以赛亚书 50章1节 到 50章11节   背景资料  上一笔  下一笔
Chit章ê诗歌是用两种当时ê人lóng清楚ê观念来譬喻上帝kah以色列人之间ê关系,就是夫妻关系以及畜养奴隶ê制度作为教导。以色列人民一直kā上帝kah in民族之间ê关系,譬喻成夫妻。上帝是「丈夫」;以色列民族是上帝ê「bó͘」(参考以西结书十六:8)。虽然以色列人民一再背叛「丈夫」上帝,m̄-koh chit位慈悲ê上帝(丈夫)却一直是深teh疼kah他立约ê以色列人民(bó͘),这是kui本圣经提供一个重要观念:上帝kah他立约ê子民有永远bē-tàng磨灭ê性命,ná亲像夫妻连结成一体之关系。

Koh讲,古代社会有蓄奴ê制度kah风俗。以色列人民tī战败了后,被贩卖á是受掠为奴。M̄-koh上帝却伸出救援ê手救助in,他ài kā chiah-ê被卖为奴ê子民救赎回来,hō͘ in重新活tī有自由、有尊严ê环境下。

Chit章ē-sái讲是继续第四十九章所提起上帝会拯救以色列人民ê应允,上帝beh kā in tùi敌人巴比伦帝国手中拯救出来。M̄-koh ná亲像头前所提起过ê,chit件大好消息tī以色列人民中流传开来后,出现出两种声音:一是以色列人民中间iáu是有人继续án-ne问:上帝为甚么tī以前hiat-ka̍k了in?二是上帝kám chiâⁿ实会伸手救助in脱离奴役in ê人ê手?Chit位既是诗人mā是先知ê以赛亚则持守tio̍h一贯ê理念:上帝一定会赎回in。因为以色列人民是他亲自拣选ê子民,而且是kah他立约ê人民。

第1到3节,chit三节ē-sái讲是一种隐喻ê方式,teh说明以色列人民会hō͘外族人俘虏去做奴隶ê主要原因是in弃sak了上帝,并m̄是上帝hiat-ka̍k in。

Ná亲像头前所提起ê,以色列人民tī奴役ê痛苦生活中,第一件想tio̍h ê事是认为上帝「赶走」in。Chia ê「赶走lín ê老母」kah「hō͘她休书」所beh表达ê意思lóng是teh指「离婚」。M̄-koh上帝提出反问「休书tī tó位」,表示无这tńg来事。Koh讲,in认为会hông掠去做奴隶,kah-ná hō͘上帝hō͘卖仝款,上帝tī chia问以色列人民,「究竟是卖hō͘ toh一个」。上帝强调in会沦落成做奴隶,是因为in ê罪故。续落来上帝真清楚表达ê信息是:为甚么以色列人民怀疑上帝拯救in ê能力?「为甚么无人」回应上帝呼喊ê声音?这是上帝提出ê反问,kám讲以色列人民iáu teh怀疑上帝ê能力?只要看过去上帝带领in祖先出埃及ê各种神迹,就会清楚明白上帝ê大能(参考参考出埃及记十:21—29、十二:30)。

第4节,tùi chit节开始到第9节ê chit段ē-sái讲是第二阶段ê先知以赛亚,以赛亚书总共有四首描述上帝奴仆ê诗歌,chit段是第三首,其它诗歌分别tī第四十二章1到4节;第四十九章1到7节;以及第四段是tī第五十二章13到五十三章12节。这四首诗歌lóng有一个特点:上帝ê奴仆是绝对忠实ê。

诗人tī chia开始就讲上帝「教我讲该讲ê话」,chit句话已经清楚讲出上帝奴仆ê使命kah责任,就是忠实tī上帝ê话,ná亲像先知米该雅所讲ê,上帝beh伊讲甚么,伊就讲甚么(参考列王记上廿二:14)。Á伊ê责任是去「安慰忧伤ê人」,为tio̍h án-ne,chit位奴仆每工ài做ê第一件事,就是注意听上帝ê话语。

第5到6节,这奴仆真清楚上帝hō͘伊ê使命,以及伊应尽ê责任。因为án-ne,即使hō͘人「鞭phah」,á是「胡须」被「拔」,甚至被「吐唾沫」tī伊ê「面上」,chit位忠实ê奴仆绝对会「忍受人ê侮辱」,bē「反叛」上帝,mā bē「违背」上帝ê旨意á是命令。

第7到9节,因为伊是上帝所拣选ê奴仆,因为án-ne,任何ê侮辱lóng无法度「伤害」伊,伊有坚忍ê毅力「勇敢忍受一切」,因为真清楚上帝就tī伊ê「身边」,会替伊「伸冤」,而且tī上帝法庭,上帝mā会替伊「辩护」,因为án-ne,伊ē-tàng安然自在,m̄免惊惶。

第10节,chit节真清楚表示「凡是尊重上主、听从伊ê奴仆教示ê人」,无论tú-tio̍h甚么困境,lóng会知影「信靠上主,倚赖上帝」,因为知影上帝bē有看kah-ná无看tio̍h,á是袖手旁观,上帝他绝对会伸手救助,为他忠实ê子民伸冤、辩护。

第11节,讲出kui本圣经提供ê一则信息:上帝是会报应ê神。任何设罗网想beh陷害别人ê人,结果一定是掉进家己所设ê罗网中。

重新查询 专卷研经 以赛亚书系列
错误回报,请联系comm[@]fhl.net