以赛亚书 23章1节 到 23章18节   背景资料  上一笔  下一笔
Chit章是有关腓尼基人所khiā起ê两个重要城市—泰尔kah西顿ê信息。久长以来,lóng是地中海海域siōng活跃ê族群,而泰尔kah西顿则ē-sái讲是地中海地区货物ê转运khiā。Tī siōng兴旺ê时代,chit两个港口所连接ê航运版图甚至扩展到西班牙。因为án-ne,虽然tī第1节开始就讲「是有关泰尔ê信息」,其实,是连同西顿mā列入其中(参考第2节、第4节、第12节)。会用泰尔当做标题,真可能就是因为最后ê第15到18节是用泰尔当做结尾pah。Mā thang án-ne了解:谈起泰尔,就会讲tio̍h西顿。

第1节,「泰尔」,这是设tī地中海西岸ê重要港口城市。Tī大卫王朝时代,泰尔王希兰kah大卫王维持非常良好ê外交关系。因为án-ne,当所罗门王续接王位,兴建耶路撒冷圣殿kah王宫ê时,就是由希兰王提供协助,用船只tùi黎巴嫩运来大量ê香柏木到耶路撒冷,并且由希兰王提供大量劳工,协助建造圣殿kah王宫ê工程(参考列王记上第五章),kah建立所罗门王商船队伍,并且帮助以色列帝国训练航海ê水手(参考列王记上九:26—27)。由此可见,「泰尔」Chit-ê城tùi大卫王朝以后,就kah以色列民族有真亲密ê关系。

Chia先知以赛亚传出ê信息是ài in「痛哭pah」,原因是「房屋kah海港mā被摧毁了」,这teh表示kui个城市lóng会被占领,会失去自主权。

「基提」,就是teh指今á日ê塞浦路斯这岛屿。Tùi chia tńg来ê船只,iáu未来到港口,就会听tio̍h泰尔kah西顿被摧毁ê哭声,可见tùi两个城市传出哀哭ê声音非常大,震撼了kui个地区ê安宁。

第2到3节,包括第4、12等节lóng有提起「西顿」。Ná亲像头前所叙述ê,chit-ê城kah泰尔是当时siōng出名ê港口城市。Chia讲灾难m̄-nā tī泰尔发生,mā会降临在西顿城。Chia讲泰尔kah西顿ê商人,「Kā埃及出产ê五谷卖hō͘各国」,chit句话已经指出chit两个港口城市,就是当时中东kah地中海区域ê货物转运khiā。

第4节,原本「西顿」就是一个繁荣ê港口城市,是人人lóng向往ê所在。Taⁿ因为tú-tio̍h chit种惨状,hō͘一切贸易lóng停顿落来。连地中海mā发出声明,讲无koh认「西顿」,就是beh kah它划清界限。「从来无chhōa过gín-á,mā无生男育女」,这表示断绝关系ê意思。

第5节,因为埃及是靠泰尔kah西顿ê航海商人输出转运物件,双方关系亲密,taⁿ chit两个城市遇tio̍h án-ne悲惨ê结果,连带ê是「埃及人」mā lóng有「伤痛」ê感受。M̄-koh「埃及人」ê「伤痛」,可能m̄是因为泰尔kah西顿ê毁灭,却是为埃及失去商业贸易ê良好伙伴,会失去大好机会,经济发展kā因为án-ne受tio̍h极大ê影响而发出悲痛ê声音。

第6到9节,「腓尼基人」,意思是teh指迦南人。Chia mā是teh指泰尔kah西顿这两城市ê居民。Chit段经文指出in会因受tio̍h敌人强大武力ê攻击,而出现严重ê难民潮,真chē人想beh利用海路「逃到伊施」(西班牙)去避难。当泰尔siōng繁荣ê时chūn,就bat藉tio̍h经济势力,扩张了它ê版图,建立真chē「殖民地ê城」,tī主前第八世纪末叶,甚至tī塞浦路斯、希腊、北非、马niâ伊、西西里,以及西班牙等,lóng有设立殖民地,koh khah重要ê,就是腓尼基人koh kā文字带入希腊。M̄-koh却因为chiah-ê成就hō͘ in真骄傲。「是甚么人hō͘它tú-tio̍h chit种厄运」,chit句话已经讲出听闻到泰尔遇tio̍h án-ne惨重打击ê人、seng-lí人、船队等lóng会发生类似ê问题。圣经一再kā骄傲ê人讲,心中是无上帝ê(参考诗篇十四:1),chit种人siōng容易犯一种错误,就是认为家己有能力处理,á是做各种事,天下无难得倒伊ê事。为chit-ê缘故,上帝计画「tio̍h hō͘骄傲ê人变做谦卑」,所用ê方式就是Kā chit种人ê一切lóng收tńg来。

