Chit段经文mā是teh述说上帝审判背逆ê以色列人民，因为in bat óa靠偶像神明。先知mā Tī chit段经文中，koh一pái传出上帝拯救ê信息，强调chit位创造宇宙万物ê上帝，就是惟一ê真神，只有他chiah是拯救者。因为án-ne，呼吁所有上帝ê子民，lóng tio̍h tńg来到chit位拯救者ê面前。

第20到21节，chit两节thang参考第四十一章21到22节。Chia真清楚指出世间所有ê人lóng tio̍h接受上帝ê审判。因为án-ne，上帝ài大家聚集「到法庭来申诉」，上帝beh开庭审判所有背逆ê人。上帝允准任何人向他提出申诉，免得有人呼hoah冤枉枉。上帝koh一pái表明他是「公正、拯救ê上帝」，他「早to̍h预言beh发生ê事」。Chia mā重复两pái「我以外无上帝」，这是此时代ê先知以赛亚ê中间心信息（参考四十三：10、11、四十四：6、8、四十五：5、6、14、18、22、四十六：9、四十八：12）。

第22到25节，上帝透过先知以赛亚hoah出ài「全世界ê人」，lóng归向他。因为他是「真理」ê神，mā是「永bē改变」ê神。这mā表示上帝ê应允，是绝对可靠ê，因为他是创造ê神，他ê话是拯救ê气力。