以赛亚书 54章1节 到 54章10节   背景资料  上一笔  下一笔
第五十四到五十五chit两章是第二ê时期以赛亚书(mā就是tùi第四十到五十五章)ê结尾。有kóa学者认为chit两章是chit段经文ê「附录」,主要teh说明一个新时代teh beh来临。因为án-ne,Tī chit段经文中充满tio̍h喜乐、ǹg望,kah前段受难奴仆ê诗歌真无仝款。Koh讲,chit两章经文mā说明一个重要认bat:虽然波斯帝国hō͘上帝拣选做奴仆,beh执行ê任务是释放以色列人民tńg去故乡,并且协助in重建家园。M̄-koh真正ē-tàng hō͘以色列人民复兴起来,而且恢复过去荣耀ê是上帝。

Tùi chit章thang看tio̍h一个重要主题:平安。Chit-ê主题mā是每一个时代ê人民所烧热切期待得tio̍h ê福气。真正平安是tùi上帝来,m̄是用人靠家己ê气力ē-tàng得tio̍h。

Chit段经文用夫妻ê关系做譬喻,说明上帝kah以色列民族之间ê关系。诗人特别强调上帝并无永远遗弃以色列人民,却是「暂时」ê。因为以色列人民bat背叛上帝,上帝用chit种方式惩罚in,m̄-koh上帝永远深teh疼以色列人民。

第1节,使徒保罗tī加拉太书第四章26到27节引用chit节经文。

Chia讲以色列人民就「ná准无法度生育ê cha-bó͘-gín-á」,表示是一件极大ê见笑。「m̄-koh chit-má」已经完全无仝,原本离开ê丈夫tńg来到伊ê身边,因为án-ne伊发出「歌唱」、「欢呼」ê声音。

第2到3节,thang参考第四十九章19节。

Chit句「扩张你khiā起ê帐棚」,是teh形容以色列人民tńg去故乡了后,khiā起kah活动领域会扩大(参考四十九:20)。Koh讲mā表示人口会增加,kah第1节所讲ê「生养koh khah chē」仝款ê意思。因为人口chē,所以一定tio̍h「giú长帐棚ê索á」,表示帐棚jú来jú大,mā说明上帝赏赐hō͘回乡了后ê以色列人民,koh khah有性命力kah活动力,生活ê环境khah美好。虽然chit-má是hō͘波斯帝国塞鲁士统治,以色列人民却「tio̍h回归故土」,而且重新繁荣起来,hō͘过去长到五十年之久,早已经「荒芜ê城镇」,koh一pái「人烟稠密」。
 
第4到5节,参考第四十四章2节a句、第四十六章4节、第廿六章20节。

过去因为被俘虏到异国去做奴隶是件见笑ê事。M̄-koh chit-má上帝已经赦免in,beh重新kah in同在。上帝kah以色列人民重新恢复夫妻ê关系。

第6到8节,chia koh一pái用夫妻关系来比并,说明上帝beh「娶」以色列人民tńg来,并且重新立约。过去上帝会「暂时离开」in,是因为in家己弃sak上帝,并m̄是上帝弃sak in。Koh讲,这「暂时」是teh表示目nih-á ê惩罚。M̄-koh上帝对以色列民族ê疼「却是永久」ê,chit点mā是圣经ê主轴信息。

第9到10节,thang参考创世记第八章21节。Chia引用上帝对挪亚ê应允,他beh koh一pái hō͘以色列人民一个重大应允—无koh向以色列人民「受气」,这是极大ê恩典,mā表示上帝对以色列人民有极大ê赦免、怜悯,无koh计较in所犯ê罪(参考十二:1、四十:2)。上帝beh重新kah以色列人民立「平安ê约」,chit-ê约表明出来ê疼「永远bē摇动」。

重新查询 专卷研经 以赛亚书系列
错误回报,请联系comm[@]fhl.net