以赛亚书 42章1节 到 42章13节   背景资料  上一笔  下一笔
第四十二到四十三章lóng有一个非常重要ê主题,是论到以色列人民乃是上帝拣选ê奴仆,ná亲像tī第四十章所提起ê,上帝beh他ê奴仆去传好ê消息hō͘ tī耶路撒冷ê受难子民,然后tī第四十一章提起上帝拣选塞鲁士作为他ê奴仆,兴起伊,去为上帝完成惩罚悖逆子民ê工作。

chit-má第四十二章,koh一pái提起上帝拣选ê奴仆,因为上帝拣选一个民族á是一个人来做他ê奴仆,是beh成做他ê同工,并同齐参与拯救ê工作。因为án-ne,上帝一定会扶持伊、喜爱伊。然后继续tī第四十九章1到6节、第五十章4到9节、第五十二章13到五十三章12节等等lóng有谈论到上帝奴仆ê角色kah使命。

Chit段诗歌有一个重要ê主题,就是上帝拣选他ê奴仆,是beh为上帝tī土脚行正义。作者并无明确讲出chit位「奴仆」是甚么人?m̄-koh tī第四十一章8到9节bat提起「以色列是我ê奴仆」,而且tī第四十三章10节koh一pái提起上帝选以色列作他ê奴仆。M̄-koh tī先知耶利米ê信息中,巴比伦王mā bat经是hō͘上帝拣选出来ê「奴仆」(参考耶利米书廿五:9),用来惩罚背逆ê以色列人民。Á先知以赛亚tī第四十五章1节,则讲上帝拣选塞鲁士「做王」,这mā是teh表明伊就是上帝所拣选ê奴仆。因为án-ne,甚么人是上帝ê奴仆?应该讲是:甚么人实践上帝ê旨意,顺从他ê话语ê教导,chit种人、民族、国家,chiah是上帝所拣选ê奴仆。奴仆绝对不等于主人,koh khah无法度取代主人。

第1节,chia一开始就讲「看ah,我ê奴仆,我扶持伊;我拣选伊,喜爱伊」,类似chit种句型kah耶稣tī约旦河领受行洗礼约翰ê洗礼了后,tùi天顶传下声音ê时所讲ê仝款(参考马可福音一:11)。圣经作者表示上帝所拣选ê奴仆,一定是他所kah意ê对象,这是无庸置疑ê事。因为án-ne,上帝会「扶持」他所拣选ê奴仆,mā会用他ê「灵充满」tī chit被拣选者ê身上。这「灵」字表示「活气」、「风」,ná亲像创世记第一章2节、第二章7节所用ê词仝款。表明是一种特有ê气力,thang完成上帝创造á是拯救ê目标。Á上帝拣选ê奴仆siōng重要ê使命,就是beh「为万国带来正义」,就亲像上帝拣选亚伯拉罕仝款(参考创世记十八:19)。

第2到4节,chit位上帝拣选出来ê奴仆,外表并无起眼,bē引人注意。续落来用「压伤ê芦苇」kah「kā熄ê灯火」来代表hiah-ê受tio̍h压迫,性命受tio̍h极大摧残,hō͘人排挤到社会角落,lóng无生存空间ê边缘人,上帝iáu-koh「不at断」、「不吹灭」in。Chit位被拣选出来ê奴仆,「不失望mā不郁卒」,会继续无停tī土脚「伸张正义」,这是上帝拣选ê奴仆ê使命。

第5节,「上帝创造诸天」,chit句话真重要,mā是信仰告白siōng基本ê一句话。Chia清楚表示上帝是天ê创造者。Chit节ê第二句是上帝「造地kah地上ê一切生物」,结合前句「上帝创造诸天」,就是上帝创造「天地,kah地上ê一切生物」,这mā是创世记第一章6到13节所叙述上帝创造天地ê经过。第三句讲上帝「赐hō͘人性命活气」,chit句话thang参考创世记第一章26节所提起ê「形像」,kah第二章7节ê「性命ê气」。

第6到7节,chit两节一开始,上帝就宣布beh「赐力量」hō͘他所拣选ê奴仆。Ná亲像头前提起过ê,主要用意是beh奴仆「在世间主持公道」,因为上帝就是公义ê。只有án-ne才能彰显上帝ê特性。上帝ê奴仆若是真实地去实践上帝拣选ê使命,就会「成做万国之光」,hō͘生活tī困境中ê hiah-ê人重燃性命ê亮光,ná亲像开启「盲人ê目睭」仝款。Hō͘ hiah-ê受掠ê人ná亲像tùi「被囚」ê「监狱」中行出来仝款得tio̍h释放而看见「光明」。

第8节,「我是上主;耶和华是我ê名」,chit句话thang参考出埃及记第三章15节b句。Chit句话mā是一种宣告,表明ê就是tī这宇宙万物中,只有chit位创造ê神,chiah是真正上帝。上帝绝对不允准虚假ê偶像神明kah他「共享」荣耀,这「荣耀」代表上帝拯救ê恩典(参考以赛亚书五十二:10)。

第9节,表示上帝早已经预定好beh成就ê事,taⁿ已经实现。这表示chit位创造宇宙万物ê上帝,kah其它虚假ê神是完全无仝,这mā是tī以赛亚书第四十一章21到24节所提起ê,hiah-ê虚假ê神,m̄知家己ê未来,mā m̄知家己ê过去。无chit种能力ê神明,就m̄是真正神。

第10到12节,chit段诗歌通常hông称做是普世性ê o-ló诗歌。诗人á是先知以赛亚teh呼吁所有ê人以及一切受造物,lóng同齐来歌颂上帝。诗人呼吁「全世界」所有地上ê国家,包括「海洋kah其中ê生物」,chiah-ê上帝亲自创造ê万有,mā包括tī「海岛kah岛上ê居民」,大家lóng beh同齐来歌颂上帝。

第11节,作者确实是视野真广,tī二千多年前,就thang看tio̍h「海岛kah岛上ê居民」,mā看tio̍h「沙漠kah其中ê城市」lóng有居民khiā起tī中间。虽然ài tī「沙漠」中讨生活真困苦,m̄-koh in mā是「tio̍h高声歌唱」来o-ló上帝。

Chia提起几个城市ê名,包括有「基达」,这是设tī亚giú伯沙漠以北地区,mā是贝度因人ê家园,chia以畜牧业出名(参考以赛亚书六十:7,以西结书廿七:21),当地人以游牧维生khah chē(参考耶利米书四十九:28—29)。「西拉」,这是以东人ê首都,因为chē岩石,而且峭壁koh chē,被称做「峭壁之府」。

Án-ne,无论是海岛上ê人,á是tī沙漠地带ê居民,甚至世khiā起tī高山峭壁顶ê居民,大家lóng tio̍h同声歌颂上帝ê救恩。

第13节,chit节讲上帝已经准备好势,beh开始进行审判ê工作,chit种审判就ná仝一个「勇士」lóng准备好势了,beh向「敌人显耀威力」仝款。

重新查询 专卷研经 以赛亚书系列
错误回报,请联系comm[@]fhl.net