以赛亚书 40章1节 到 40章11节   背景资料  上一笔  下一笔
Tùi第四十章开始直到第五十五章,chit段落是用主前第六世纪中叶为背景,谈起以色列民族得tio̍h上帝ê救恩,tùi巴比伦得tio̍h释放tńg来故乡。主要对象mā tùi亚述转kah成巴比伦了后ê波斯帝国。

Tī chit段落中thang看tio̍h一个重要单元,就是「上帝奴仆」ê诗歌,包括第四十二章1到4节、第四十九章5到6节、第五十章4到9节、第五十二章13到五十三章12节等等。Tī这四段诗歌中,先知以赛亚所描述ê chit位上帝奴仆,乃是个受苦奴仆。有真chē圣经学者特别kā第四段ê诗歌kah耶稣受难ê记事连结起来看,认为以赛亚书ê chit段诗歌,就是tī预言耶稣ê受难。

这就成做一个真有趣味ê思考话题,当上帝应允受掠ê以色列人民thang重回并建造家园ê时,soah koh出现受苦ê奴仆,这到底teh讲出甚么信息?是m̄是teh传达一个重要ê信息:当人领受上帝ê救恩后,一定会谨记在心。若无,人遗忘上帝ê恩典后,会晓背叛上帝而害死上帝ê奴仆。

以赛亚书第四十章ē-tàng看出先知信息ê中心:上帝chiah是性命ê主宰。Chit章thang分做三个段落来看,一是第1到11节,这是宣告上帝解救以色列人民ê信息;二是第12到24节,这是说明上帝乃是宇宙万物ê创造者;三是第25到31节,只有上帝chiah是万物ê掌权者,是咱性命siōng好ê óa靠者。

Chit段诗歌mā ē-sái讲是chit段四十四到五十五章经文ê序曲仝款,作者tī一开始就传出上帝赦免ê信息,而且一而再、再而三kā他ê奴仆讲,beh kā大好消息大声叫hō͘他ê子民知影。这好消息ê中心,就是上帝赦免他ê子民。圣经作者mā一再表示:当上帝赦免他ê子民ê时,mā同时teh表示上帝拯救ê时刻来临。

第1到2节,「Lín tio̍h安慰」,这是上帝发出ê信息,对象是所有听tio̍h ê hiah-ê人。Chia ê「Lín」,可能是天顶ê使者,是上帝ê奴仆。Tī chia「安慰」一词是用复数动词,表示上帝ê「安慰」是丰富有chhun。

「鼓励耶路撒冷ê人民」,chia ê耶路撒冷ê人民,是teh指hiah-ê无hông掠去巴比伦ê「一kóa siōng穷苦ê人」,mā同时包括hông掠去巴比伦ê人民,in tī巴比伦做奴隶,过奴役ê生活,in ê苦境上帝完全清楚。上帝已经赦免、赦免in ê罪。

第3节,「有一个声音喊讲」,tī chit节出现三pái ê喊叫,另外两pái tī第6节、第9节。「tio̍h tī荒野为上主预备道路」,这是因为上帝介入了chit项拯救ê工作。他beh亲自带领他ê子民tńg去故乡。无论是tī人烟稀少ê荒郊野外之地,á是「沙漠」地带,lóng会有上帝同在。

第4节,chit节所用ê句话lóng是古代君王出巡ê时,一定tio̍h做好ê chìn前准备。用这来表示欢迎伟大ê统治者、拯救者beh来到,mā表示极大ê尊敬。

第5节,圣经作者ài用「上帝ê荣耀」表示上帝ê拯救(参考以赛亚书三十五:2)。因为án-ne,chia表示上帝beh用大能ê手,beh拯救以色列人民脱离巴比伦帝国ê统治。这会hō͘「全人类lóng tio̍h看见」,因为这是人类眼中认为无可能ê事,m̄-koh tī上帝手中却实现了。

第6节,「有一个声音喊讲」,tī第3节ê声音是beh人去传达拯救者来临ê消息,tī chia是beh去传达另外一个重大消息。Chia ê句话thang翻译做「听ah,有人teh大声讲话」。然后听tio̍h清楚ê命令句讲:「去报消息!」而听tio̍h ê人随时回应讲「报甚么消息?」Chia先讲出「人人lóng像草芥」仝款目nih-á ê性命,虽然mā是súi,m̄-koh却会瞬间消失去。

第7到8节,chit两节讲出一个中心信息:无论是甚么人,都无所谓永恒。这说明世间chiah-ê自命伟大ê君王、统治者,虽然伊ê国度有精锐ê部队,有满仓库ê金银财富,性命mā是仝款有限,真紧lóng会过去。因为「人kah花草无两样」,只要上帝吹个东风,就会lian去(参考三十七:27)。只有「上帝ê话永bē改变」,上帝ê话,是真理,mā是创造ê气力,kah性命ê根源(参考约翰福音一:1—4)。Tī chit世界上,只有ê话ê真理chiah会永远长存(参考诗篇一一九:89—90)。

第9节,这是第三pái讲beh「大声hoah」。而且喊叫ê内容是关系「好消息」,而这「好消息」是「Lín ê上帝就beh来à」,chit位上帝就是以色列人民拯救者。

第10到11节,chit位「至高ê上主beh带权柄来临」,他beh对hiah-ê欺压他子民ê强权国家进行审判。上帝ê「权能」teh代表上帝ê能力,mā teh代表上帝ê审判权,他beh「拯救」他ê子民,同时mā tio̍h亲自扮演「牧者牧养羊群」,像「慈祥」ê「母羊」teh带领他ê「小羊」,hō͘伊无koh失散,á是受tio̍h欺负。

重新查询 专卷研经 以赛亚书系列
错误回报,请联系comm[@]fhl.net