以赛亚书第十一章thang分做两个部分：其一就是第1到9节，chit首诗歌是描写以色列民族kā kah上帝有和好ê关系，这和好并m̄是因为以色列人民主动回归到上帝面前，却是上帝特别ê慈爱，他伸出救援ê手，恢复kah他子民之间和好ê关系。Á chit种和好关系mā延伸到in所khiā起ê土地。其二是第10到16节，这部分是继续前段诗歌所讲ê，上帝赐hō͘他ê子民一个全新ê性命ǹg望。这ǹg望是预言上帝kā hō͘ chiah-ê残存ê人民重新聚集做伙tī故乡ê土地顶面，彼此之间无koh有「嫉妒」、「仇视」，ná亲像前段诗歌所描述hiah-ê残暴ê野兽，mā kā kah温驯ê家畜和好相处仝款，上帝mā tio̍h án-ne照顾他ê子民，ná亲像当年他带领以色列人民出埃及一般。

以赛亚书tùi第一章到第十二章有四段诗歌，lóng是讲tio̍h上帝拯救ê亮光kah ǹg望出现tī他ê子民面前，这就是：一是第二章2到5节；二是第四章2到6节；三是第九章2到7节，以及第十一章1到9节等等。值得注意ê是，tī chit四首诗歌中，第一、二、四等chit三首真清楚指向南国犹大（参考二：1、3、四：3、5、十一：1），只有第三首诗歌偏向北国以色列。

这是一首希望之歌，因为其中描写出看起来是已经被焚毁ê树，发出新ê芽，这是新性命开始ê现象。

    第1节，「耶西」，是大卫ê老父（参考撒母耳记上十六：10—13）。Chia讲tio̍h「残干上tio̍h抽出嫩芽」，是一种象徵性ê譬喻方式，主要teh强调下半句ê「有一位新王beh tùi伊ê后代兴起」。因为chit句话ê缘故，新约时代ê犹太人一直认为tio̍h beh带领in建立新国度ê领导者，必定是犹大家族ê kiáⁿ孙，原因是大卫王就是属tī犹大家族。因为án-ne，马太福音第一章1节teh绍介耶稣ê族谱ê时，特别强调「耶稣基督是大卫ê后代」。

第2节，「上主ê灵tio̍h降tī伊身上」，chit句话thang参考撒母耳记上第十六章13节，chit句话表示上帝kā kah chit位被拣选者同在。Á「智慧、聪明」、「谋略、能力」等等chiah-ê用词，对照第九章6节所描述ê hit位teh beh来临ê统治者仝款。Chit位新ê王必定是充满tio̍h「知识kah敬畏上主ê心」，kah以往ê君王大无相仝。

第3节，「敬畏」一词，表明ê是tùi心内真实ê遵从，照上帝ê教导而行。Á一位公义ê君王是bē凭「外貌」、不靠「风闻」断案，因为chiah-ê lóng是本身是一个领导者一定tio̍h有ê基本要求。Án-ne，chiah会有公义ê审判，ná亲像大卫tī统治全以色列ê时，就是「秉公行义」（参考撒母耳记下八：15）而得tio̍h人民ê拥戴。

第4节，上帝拣选出来ê奴仆，必定tio̍h用「公道」ê态度治理国家（参考创世记十八：19）。先知以赛亚就bat呼吁以色列民族ê统治者，一定tio̍h beh维护「公道，伸张正义，帮助受压迫ê，保障孤儿，为寡妇辩护」，「在世间持公道」（参考以赛亚书一：17、四十二：6）。Chit种「保障孤苦无助者ê权益」，就是teh见证君王á是有权势者对上帝有正确ê认bat（参考耶利米书九：24）。Á对「罪人」kah「邪恶ê人」绝对bē宽待。

第5节，chit位tùi上帝来ê拯救者必定会用「正义治理」人民。同时会以「信实施政」。圣经谈起「信实」一词，所表示ê就是「守约」。说明chit位tùi上帝来拣选ê君王，绝对会诚实信守kah人民ê约定。

第6到9节，chit段诗歌tú好讲出一个kah上帝和好ê生活环境。创世记第三章17节谈起人犯罪了后，上帝ê惩罚就是连带hō͘土地受tio̍h诅咒。chit-má kah上帝和好，就是人重新修复kah土地kah地上万物之间ê关系。这mā说明一个上帝所拣选ê统治者（君王）会改变过去ê生活态度。相对ê，会kā人当做牛马看待ê君王，绝对bē疼惜所khiā起ê土地kah环境。只有会晓尊重性命价值ê君王，chiah会疼惜土地kah环境。

Chia用「豺狼」、「豹子」、「狮」「熊」、「毒蛇」等动物，chiah-ê Tī圣经通常lóng用来形容残暴ê性格，teh象徵chit种君王用残忍、压迫等手段对待人民。因为án-ne，chit首诗歌tī chia，并m̄是teh描述实况ê生活环境án-ne，却是用来teh象徵新来ê君王，因为是tùi上帝来拣选之忠实奴仆，因为án-ne，bē koh再像过去hiah-ê残暴统治者用残忍、压迫之手段，却是会用仁慈对待人民，如同在养饲温驯ê家禽动物ná般ê善良。因为án-ne，chia用「绵羊」、「小羊」「母牛」、「小牛」、「牛」，以及「食奶ê婴á」等脆弱不堪一击ê家畜动物kah婴á来对照顶面所讲凶猛ê野兽动物。这表示过去hiah-ê被残暴统治ê痛苦经验bē koh再出现。

第9节，chit节是第6到8节ê结语。Chia讲tī敬拜上帝ê地方，bē koh再有伤害性命ê行为出现，却是充满tio̍h性命ê活力，ná亲像「海洋充满水」，因为所有ê人lóng「认bat」上帝ê慈爱。