挡。

第20节,kā亚述帝国ê皇帝用「理发匠」来形容。「刮掉胡须」,以及剃光「头毛」,kah拔除身上所有「汗毛」等,chiah-ê动作lóng teh表示极大ê侮辱(参考撒母耳记下十:3—5)。另外一方面mā teh表示土地顶面ê花草树木ê意思。因为án-ne,剃光、拔除chiah-ê花草树木,等于是hō͘土地遇tio̍h极大ê摧残,无koh有任何植物生长出来,包括所有ê果园等lóng kā彻底被蹂躏殆尽,ná亲像废墟仝款,而这是用火烧,chiah会有ê惨重灾情。

第21到22节,因为有第20节拔光、烧光一切植物ê灾情,结果hiah-ê人只有ē-tàng tńg来复到siōng早ê放牧生活,因为田地已经无法度复耕,果园lóng遭到à摧残,而无法度种植任何果子树。因为án-ne只有chhun落来几只小牛kah山羊,而人tio̍h óa靠chiah-ê牛羊微薄ê乳汁生活,á是采集野蜜果腹充饥。这表示hiah-ê人ê生活非常困苦。

第23到25节,mā是延续第21节ê灾情了后,所带来ê就是sàn-chhiah现象。Chia用「刺phè」来形容生活ê痛苦,如同在刺phè中chhōe thang食用ê果子仝款困难。即使是想beh chhōe任何thang食ê食物,tī「遍地刺phè」ê环境中,mā是真oh,这表示灾情确实真严重。

重新查询 专卷研经 以赛亚书系列
错误回报,请联系comm[@]fhl.net