以赛亚书 49章1节 到 49章7节   背景资料  上一笔  下一笔
Tùi第四十九到五十五章是第二时代先知以赛亚信息ê另外一个段落。Tī chit段落中,chit位诗人先知以赛亚提出一个重要ê中心思想:上帝ê奴仆受苦。Ná亲像tī第四十八章16节所记载ê,chit位奴仆真清楚上帝差遣了伊,这tú好回应了第六章8节,当上帝teh呼召人去传他ê信息ê时,chit位奴仆自告奋勇地讲:「我去!请差遣我!」m̄-koh上帝是提醒伊,m̄-thang过度乐观,认为大家一定会听从伊所传讲ê信息。若是会,in早就悔改归向上帝而得医了(参考六:10)。这就是先知耶利米一再向以色列人民提出ê,m̄是上帝m̄-chhap他ê子民,他一再派出奴仆去对以色列人民呼喊,ài in归向上帝,m̄-koh in lóng拒绝听从(参考耶利米书七:13、廿五:4—7、廿六:4—5),甚至后来以色列人民被掠到巴比伦去后,先知耶利米tī伊所写hō͘以色列人民ê书信中,iáu是继续呼吁in tio̍h听从上帝ê话(参考耶利米书廿九:19—20)。

上帝尽忠ê奴仆一定会真忠实地kā上帝ê话传达出来,而上帝ê子民若是遵从,上帝一定会看顾保守。因为án-ne,thang看出kui本圣经有一个中心信息:tio̍h听从上帝ê话,因为上帝ê话语是永远存在,其他ê物件lóng真紧to̍h会消失(参考以赛亚书四十:6—8)。

Chit段经文一直被看做是一首上帝奴仆ê诗歌。有时mā会hông称做以赛亚书中ê第二首奴仆诗歌;第一首是tī第四十二1到4节。Á tī chit第二首诗歌中,koh一pái说明以色列就是上帝ê奴仆,这肯定表明出来:上帝并无弃sak kah他立约ê子民以色列。

第1到3节,chit节强调无论khiā起tī tó位ê以色列人民,一定lóng tio̍h注意听上帝ê呼声(参考以赛亚书廿四:14—15a)。Chia ê「诸海岛ê人!」、「远方ê人!」,lóng teh表示khiā起在世界各地ê海岛人民,就是teh指当时受卖到遥远ê国家、地区去做奴隶ê以色列人民。值得注意ê是chia讲chit位被选召ê奴仆是tī「出世以前」、「未出母胎」就已经被「指名呼唤」了,chit点tī第四十四章1到2节、第四十六章3节等等所在lóng bat提起过。这mā是先知耶利米亲身ê经历(参考耶利米书一:4—5)。Koh讲,上帝选召ê奴仆传达ê信息ná亲像「锐利」ê剑(参考希伯来书四:12)。而且上帝所造ê「锐利ê箭」是「随时thang发射」。这表示上帝选召ê奴仆,上帝会赏赐kā in赐福有完成任务ê能力。上帝bē选召一个人,却hō͘ hit-ê人家己四界摸索。

第4节,chit节是奴仆teh回应上帝ê话。伊虽然是「努力工作,ē-sái讲是lóng无效果」,chit句话mā讲出上帝忠实奴仆出去努力传上帝ê信息,ē-sái讲是hiah-ê人无愿意听从。伊讲「用尽气力,犹原一事无成」,这就真亲像第五十二章13节到第五十三章12节所描述ê hit位受苦之奴仆仝款。不过上帝忠实奴仆并无因为受苦而失去对上帝ê信心,伊深信上帝会为伊「伸冤」,而上帝会照忠实奴仆ê行为来「奖赏」伊。

第5节,thang对照第1节。上帝拣选ê奴仆是真「光荣」ê。Á伊ê气力是tùi上帝来ê赏赐。

第6节,chit节koh一pái说明第5节ê奴仆ê使命,就是beh hō͘人认bat上帝ê救恩,hō͘众人看见上帝拯救ê亮光。这「救恩普及天下」,这就是beh kā上帝ê疼传开来,hō͘ koh khah chē人享受上帝ê救恩。

第7节,chit节浓缩了第五十二章13到第五十三章12节ê中心思想,上帝ê奴仆表面上看起来是受苦难,m̄-koh上帝透过chiah-ê苦难,进行他奇妙ê拯救行动。人看做卑微ê「奴仆」,却是teh代表上帝ê救恩。「上主必持守伊家己ê应允」,chit句话说明上帝ê话一出,事就必定成。因为他是信实ê上帝,所讲ê话,一定会实现。

重新查询 专卷研经 以赛亚书系列
错误回报,请联系comm[@]fhl.net