以赛亚书 14章24节 到 14章32节   背景资料  上一笔  下一笔
有kóa圣经学者认为chit段经文应该kah第十章编辑做伙,主要内容是上帝透过先知以赛亚对亚述国讲ê预言,kā in讲teh beh受tio̍h上帝严厉ê制裁。

Chit段经文mā thang分做两个段落来看:

一是第24到27节,是预言有关亚述帝国毁灭ê情形。Chit段经文ê背景真可能是发生tī主前701年,当时亚述皇帝西拿基立带领将近二十万大军攻打耶路撒冷无成功,最后家己iáu死tī两个kiáⁿ ê手中(参考以赛亚书三十七:36—38)。因为án-ne,若是tùi犹大国kah耶路撒冷ê人民来看,chit段经文ê预言是完全实现了。M̄-koh m̄是teh描述主前612年亚述帝国被巴比伦帝国消灭ê背景。

二是第28到32节,chit段经文非常珍贵ê所在,就是提供了一个年代背景—亚哈斯王往生ê hit年,这大约是tī主前718到715年左右ê时代。Chit段经文ê内容真类似现代人常用ê警语:m̄-thang幸灾乐祸,而是beh tùi别人ê灾难得tio̍h警诫,来学习自我儆醒。Chit段经文mā thang参考耶利米书第四十七章;以西结书第廿五章15到17节;阿摩司书第一章6到8节;西番雅书第二章4到7节等等先知ê文献中,lóng有提起类似对非利士人ê警语。

第24节,上帝「chiù-chōa」,类似chit种用词tī旧约圣经中非常chē,lóng是teh表明上帝指他ê「圣名chiù-chōa」,意思表示他所「计画」ê一切「一定实现」。

第25节,chit节讲上帝应允hō͘以色列人民得tio̍h自由,无koh hō͘亚述人khiā起tī以色列人民ê土地顶面,意思就是beh消灭亚述chit-ê国家。

第26节,chit节讲出上帝对kui个世界有管理ê主权。亚述帝国只不过是一个例,所有世界各国lóng仝款,只要是违背上帝ê拣选目的,结果必定引来上帝ê「伸手攻击」。

第27节,chit节回应第24节所讲ê。

第28节,「亚哈斯王死ê hit年」,大约是tī主前718年。

第29到30节,chit两节ê背景真可能是teh指亚述皇帝撒缦以色五世往生,非利士人拍手庆祝叫好,讲打击in ê「棍子已经at断了」。M̄-koh非利士人忽略继承王位ê人比前一个国王撒缦以色五世koh khah残酷,chit-ê继承者就是撒珥根二世。Chia预言非利士人会遇tio̍h报复ê时,m̄-koh相对ê,上帝却对犹大人民传送好ê信息。Chia讲「上主beh做穷困人ê牧者」,chia所指ê「穷困人」就是犹大ê以色列人民。上帝会亲像好牧者仝款庇护以色列人民,而失去上帝看顾ê非利士人会tú-tio̍h koh khah残酷ê对待。因为in kā tú-tio̍h亚述帝国ê侵犯,m̄-nā土地饱受战争ê摧残,人民ê性命mā受tio̍h严重ê蹂躏,饱受痛苦来死去。

第31节,chit节指亚述帝国庞(pâng)大ê军队,所到ê所在势如破竹,南下攻击kui个巴勒斯坦地区,而受摧残siōng严重ê kā是非利士人。

第32节,koh一pái提起ê非利士人会受tio̍h灾难一定tio̍h对外求救,m̄-koh犹大却tī上帝ê庇护之下,ē-tàng安然无恙。

重新查询 专卷研经 以赛亚书系列
错误回报,请联系comm[@]fhl.net