第10到12节,chia真清楚讲出「伊施」(西班牙)人民,会因为泰尔ê遭遇而无法度koh再像过去hit种,控制tio̍h西班牙ê政治、经济活动。原因是上帝有计画ê进行惩罚泰尔kah西顿ê工作。因为是上帝有计画ê惩罚,chit时,无论人怎样逃避都无用,因为上帝是无所不在ê创造主(参考诗篇一三九:7—8)。

第13节,chit节是编者所做ê说明。「是巴比伦人,m̄是亚述人」,chit句话是编者teh说明有一工,会彻底摧毁泰尔ê人,是巴比伦人,m̄是亚述人。编者ê看法是:巴比伦人chiah是真正惊人。尼布甲尼撒王bat率兵攻泰尔城,tùi主前585年一直到主前573年,继续进攻长到13年时间(参考以西结书廿六:7—21),m̄-koh iáu是无法度攻落hit-ê城。可见hit-ê城防卫上ê坚固。泰尔后来被占领、摧毁,是tī亚历山大大帝时代,he是主前332年。

第14节,重复第1节所提起ê警告。

第15到16节,是一首古老ê希伯来人诗歌,描述「妓女」若人老珠黄,除了老顾客会光顾之外,无人客会上门,就算上街去招揽人客mā是仝款无人chhap。值得注意ê是:用「妓女」来形容泰尔,mā有另外一个含意,表明泰尔过去tī商业发达ê时代,充满tio̍h不正当ê商业贸易,包含tio̍h真chē淫乱、贪婪ê行为夹杂tī贸易行为中。Ná亲像现代社会有人利用女色、花酒等类似chit种方式来thàn钱。Koh讲,chia ê「妓女」,mā有另外一种含意,表示只知影thàn钱,并无考虑道德良知ê问题。这tùi先知阿摩司ê信息中就thang看会tio̍h(参考阿摩司书一:9—10)。

「被遗忘七十年」,这mā是先知耶利米预言以色列人民会hō͘掠到巴比伦ê时间(参考耶利米书廿五:11—12、廿九:10)。Chia ê「七十」,表明ê是一个「适当」ê时chūn,á是「真长」时间,以及「完成」ê意思,无一定是真正数字。不过mā有可能是teh指主前701年亚述大帝西拿基立,率兵攻打巴勒斯坦等地开始,泰尔kah其它巴勒斯坦地区ê城市lóng遇tio̍h威胁,直到主前630年代,亚述开始衰微,对巴勒斯坦kah附近地区ê城邦,已经会失去控制能力止。主前612年巴比伦消灭亚述,tùi主前630年到612年chit段期间,hō͘泰尔kah西顿有目nih-á恢复ê机会。

(e)「tú好是一个国王ê寿数」,七十是当时ê人看做siōng长寿,mā认为美好ê性命周期(参考诗篇九十:10)。

第17到18节,chit节koh一pái说明「七十年过了后」会恢复泰尔繁荣ê景象。虽然chia讲会有「真chē国家向它租用船只」,m̄-koh chit种景况并无实现,一直等到希腊帝国ê 多利买王朝亚达薛西三世时代,攻落西顿,并tī亚历山大大帝tī主前332年攻落泰尔城,了后ê希腊帝国时代,为tio̍h海上控制权,以及商业利益ê需要,chiah下令重建泰尔城。

Chia讲出kui章ê一个中心信息:骄傲ê人,心中并无上帝。Á人会骄傲,往往是发生tī个人事业á是国家势力siōng坚强ê时代。相对ê,当人á是国家遇tio̍h无法度承受ê灾难后,chiah会发见家己ê渺小、脆弱,需要上帝扶持、带领。Chit时,人chiah会想tio̍h时刻感谢上帝ê带领,mā会想beh遵行上帝ê教导kah指引。chit-má ê泰尔,因为经历过残酷ê外力摧残,得tio̍h解救了后,终其尾知影只有óa靠上帝ê带领、保守,chiah有生机。因为án-ne,重建、恢复起来ê泰尔,已经会晓tio̍h敬拜上帝,尊崇上帝为大。


重新查询 专卷研经 以赛亚书系列
错误回报,请联系comm[@]fhl.net