以赛亚书 58章1节 到 58章14节   背景资料  上一笔  下一笔
Chit章koh一pái指出以色列人民之所以恨沦落为巴比伦ê奴隶,是因为in真正弃sak了上帝,无kā上帝khǹg tī in眼内,甚至用虚假ê态度敬拜上帝。Chit种虚假ê敬拜,等于是teh亵渎上帝ê神圣仝款严重。Koh讲,tī chit章中,mā koh一pái提起kui个先知运动中共同ê信息,就是一个会真实遵行上帝旨意ê人,必定会知影用仝款真实ê心建立kah别人之间ê关系。换句话讲,真实ê宗教信仰,应该kah社会生活连成一体,却m̄是分开ê。

第1节,「你tio̍h大声叫,像号角hit种响亮」,chit句话已经清楚表示,上帝ài先知以赛亚公开而且严厉责备以色列人民,beh严厉指出in ê「罪状」,就是背叛上帝ê教示、旨意。

第2节,chit节指出以色列人民并m̄是真正认bat上帝。Koh khah严重ê是,in表面上看起来是「ta̍k工敬拜」上帝,看起来kah-ná「欢喜知影」上帝ê「道路」(话语),m̄-koh事实上并m̄是án-ne,表现出来ê只不过是虚假面貌而已。

第3节,chit节thang参考玛拉基书第三章14到15节。先知以赛亚清楚指出以色列人民真正ê问题所在,就是只做到表面功夫。包括in禁食ê用意mā是仝款,lóng是有目的ê,beh hō͘人看见,á是想beh kah上帝讨价ê。因为án-ne,上帝指出in「一边禁食,一边做家己想beh做ê事」,iáu会「欺压工人」,chit种态度mā是teh藐视上帝ê神圣。注意chia ê「工人」,是teh指Tī痛苦中劳苦工作,m̄-nā酬劳真低,工作ê时间koh真长,真亲像奴工仝款。

因为「禁食」原本是一种自卑ê表示,to̍h是tī上帝面前àⁿ头ê意思。因为án-ne,禁食ê基本态度应该是tùi真实谦卑、认罪ê心开始。若是无忏悔、谦卑ê心,即使禁食真久,mā是枉然。Á是想用禁食hō͘上帝欢喜,ná koh khah是错误ê思想,kah无正确ê信仰认知(参考以赛亚书五十八:3—9)。

第4到5节讲tio̍h以色列人民jú「禁食」,心性却是「koh khah凶暴」,甚至出现「吵闹、phah架」等行为,这表示in完全听bē落去上帝ê话。原本禁食应该是hō͘人koh khah谦卑、认罪,表示就án-ne愿意遵行上帝ê旨意chiah-tio̍h,m̄-koh chit-má表现出来ê tú好颠倒。有ê人是禁食是为tio̍h beh hō͘别人看见。就án-ne用「虐待家己,垂头丧气」,看起来kah-ná是禁食真久,无食饭,致使全身lóng无元气ê样式,ná亲像teh要「凋谢ê花朵」。甚至是「tī土脚铺麻布,掖灰」,hō͘人看起来kah-ná真正是teh忏悔、认罪,其实,心内并m̄是án-ne。上帝真清楚人ê心思意念。因为án-ne,chit种虚有ê外表,只有ē-tàng欺骗人ê眼目而已,m̄-koh无法度瞒过上帝,因为他会鉴察人ê心内意念。

第6到7节,chit两节讲出kah头前第3到5节颠倒ê态度。Chit两节讲tio̍h上帝beh ê禁食,是「解除欺压ê锁链」,这是teh指不ài tī欺压工人、箝制工人。然后ài kā「食物分hō͘ iau饿ê人」,hō͘「无家可归ê sàn-chhiah人」thang有厝thang过瞑,hō͘ hiah-ê「赤身露体ê人」有「衫裤」穿,并且「m̄-thang拒绝求助无门ê人」,chiah-ê lóng明确指出对贫困者ê怜悯tio̍h用实际行动来表达。

