以赛亚书 59章9节 到 59章21节   背景资料  上一笔  下一笔
前段经文描述先知以赛亚明确指出以色列人民所犯ê罪过,而chit-má chit段经文则真类似哀歌一般,以色列人民已经体验tio̍h家己ê罪过,kah因为罪而感受tio̍h性命ê脆弱、无力感。Ná亲像大卫tī诗歌中所陈述家己痛悔之心意仝款(参考诗篇第五十一篇)。像chit种承认家己ê过犯,mā等于是teh祈求上帝ê怜悯仝款。

第9节,tùi chit节开始,一再出现「公平」、「公义」这用词(参考第9节、第11节、第14节、第15节、第17节)。Chit两个词lóng是teh指上帝ê形像,mā是他拯救ê疼。chit-má以色列人民感受tio̍h in因为欠缺这两项,因为án-ne,in无法度看tio̍h「光明」kah「亮光」。

第10到11节,chit两节讲以色列人民ná亲像「像盲人摸索」,看bē-tio̍h脚前ê绊脚石,因为án-ne,行路常跋倒、受伤,即使tī大日时头mā仝款无安全。In过去无公平对待弱势者,taⁿ换家己「渴望公平」临到身上,m̄-koh即使亲像熊仝款发出大声ê「号叫」,á是软弱到像「粉鸟哀鸣」一般ê haiⁿ-haiⁿ叫,「却得bē-tio̍h」公平。说明性命已经lóng无希望。

第12到15节,chit两节lóng是以色列人民teh表明忏悔ê态度。Thang参考耶利米书第十四章7到9节。In承认家己所犯ê过错,包括「作恶多端」、「违抗」上帝ê旨意、「弃绝」上帝,进一步koh「压迫别人」,而且有「谬误」ê思想,以及满口「白贼」等等。因为án-ne,tī in中间已经无法度chhōe-tio̍h「正义」、「公理」、「真理」、「公道」等代表上帝ê形像。Chhōe bē-tio̍h chiah-ê,等于chhōe bē-tio̍h性命ê ǹg望。这mā说明in处tī一个失去公平、正义,却颠颠倒是非ê社会。Chit种社会,pháiⁿ人真嚣张,连好人mā受in ê「欺负」。因为án-ne,上帝「看tio̍h这一切」,一定会「不悦」、受气、忿怒,tòe后就会采取惩罚ê行动。

第16到18节,chit三节先知以赛亚讲tio̍h上帝看见他ê子民恶质ê行踏,绝对bē袖手旁观。他一定会采取行动。Tī chia,上帝「惊kah gāng去竟然无人帮助被欺压ê人」,他一定会伸手救助hiah-ê受tio̍h无公义对待kah欺压ê人,hō͘ chiah-ê人「得胜」(参考以赛亚书四十五:8)。先知以赛亚tī chia用一种拟人化ê笔法,讲上帝beh用「公义作铠甲」,以「胜利作头盔」,续落来是「报复作衫裤」,然后用「热情作外袍」来进行他ê拯救kah惩罚。Chia ê「头盔」是军人保护头部ê护具,而chia ê「胜利」是一种荣耀ê象徵,「报复」是惩罚ê意思,「热情」,表示对性命ê疼惜、烧热爱。人无法度逃离上帝报复ê行动就算是bih-tī偏远地区mā仝款。

第19节,「大水」、「旋风」,chiah-ê lóng是当时ê人所惊惶ê气力。当上帝进行审判ê时,人人看见lóng会心生惊惶。

第20节,chit节thang参考以赛亚书第一章27节。上帝拯救ê恩典,m̄是一种廉价ê,却是有代价ê。Chit种相对代价,就是「弃sak罪恶ê人」才能享受,继续做恶事ê人是得bē-tio̍h ê。

第21节,chit节thang参考第四十二章6节,耶利米书第三十一章31到34节。

Chia讲上帝beh「亲自kah lín立约」,这是因为人已经弃sak罪恶,重新tńg来到上帝面前,上帝会用怜悯、赦免ê疼,kah chit种子民重新立约。立约,mā teh表明上帝拣选出来ê族群,上帝必定会拯救in。Mā特别劝勉in一定会「服从」上帝,甚至「kiáⁿ孙世世代代lóng服从」上帝,这是回应上帝立约之爱ê基本态度。

重新查询 专卷研经 以赛亚书系列
错误回报,请联系comm[@]fhl.net