Chit章经文是针对古实chit-ê民族提出ê信息。古实，这是teh指大约tī主前715到714年间，tī古代埃及南部ê衣索匹亚，由一位「边克衣」族人（Piankhi）名叫「沙巴卡」（Shabaka）所带领，伊领导族人统治埃及，建立埃及ê第廿五个王朝。因为埃及加入叙利亚kah以色列ê联盟，因为án-ne，特别差派使节团到犹大去游说in加入联盟。结果埃及m̄-nā无因为án-ne保全家己ê国家，反tńg受tio̍h连累，家己mā就会领受亚述帝国ê掠夺。M̄-koh另外有一种可能，就是in派出ê代表是去亚述走chhōe和解，结果是hō͘拒绝ê。因为亚述帝国已经清楚知影，tio̍h攻落埃及并无困难。何况chìn前埃及是参与叙利亚kah以色列联盟策略来反抗亚述ê。有可能因为发见亚述帝国并无接受，就án-ne in开始转向，走chhōe犹大ê协助。

第1到2节，这是tī主前703年左右，埃及派出使者前往犹大见希西家王（主前715—687年），ài伊赶紧加入联盟抵挡亚述。埃及使者并且带国王ê讯息去，tio̍h大力hō͘ in犹大协助。M̄-koh先知以赛亚ê看法一直是维持一贯ê信念：tio̍h óa靠上帝chiah是正确，óa靠人ê气力，kan-taⁿ会带来koh khah大ê灾难，chit点tī以赛亚书第三十章有koh khah详细ê说明。先知以赛亚提出明确警告，说明kah埃及订立协防条约是无任何作用ê。

「翼股振动ê响声」，chit句话表示kui个社会忙乱ê情景，ná亲像真chē飞蛾á是其它昆虫四界忙乱舞动翼股ê时发出ê声音（参考申命记廿八：42），表示tú-tio̍h困境、危急ê时ê反应。Chia是用chit种方式teh描述，来往tī古实kah耶路撒冷ê 使节团非常无闲，in想出所有ê办法tio̍h游说希西家王加入联盟。

「芦苇造ê船」，这是古代社会tāi先进ê航运船只，航行速度真紧。Chit种船只因为快速，通常lóng是用来当做通讯á是轻便物件ê运输工具，m̄-koh并无适合运送军队，因为船ê体型真小。

M̄-koh先知以赛亚传出ê信息，是beh chiah-ê 使节团赶快tńg去，m̄-thang koh再去游说希西家王。因为若无赶紧tńg去，恐惊上帝会受气惩罚，hō͘尼罗河ê河水降低，甚至河道干涸（参考二十：5），而断了in tńg去厝里ê路。

第3节，chit段经文讲出亚述帝国会怎样惩罚古实，甚至连参与策划kah古实联盟ê人mā会遇tio̍h仝款惩罚。

先知以赛亚呼吁当时ê领导者tio̍h注意「听pah」，而且是beh「注意听号角ê响声」因为上帝会pûn号筒，呼叫他ê子民。

第4到6节，chit三节是上帝hō͘先知以赛亚ê信息。

上帝「tùi天顶俯视」地上ê一切行动，他非常清楚所有ê一切。M̄-koh上帝lóng照ê计画teh进行，他ê命令一出来，一切就按tio̍h他ê吩咐进行。因为án-ne，人类看起来kah-ná混乱ê现象，tī上帝眼中，却是非常清晰，因为tī他眼中一切ná亲像摊tī「热天照耀ê阳光下」，mā像秋季收割ê时ê「露水」般tùi叶áê尾溜往地上滴仝款。这mā表示上帝teh进行ê工作，有时是安静得hō͘人感受bē出有任何一点迹象，m̄-koh上帝奇妙ê旨意却tī静静静中间teh运行tio̍h。先知以赛亚用chit种句话teh形容亚述tio̍h摧毁古实（埃及），ná亲像农家准备ài采收葡萄仝款，所有采收ê工具lóng准备好势了。古实ê结局是悲惨ê，in ê众兵丁会曝尸tī荒郊野外无法度埋葬，成做「飞禽行兽」ê食物。

第7节，thang参考历代志下第三十二章23节。当上帝拯救耶路撒冷脱离亚述帝国皇帝西拿基立ê侵犯后，有真chē附近民族lóng纷纷派出代表到耶路撒冷来向伊恭贺。Tī以赛亚书第四十五章14节，甚至预言古实（埃及）mā 会成做以色列国ê臣民。