第8到9节a句,如果上帝ê子民chiâⁿ实照第6到7节所记载去做了后,上帝讲一定会得tio̍h chit种结果:一是上帝会「欢喜」并欢喜接纳in;二是会亲像「晨曦hit种照耀」in,表示有性命ê ǹg望出现;三是in ê「创伤就ē-tàng马上得tio̍h医」;四是上帝会「随时搭救」;五是只要in「祈祷」,上帝一定会「应允」,垂听in ê「呼求」。

第9节b句到10节,chit段经文是继续上帝对in实践他ê旨意之应允。包括有:一是「停止欺压」、「指责人」,这是teh指当众侮辱伊人ê意。Chit款tāi-chì情不时发生tī有权势ê人身上,in时常会用自高á是藐视ê方式指责比伊势力弱小者。不「毁谤人」是teh指做假见证陷害别人。二是in果然真正会「hō͘ iau饿ê人食」,hō͘「穷困ê人得满足」,注意chia ê穷困,包括第7节ê「无家可归ê sàn-chhiah人」,以及「the̍h衫裤hō͘赤身露体ê人」等,上帝kā会hō͘ in生活中所tú-tio̍h ê性命困境得tio̍h解除。

第11到12节,chit两节是teh回应第9到10节所提起ê「假使」。若是以色列人民chiâⁿ实kā第9到10节所讲ê恶质行为排除掉,就会得tio̍h上帝ê应允。上帝会「引chhōa」in。Án-ne,in就bē受tio̍h敌人ê侵犯。因为有上帝带领,必定bē有缺乏,会有「美物满足」in ê需要,即使「tī炕旱中」,也ē-tàng「得滋润」、「水源充足」,会有「永远bē干涸ê泉水」tī in khiā起ê土地顶面,in m̄免担心发生饥荒。因为án-ne,in ē-tàng「tī废墟重新建造」,「tī本来ê根基上复兴」,chit-ê意思是teh指过去遇tio̍h摧残ê家园,会得tio̍h重建家园ê能力,hō͘ in脱离奴隶ê生活,重获自由。

第13到14节,koh一pái重新强调遵守安息日ê重要性。因为安息日是上帝看做神圣ê日子,会遵守安息日ê人,mā表示kā家己分别出来,作神圣上帝ê子民。Chit种人必定会得tio̍h上帝赐福,上帝怎样赐福tī以色列人民祖先,mā会仝款赐福tī in chit-ê代子民身上。Chia提起几件事:包括不「做私事」,因为tī安息日做私事,tú好teh表示chit种人根本就无kā上帝看做重要,却是kā家己看做性命ê中心。Koh讲,这「做私事」mā有另外一个含意,是teh指放纵情欲。二是不tī安息日「旅行」,表示bē记得上帝,去游sńg作乐。三是不「工作」,表示m̄做seng-lí、thàn钱。这mā是先知耶利米传达上帝ê话ài in停止ê行踏(参考耶利米书十七:19—27)。四是不「讲闲话」,thang参考申命记第十八章20节,意思指假借上帝ê名义发言,讲不诚实ê话,chit种行为等于kā家己ê话当做是上帝ê话,chit种人ná亲像假先知仝款。因为,tī安息日应该传达ê是上帝ê信息,m̄是个人ê想法á是话语。

若是chiâⁿ实确实án-ne遵行安息日ê规定,上帝一定会有回应,包括赏赐「喜乐」,这表示有上帝ê赐福tī性命中,ná亲像干旱ê土地有甘霖滋润(参考第11节)。Hō͘ in「在世间四界受尊重」,并无koh沦为亡国ê子民,受统治者ê轻视、唾弃。却是thang tī世人面前昂首阔步,tī上帝所赏赐ê土地顶面「享安乐」,这是teh指bē有外族、列强来侵犯,thang tī家己ê土地顶面安居乐业。

重新查询 专卷研经 以赛亚书系列
错误回报,请联系comm[@]fhl.net