以赛亚书 29章1节 到 29章24节   背景资料  上一笔  下一笔
Tùi chit章开始到第三十二章止ê经文lóng teh描述亚述帝国对南国犹大ê侵略。

第1节,tùi第廿八章开始到第三十四章止,先知以赛亚提起六个灾祸。第廿八章1节一开始就讲tio̍h第一个「受灾」ê以色列国,chit-má第廿九章1节提起第二个「tio̍h受灾」ê对象就是「耶路撒冷本身」。虽然耶路撒冷lóng照例tī节期中举行各种祭典,看起来kah-ná对上帝真忠心,其实并m̄是真正亲像án-ne。

第2到4节,延续第1节,提起上帝降灾难tī耶路撒冷了后,人民会「haiⁿ-haiⁿ叫哀号」,而且是「全城tio̍h变成一座血淋淋ê大祭坛」,这已经清楚teh说明是上帝允准以色列人民ê仇敌来攻打in。Á chiah-ê攻击非常严厉而且残酷,致使耶路撒冷ê人民lóng「m̄敢作声」,只有ē-tàng「蹲tī土脚」thèng候灾难赶紧过去。因为若发出声音就会hō͘敌人听见而暴露行踪,为家己带来koh khah大ê灾难。

第5到8节,chit段经文tú好kah前段第1到4节所描述ê景况完全颠倒。Tī chit段经文中,先知以赛亚传出上帝拯救ê信息。伊讲「忽然,出乎意料」,上帝会用各种人料想bē到ê方式来赶散敌人,chit种方式包括「雷轰」、「地动」、「暴风」、「巨浪」、「焰火」等,chiah-ê lóng m̄是任何国家ê气力ē-tàng阻挡会tiâu。上帝用chiah-ê当做工具来拯救以色列人民,hō͘攻击耶路撒冷ê敌人lóng无招架ê余力。

第9到12节,chit段经文是teh指犹大kah埃及联盟是愚戆ê想法。先知以赛亚一再提醒以色列人民,上帝bat kā in ê祖先tùi被奴役之地埃及抢救出来。chit-má虽然受tio̍h亚述帝国ê威胁,m̄-koh只要专心óa靠上帝ê保守带领,必定ē-tàng安然无恙。弃sak上帝而去走chhōe埃及ê支持是非常「愚戆」ê想法。M̄-nā án-ne,采取chit种策略就kah chheⁿ-mê-.ê人仝款,是「盲目」ê行动,mā像lim「醉」了ê人仝款,随时会倒落去。先知以赛亚提起一个重要ê观念:若是无上帝启示,无论是世间ê「饱学之士」,á是「目不识丁」ê人lóng kā无法度明白上帝所启示ê意义。

Koh讲,chia mā有另外一个意思,就是无论是甚么人,大家lóng无想用时间去解读上帝「册卷」—圣经中ê话语(参考以赛亚书一:1),kan-taⁿ想beh请人读kā in赐福听,m̄-koh即使请了饱学之士讲解,若是无上帝启示mā是枉然。

第13到14节,chit段经文tú好讲出假先知kah祭司虚假ê信仰态度,kah in误导人民对上帝之敬拜行为—欠缺真诚ê心,这tú好显示in tī信仰ê程度上真肤浅。先知以赛亚强调上帝真痛心犹大ê人民,kan-taⁿ会用「唇舌」嘴中念念有词地敬拜他,m̄-koh in ê「心却远离」,讲穿了,都无用真心实意ê态度敬拜上帝。先知耶利米mā指出伊hit时代ê以色列人民有仝款ê问题(参考耶利米书十四:11—12)。Chia koh khah清楚指出「in ê宗教kan-taⁿ是人间ê一种规条传统,熟读暗念而已」,这是teh指外表ê行为。为tio̍h án-ne,上帝一定会严厉惩罚in。上帝ē-sái「聪明人ê聪明」、「精明人ê精明」lóng变成无用ê物件。

第15到16节,chit两节指出人心中认为「无人晓得in teh做甚么」,m̄-koh,圣经作者讲上帝是无所不在ê神,无论是上到siōng koân ê天,á是落去到地底siōng深ê深渊,lóng会tú-tio̍h上帝(参考诗篇一三九:7—8)。耶稣就真清楚ê讲,人tī「隐密」中所做ê事,上帝lóng看kah非常清楚(参考马太福音六:4、6、18)。当chiah-ê领导者「颠颠倒是非」ê时,tú好说明in心中根本无上帝。

第17节,chit节成做下段经文ê一个转折点。主要teh说明,真正改变一切ê,就是上帝,只有他chiah有能力hō͘「荒地tio̍h变成肥田;肥田tio̍h变成荒地」。因为万物lóng是tùi上帝来ê创造,mā tī他ê手中成就历史大事,因为一切万事lóng带有上帝ê旨意在其中(参考诗篇一三五:6)。

第18到21节,这是一段美好ê信息,mā是审判ê信息,hō͘ hiah-ê忠于上帝ê子民,就是「臭耳聋会听见」、「盲人会thí开目睭」,这lóng tī回应第10到11节本来盲目的心灵,kā koh一pái重新开启。Tī以赛亚书第三十五章5节,先知ê预言中,讲「chheⁿ-mê-.ê ē-tàng看,臭耳聋ê ē-tàng听」,这是上帝极大ê救恩。当以色列民族chit群劫后余生ê子民看见上帝ê奇妙作为,tī上帝带领in回归故乡后,in就会ná亲像开了耳ákah目睭ê人仝款,明白并遵从上帝ê话。

第22到24节,chit段经文koh一pái说明上帝对以色列子民ê期待,希望in会知影带领in祖先离开埃及ê上帝,一定会保护in,in mā kā看见上帝所赐ê各种福气,而会「敬畏」上帝,甚至连「愚笨ê人」mā会因为án-ne而认bat上帝ê救恩。

重新查询 专卷研经 以赛亚书系列
错误回报,请联系comm[@]fhl.net