以赛亚书 66章12节 到 66章24节   背景资料  上一笔
Chit段经文是本章经文ê结尾,mā是第五十六到六十六章ê结束。Chit段经文有一个特色,就是用「火」开始(参考第17节),mā用「火」结束(参考第24节)。Á「火」Tī圣经中,表明上帝审判ê方式。Koh讲,圣经每pái提起上帝ê审判,就是毁灭,m̄-koh另外一方面近óa跟tòe tī审判了后ê,就是上帝重新创造ê时带来ê赐福,hō͘ hiah-ê忠于他ê子民有一个新ê生活环境。Chit段经文谈起上帝赐福他ê子民tī耶路撒冷享受特别ê救恩,相对tī in受掠tī巴比伦ê生活,两个之间有差大码。

第12到13节,chia讲上帝beh赏赐hō͘耶路撒冷「久长繁荣」,并且「万国ê财富会亲像川流不息ê溪水」。这是因为古代社会有一个观点:财富是一个人荣耀ê记号,m̄-nā表示能力,mā表示上天ê赐福。Koh讲,先知以赛亚mā用像「老母亲自喂奶ê gín-á」来形容性命siōng大ê安全,就是án-ne。上帝beh「tī耶路撒冷安慰」以色列人民,「像老母安慰家己ê gín-á」,譬喻上帝对他子民有极大ê疼kah关心保护,ná亲像老母看tio̍h受伤ê gín-á teh啼哭,hō͘ in安慰kah鼓励。

第14节,chit节是第12到13节ê结语,当大家看见chit种景况ê时,就会知影he是上帝伸手扶持他ê子民,chit时,上帝ê子民必定会「欢欣快乐」、「健康兴盛」等,同时,上帝mā会出手惩罚hiah-ê弃sak上帝、对敌上帝ê人。

第15到16节,「上主beh带火来」,chia ê「火」代表上帝ê忿怒。上帝mā会用「火kah剑」,进行审判ê工作,惩罚hiah-ê惹他忿怒ê人。Á他ê审判速度极快ná亲像「骑tī旋风ê翼股」,人绝对无法度逃离。

第17到18节,chit两节是继续第15到16节所提起ê关系上帝审判ê情景。所谓「行异教洁净仪式ê人」,是teh指tī礼仪上并无忠实地谨守上帝规定ê人。上帝清楚「知影in ê心思kah行为」,因为án-ne,上帝会「召集万国ê人民」,进行公开ê审判,hō͘所有ê人lóng清楚知影上帝ê忿怒(参考以赛亚书四十三:9、四十五:20)。

第19节,chia真清楚提起惩罚hiah-ê大国ê统治者kah人民ê,就是上帝。因为他chiah是真正ê主宰。除了惩罚悖逆ê子民外,上帝mā会「留落来一kóa人」、「残存ê人」,以及「劫后余生」ê人等,上帝beh留落来chiah-ê人当做新ê子民(参考列王记上十九:18)。Chiah-ê留落来ê子民会成做上帝忠实ê奴仆,被差派到「各国kah遥远ê所在去」见证上帝ê救恩。上帝beh差派chiah-ê人到「从来无人听见过」上帝ê名ê所在,mā就是偶像神明崇拜非常兴盛ê所在。Chiah-ê地方包括:

「伊施」,这是teh指chit-má ê西班牙。设tī地中海另外一端,是当时航行被看做siōng遥远ê港口。

「利比亚」,tī希伯来文是用「普勒」Chit-ê名称,设tī埃及ê西边。

「以善射出名ê吕底亚」,chit所在设tī小亚细亚中西部。特别指出是「善射出名」,表示hia ê人真会使用武器,到hia去传扬上帝ê荣耀ê时,若小khóa无注意,真可能tùi án-ne hō͘家己ê性命受tio̍h威胁。

「土巴」,雅弗后代ê kiáⁿ孙(参考创世记十:2),通常lóng会kah「米设」连做伙(参考以西结书三十九:1,chit节讲in ê统治者是歌革,而这歌革是teh指邪恶ê势力(参考启示录二十:8)。

第20到21节,chiah-ê hō͘上帝差派出去传扬上帝ê权能kah奇妙作为ê人「tńg来」ê时,lóng会带hiah-ê受掠卖到各地去做奴隶ê「同胞」tńg来。Chia mā讲chiah-ê同胞tńg来ê时,并m̄是用奴隶之身,却是带荣耀、体面ê样式。因为in lóng是「骑tio̍h马、骡、骆驼,坐战车kah货车」到敬拜上帝ê「圣山」,chiah-ê交通工具lóng是当时ê人所使用ê交通工具,表示所有想beh到耶路撒冷锡安山顶献上感谢祭ê人,是想beh尽了所有ê办法,只要ē-tàng用ê交通工具lóng会采用。

另外一方面mā teh表示回归故乡ê人真chē,有来自各种无仝文化ê地区,甚至mā包括含了外族人在内(参考五十六:8)。因为chit-ê缘故,tī chiah-ê回乡同胞中,mā有kóa是外族人,却被按立为祭司,ná亲像利未人仝款,thang参与献祭ê工作。

第22到23节,chit-ê上帝所重新创造ê新世界来临ê时,就是永恒ê临到,所有尊崇上帝ê子民tī「每月ê初一kah安息日」lóng会聚集「到耶路撒冷来敬拜」上帝,包括「各国ê人民」,mā lóng会到耶路撒冷来敬拜上帝。换句话讲,耶路撒冷就是一个新ê时代,kah过去完全无相仝。

第24节,chit节作为以赛亚书ê总结尾。Chit节讲出背叛上帝者最后ê结果,kah hiah-ê坚守kah上帝ê约ê子民,完全颠倒。Chit句话表示hiah-ê因为背叛上帝而受tio̍h严厉惩罚ê人,连死后lóng无法度埋葬,而暴露tī外面hō͘人看见死状。Tī chit种人虽死iáu-koh beh受苦,身上会有「虫永远bē死」以及「火永远bē熄灭」。

重新查询 专卷研经 以赛亚书系列
错误回报,请联系comm[@]fhl.net