以赛亚书 1章1节 到 1章31节   背景资料  下一笔
Tùi chit章开始直到第三十九章等,是属tī主前第八世纪先知以赛亚时代ê背景。Á第一章是真重要ê踏话头,ē-sái讲是先知以赛亚出来传上帝信息ê背景,mā是chit本经册ê引言。

tī先知以赛亚传达出来ê信息中,thang清楚看见以色列已经严重弃sak上帝ê道。因为án-ne,Tī chit-ê信息中,严厉警告以色列人民若无悔改,会面临上帝严厉ê惩罚。

第1节,chit节真重要,mā是一般先知文献常见ê写法,就是会先绍介先知ê身分背景。Tī这节共计提供四君王ê名:

「乌西雅」,伊是tī主前792年到740年当犹大王。就tī伊往生ê chit年,先知以赛亚得tio̍h上帝ê启示出来传达上帝ê信息(参考以赛亚书六:1)。

「约坦」,是乌西雅王ê kiáⁿ,tī主前750到735年接掌国家大政。伊算是一位信仰真忠实ê君王,尊崇上帝为主。伊执政期间,不时tú-tio̍h叙利亚kah南国以色列ê攻击(参考列王记下十五:32—37)。

「亚哈斯」,伊是约坦ê kiáⁿ,tī二十岁开始执政十六年时间(主前734~718年)。伊做上帝看做邪恶ê事,甚至kā家己ê kiáⁿ烧献hō͘迦南ê神明(参考列王记下十六:1—4)。

「希西家」,伊是约坦ê kiáⁿ,接掌王位是tī主前717到688年。Hit时伊廿五岁。统治犹大国共计廿九年。伊是一位对上帝真忠实ê君王。在位期间bat亚述王西拿基立带大军来攻打耶路撒冷,因为伊听从先知以赛亚ê话,chiah致使耶路撒冷城得tio̍h解围(参考列王记下第十九章)。伊mā因为破病,先知以赛亚替伊向上帝祈求,而得tio̍h上帝应允,chē延长伊十五年ê性命(参考列王记二十:1—11)。

Tùi以上年代来看,先知以赛亚跨越ê年代真长,tùi主前740年开始,直到主前700年左右。可惜ê是chit本经册并无提起先知以赛亚往生ê年代。

Chit节提起上帝启示「亚摩斯ê kiáⁿ以赛亚有关犹大kah耶路撒冷ê事」,这就真清楚先知以赛亚工作ê所在,就是tī南国犹大,特别是tī耶路撒冷城地区。

第2到3节,「天ah,地ah,lóng来听!」Chit种句型mā是当时国际条约ê一种文体,用「天」kah「地」表示签约双方人民所敬奉ê神明lóng是「约」ê见证者。「我亲自扶养带大ê gín-á竟然背叛我」,chit句话说明犹大人民背叛了上帝,去拜偶像,m̄听上帝ê话,in竟然比牛、驴á iáu不如,因为chit两种动物iáu会「认bat」in ê主人。先知耶利米mā有类似ê句话出现(参考耶利米书八:7)。「认bat」,chit-ê词Tī圣经中不时出现,表示人应该用「敬畏」ê心灵忠实tī上帝,是照上帝ê话行事。

第4到6节,chit段经文是teh说明犹大人民背叛上帝ê行为,包括有「作恶犯罪」、「邪恶败坏」、「弃绝」、「藐视」、「背离」等,chiah-ê lóng tī说明犹大人民对「神圣ê上帝」ê态度非常不应该。因为上帝是神圣ê,他mā要求所拣选ê子民神圣(参考利未记十九:1—2)。犹大人民会án-ne背离、弃绝上帝,就是因为去óa靠偶像神明,无koh敬畏「神圣ê上帝」。因为án-ne,被上帝严厉惩罚混身是伤,mā无人chhap、疼惜。

第7到9节,chia说明犹太人民lóng kā in tī历史上惨痛ê教示,hō͘ bē记得kah chheng-khì-liu-liu了,因为án-ne,先知以赛亚koh一pái历史ê经历来提醒犹大人民。伊描述战争所带来ê惨重结果,m̄-nā hō͘ in ê家园被摧毁,所有ê一切lóng被敌人搜刮殆尽,真chē犹大ê城市沦陷tī敌人手中,而chiah-ê城市ê犹大人民mā会hō͘掳贩卖为奴,只chhun耶路撒冷一城iáu未沦陷。

