以赛亚书 6章1节 到 6章13节   背景资料  上一笔  下一笔
Chit章thang看tio̍h先知被上帝呼召是一件真痛苦ê事,ná亲像摩西被上帝拣选ê时是一再chhōe藉口推辞,无愿意接受上帝ê拣选。先知耶利米mā是一再chhōe理由来说明家己ê无能、口拙。

chit-má先知以赛亚mā是án-ne表示,伊讲家己是「无清气」,因为án-ne无适合当上帝ê奴仆。
第1节,「乌西雅王往生ê hit年」,he是tī主前792年,伊续接老父亚玛谢成做南国犹大ê王,在位共计长到52年,直到主前740年往生。有关乌西雅王ê一生作为,tī历代志下第廿六章有比较khah详细ê绍介。

先知以赛亚讲伊就是tī乌西雅王继承王位ê hit年,看见上帝hō͘伊ê「异象」,受呼召而成为先知出来传讲上帝ê信息。

第2节,chit节描绘出先知以赛亚所看见ê异象,就是tī上帝身边有「天使撒拉弗khiā teh服侍」,而且「每一个天使lóng有六个翼股」,chia并无说明到底有几个天使,m̄-koh tī第3节用复数名词「in」来说明ê撒拉弗天使有真chē位。然后天使有「六个翼股」,是三对ê意思。其中有两个翼股遮「面」,可能是因为上帝ê荣光极大,若是无得tio̍h上帝ê允准,连天使mā bē-tàng直视上帝ê荣耀(参考出埃及记三十三:18—23)。另外两个翼股用来遮「身躯」,这可能是因为天使lóng是赤身露体。每pái in ài面对上帝ê时,就一定tio̍h遮身躯(特别是teh指下体来讲),这mā含意tio̍h「谦卑」。M̄-koh另外有一个讲法,就是chia ê「身躯」mā是teh指「脚」(参考中文《和合本》ê译文),表示chiah-ê天使bē-tàng跟tòe家己ê意思去行动,却是被差遣ê时,chiah会phah开chit对翼股,飞到上帝ài in去ê所在(参考以赛亚书五十二:7)。Iáu有一对翼股是用来「飞翔」,这mā隐喻tio̍h天使ê行动非常紧,ná亲像用飞ê一般。Tī启示录第十四章6节mā讲天使是会飞ê,这可能就是因为in身上有翼股pah。

第3节,这简短ê诗歌,表达上帝ê三个特性。

「圣哉」,连续三pái用chit-ê词,这teh表示siōng koân级形容词,意思是上帝ê神圣ê绝对,是无任何人á是其它神明ē-tàng媲美ê。「万军ê统帅」,这是上帝ê气力,ná亲像千军万马一般ê勇猛,无法度thang挡。Á「荣耀充满全地」Chit句表示无任何一个光体thang遮盖过上帝ê荣光(参考民数记十四:21,诗篇七十二:19)。

第4节,chiah-ê撒拉弗歌颂上帝ê声音非常响亮,足以「震动了圣殿ê地基」。    m̄-koh mā有另外一种看法,就是撒拉弗chit种震撼大地ê声音,kah圣殿出现烟雾,lóng是teh表示上帝ê临在。

第5节,这mā是先知以赛看tio̍h chit种情形了后,第一个反应就是认为家己必定会「死」。伊讲连家己ê嘴「lóng无清气」,而且「周围ê人」lóng kah伊仝款。这「周围ê人」指ê就是南国犹大人民ê意思。这表示伊m̄-nā担心家己会hō͘上帝神圣ê震怒、审判来死,伊mā担心家己ê同胞仝款会遇tio̍h仝款ê结果。因为án-ne,伊用chit种方式表示认罪ê态度。伊甚至表明家己ê罪koh khah重,因为伊是「亲目看见了君王—上主、万军ê统帅」。这mā是圣经时代ê观念,in认为只要是亲目看见上帝ê面,必死无疑(参考出埃及记三十三:20)。除非有上帝特别ê怜悯才能免除死亡。

第6到7节,天使撒拉弗掌管tio̍h「火焰」。因为án-ne,chit位天使夹了一块tī祭坛上烧红ê「炭」「碰」触先知以赛亚ê「嘴唇」。这是一种象徵性ê笔法,表明此炭火是圣洁、净化过,而且是纯洁ê,有含赎罪、挽tńg来、赦免ê功用。Koh khah重要ê,火是代表有上帝能力ê同在。这mā teh表示「分别为圣」ê意思。这是因为先知以赛亚讲伊「嘴里ê每一句话lóng无清气」,上帝用chit种方式洁净伊,thang hō͘伊传出上帝神圣ê信息来净化人ê心灵。

第8节,当先知以赛亚被上帝用「火烧tio̍h ê炭」洁净了后,表示上帝已经完全赦免、怜悯先知以赛亚,就出声呼召伊。Chia发言ê是上帝,m̄-koh却用「咱」,这tī旧约圣经中一再出现,亲像创世记第一章26节,用「咱」,表示伟大ê创造者上帝。Koh讲,「咱」mā有ná亲像天庭开会议ê背景,说明上帝teh主持会议,然后问有甚么人愿意为「咱」,这「咱」代表「天庭」ê会议(参考创世记十一:7,耶利米书廿三:18、22)。另外,用「咱」Chit-ê词,m̄-nā是上帝而已,mā包括侍候tī上帝身边ê众天使(参考列王记上廿二:19—20),然后上帝会teh-beh采取ê行动,叫他ê奴仆—天使去执行(参考阿摩司书三:7)。

「我去!请差遣我!」这是先知以赛亚回应上帝赦免伊ê疼,siōng具体ê方式,主动愿意为上帝做见证、传达信息。

第9到10节,chit两节被新约圣经kúi-nā pái引用(参考马太福音十三:14—15,马可福音四:12,路加福音八:10,约翰福音十二:39—41,使徒行传廿八:26—27,罗马书十一:7—10)。其实chit两节是反讽ê句话,teh kā先知以赛亚讲,以色列人民并m̄是真正想beh听上帝ê信息,因为in lóng心无tī焉,所以,就算in听,mā bē明白;看了,mā bē了解。这mā teh表示in其实并无想beh听从上帝ê话,hō͘心内ē-tàng洁净。

第11到12节,先知以赛亚希望ē-tàng争取koh khah chē ê机会kah时间,因为án-ne,伊问上帝「chit种情形tio̍h jōa久?」上帝ê回答真清楚,就是等到城市全lóng成做废墟,mā就是大灾难临到ê时,in chiah会醒悟过来。这大灾难就是包括人民hông掠去做奴隶ê hit工。

第13节,「十个人中iáu chhun落来一个人」,意思是teh指chhun落来十分之一,kah第五章10节ê讲法真接近。Chit句话mā teh表示上帝虽然忿怒到极点,m̄-koh却iáu会施怜悯hō͘ in,留落来残余ê子民,ná亲像留落来「橡树」ê残干仝款,ē-tàng koh再发出新芽来。Chit种观念一再出现tī旧约圣经中,ná亲像第四章2节所提起ê「残存ê人民」是上帝特别保存落来ê(参考列王记上十九:18)。

重新查询 专卷研经 以赛亚书系列
错误回报,请联系comm[@]fhl.net