以赛亚书 57章1节 到 57章13节   背景资料  上一笔  下一笔
Chit章真真明显分做两个部分;第一段是tùi第1到13节,chit段经文清楚指出回乡ê以色列人民,in ê生活态度并无改变做上帝欢喜ê样式,可能是in teh beh tī巴比伦崇拜ê偶像神明带tńg来故乡,甚至tī道德生活规范上放荡不羁,iáu想beh隐藏所犯ê过错。上帝koh一pái透过先知ê警戒,hō͘ in知影,只有óa靠chit位带领in离开奴隶之地ê上帝,chiah是in永远生存落去ê途径。第二段是tùi第14到21节,Tī chit段经文中,先知ê信息koh一pái传出上帝怜悯、慈悲ê疼。虽然以色列人民中间,有kóa人是亲像第一段所叙述ê hit种m̄知悔改,m̄-koh上帝并无因为án-ne就放弃in,iáu是继续劝勉in,只要in彻底悔改,上帝一定会医in,赦免in所犯ê过错。Ná亲像tī第五十六章6到7节所提起ê,tio̍h趁上帝iáu thang靠近ê时chūn,tńg来chhōe上帝。

为甚么chiah-ê以色列人民回乡了后,生活就真紧koh堕落了?原因之一可能是in回乡后,真紧to̍h受tio̍h hiah-ê khiā起tī in土地顶面ê外族人,á是已经弃sak上帝ê人ê影响。另外一种可能,就是hiah-ê留tī巴勒斯坦故乡kah外族通婚,á是寄居tī巴勒斯坦ê外族人,in mā有人知影耶和华上帝ê信仰,m̄-koh并无真确认bat,in只学tio̍h一kóa祭祀礼仪kah虚有其表ê信仰。M̄-koh chiah-ê人已经形成一个有力ê团体,对chiah-ê tú tùi巴比伦tńg来ê以色列人民,采取剥削、欺压ê态度,这hō͘先知以赛亚非常忿怒,伊koh一pái传出上帝忿怒ê信息,指出in错误ê行为。因为án-ne,chit段经文ná亲像第四十一章1到7节,á是第四十三章8到13节ê信息仝款,提醒chit群放荡不羁ê人民,tio̍h认清真正主宰历史ê是耶和华神圣ê上帝;他是创造ê主,mā是性命ê主宰。Bē记得上帝,只是为家己带来死亡,m̄-koh若归向他,就有性命。

这是一段teh谴责以色列人民ê信息。先知以赛亚真清楚指出以色列人民并无因为亡国被掠到巴比伦做奴隶,有警诫、真心悔改ê意思,反tńg koh一pái去拜偶像神明。因为án-ne,先知传出严厉ê信息,谴责以色列人民kā拯救并带领in tńg去故乡ê上帝hō͘遗bē记得。

Koh讲,Tī chit段经文中,先知以赛亚传出ê信息除了谴责以色列人民弃sak上帝外,mā同时kā伊谴责in用不公平ê手段对待家己ê同胞,hō͘ hiah-ê虔诚ê人、好人、行为正直ê人仝款tú-tio̍h到迫害,m̄-koh上帝会看顾、接纳chiah-ê被迫害ê人。

第1到2节,「好人死去」,所谓「好人」指ê是kah上帝保持和好、亲密关系ê「义人」,kah「虔诚人」ê意思仝款,lóng是teh指对上帝忠实ê人。Chia讲chit种人往生反tńg是一件好事,至少in thang「避免将来ê祸患」,因为上帝会hō͘ chiah-ê人享受「平安」ná亲像「行为正直ê人「因死而得安息」仝款。

第3到4节,「罪人应该来受审判」,圣经提起「罪人」,是teh指拒绝承认上帝是创造主、神圣、拯救者,是kā家己当做kah上帝同等ê人,chit种人kah狂傲者仝款(参考诗篇十四:1)。先知以赛亚强调chiah-ê狂傲ê人,并无比「巫师」、「奸夫」、「妓女」等等chiah-ê人好,因为仝款lóng是做上帝所讨厌ê事。

第5到6节,chiah-ê弃sak上帝ê狂傲者,会「tī绿树下行淫」、「崇拜繁殖ê神明」,并且「tī山谷洞穴中kā家己ê gín-á当牲祭献上」等,chiah-ê行踏看起来kah-ná真隐密,m̄-koh上帝却非常清楚,一定会严厉惩罚in。Chia提起用「光滑ê石头当神明」,意思是teh指欺骗、不诚实ê意思。Á「石头」表示愚昧,无反应。意思是teh指chit种神明是虚假ê、不实在ê,对信众ê祈求bē有任何反应。

第7到8节,「高山」,kah第5节ê「山谷洞穴」连结起来,表示整座山丘lóng充满tio̍h chiah-ê虚假ê神明庙宇。为tio̍h beh获取koh khah chē财富,甚至利用崇拜chiah-ê偶像神明有淫乱ê行为。In用chit种方式来「满足家己ê欲望」,chit句话讲出拜偶像真实ê心情,就是为tio̍h beh满足家己ê需要。这就ná亲像妓女仝款,只要有钱thàn,伊愿意kah任何人上床。摩西律法真清楚指出,chit种行为所thàn取ê钱是无清气ê,bē-tàng the̍h来奉献hō͘上帝(参考申命记廿三:17—18)。

第9到10节,这是一种譬喻,表示in为tio̍h拜偶像神明,打扮得非常súi。「摩洛」ê神是迦南地ê神只之一,是属tī「阴间」ê神,据传chit种神明siōng欢喜信徒献儿童为祭品。经文中记载in hō͘尽气力希望透过各式各种ê礼仪崇拜得tio̍h拯救,甚至烧献孩童hō͘ chiah-ê神明,mā是枉然,原因真简单,chiah-ê lóng是虚假ê神明,根本就bē回应人ê任何问题kah需要。

第11到13节,先知以赛亚传出上帝对以色列人民弃sak他ê感叹,所使用ê词句lóng是一种譬喻ê方式。表明以色列人民kah上帝之间ê关系破裂,已经到à一定tio̍h开庭审判ê时chūn,mā只有án-ne chiah会唤醒以色列人民。这几节mā表示上帝已经容忍到极点,而以色列人民则相对ê放荡到目无法度纪。Chia指出以色列人民对上帝「讲白贼」,上帝teh问以色列人民,in到底惊ê是甚么?若无ná会对上帝讲白贼?上帝mā问in是m̄是因为in感觉上帝对in chit种拜偶像行为无随时ê反应,认为上帝「久长缄默」,就表示默许in ê行为是正确?既然án-ne,上帝就放任以色列人民去期望in所崇拜ê hiah-ê假神会来救in了,上帝bē koh再chhap in,m̄-koh hiah-ê对他忠心ê人,上帝一定会保存in ê性命,hō͘ in继续生活tī「chit块土地顶面」,并且接受in ê「敬拜」。

重新查询 专卷研经 以赛亚书系列
错误回报,请联系comm[@]fhl.net