使徒保罗引用chit节经文tī罗马书第九章29节,说明若m̄是上帝怜悯,犹太人早就已经不存在了。因为án-ne,犹太人应该心存感恩,而不应该有骄傲ê态度。

第10节,chit节是上帝对犹大ê领袖kah人民ê控诉,讲in ê行踏之恶质,ná亲像当年ê所多玛kah蛾摩拉仝款,实在是不值得同情。

第11到14节,chit段经文说明上帝并无喜爱人只是用各种献祭ê礼仪来回应他拣选ê疼,因为若是无真诚ê心内,hiah-ê节期中ê宗教礼仪只是虚有其表而已,而hiah-ê看几来hō͘人垂涎ê祭品,lóng会成做上帝ê「重担」,上帝会拒绝接受。

第15到17节,chit段经文是谈起上帝拒绝任何tùi犹大人民来ê祈祷,其实,这mā包括拒绝先知替in ê祈祷。Á chit对犹大人民来讲,这ē-sái讲是真严厉ê惩罚。当上帝无koh垂听人ê祈祷ê时,等于是kah chit种人断绝了关系仝款。先知耶利米,就bat被上帝指示m̄-thang koh再替对当时ê耶路撒冷犹大人民祈祷,因为上帝根本就无想beh听in祈祷ê声音,mā不接受in ê献祭(参考耶利米书十四:11—12)。主前第八世纪ê先知弥迦mā传出仝款ê话,讲上帝以后be7 koh听犹大人民祈求上帝ê祈祷声音(参考弥迦书三:4)。上帝指控in「双手沾满血渍」,chit句话已经讲出in一面祈祷,另外一方面却出手杀害、迫害贫困ê人ê性命。真正听从上帝教导ê人,绝对bē去做危害别人性命ê事,并且同时会积极地去关心贫困者,特别是当时社会中siōng弱势ê孤儿、寡妇。

第18到20节,「来,咱来理论」,这是一种法庭辩论ê模式。先知以赛亚指出,上帝并无、mā bē冤枉犹大人民,当他teh指控犹大人民所犯ê罪状ê时,上帝ē-tàng hō͘犹大人民公开来为家己被指控ê罪状辩护。M̄-koh上帝提醒in,m̄-thang认为in漂白了家己ê双手,上帝就看bē出in刣人被血渍染红ê双手,he是无用ê。只有学习服从上帝ê教导,才能有生存ê机会,若无,就是自取灭亡。

第21到23节,chit三节经文lóng是采用相对用语,亲像「忠贞」kah「妓女」;「公平正直」kah「凶手」;「纯银」kah「不值分文」;「美酒」kah「无味ê水」等等,chiah-ê清楚讲出犹大人民ê叛逆,in原本是上帝纯洁ê子民,chit-má却变成恶质ê暴徒;原本是纯洁ê妇女,taⁿ却变成妓女。清楚表明就是因为人ê贪婪促成hō͘人弃sak上帝。

第24到26节,chit段经文是上帝决定审判ê话语。Tùi上帝ê审判中,thang看出上帝并m̄是beh完全毁灭犹大人民,而是beh改造in,ài kā in中间hiah-ê ná亲像渣滓之民lóng消除,留落来hiah-ê纯洁ê子民,这mā是后来先知一再使用ê特殊用词,就是「chhun落来」、「残存」子民ê意思。

第27到28节,chit两节讲出kui本圣经中心主题—悔改。上帝喜爱人悔改(参考以西结书三十三:11),m̄-koh无愿意悔改ê人,就会被「粉碎」、「消灭」。

第29到31节,chit段经文真清楚讲tio̍h上帝审判ê结果,无任何人ē-tàng逃避,过去因为建造偶像神明崇拜而成为繁华ê城市、地区,lóng会成做废墟,而hiah-ê领导者lóng会灭亡。

重新查询 专卷研经 以赛亚书系列
错误回报,请联系comm[@]fhl.net