这是另外一个情节ê开始，mā是teh描述先知何西阿怎样劝勉浪荡ê bó͘歌蜜tńg来到伊身边来。伊用真真贵ê价钱kā当妓女ê bó͘赎回来。并且劝勉伊m̄-thang koh再离家出去。先知何西阿用chit种方式来kā以色列人民讲，一定tio̍h回归到上帝面前，伊讲上帝一定会赦免以色列人民悖逆ê罪。

第1节，这是另外一个情节ê开始。作者tī chit章是以「第一人称」来写，真可能就是先知何西阿ê手笔。Ná亲像第一章2节踏话头ê第一句话所讲ê，是tùi上帝来ê命令语句，上帝ài先知何西阿tio̍h koh再去爱hit-ê弃sak丈夫去「另结新欢」ê bó͘。上帝却ài先知何西阿án-ne做ê主要目的就是以此来比并以色列人民，看māi上帝无比ê疼，因为以色列人民ná亲像淫妇hit种，悖逆了上帝，m̄-koh上帝却iáu是án-ne深teh疼in。

Chia提起「祭过偶像ê葡萄饼」，chit种饼是以色列军人出征ê时chūn必备ê军粮，mā是一般以色列人民外出长途旅行ê时必带ê食物。Chit种饼ê营养高，而且容易保存。以色列人民m̄-nā无因为有够额ê葡萄thang制成葡萄饼而知影感谢上帝，颠倒地却用葡萄制成ê饼来祭拜巴力偶像神明（二：8—9），认为chiah-ê偶像神明会赐福kā in赐福栽种ê葡萄树结出koh khah chē ê葡萄。M̄-koh真正会帮助、赐福in ê是上帝。

第2节，chit节讲先知何西阿照上帝ê指示，伊「用十五块银á kah一百五十公斤大麦ê代价买tńg来chit-ê cha-bó͘人」。照利未记第廿七章3到4节ê记载，一个人还愿ê时，二十到六十岁ê cha-po͘人一定tio̍h用五十块银á，cha-bó͘人用三十块银á。现在，先知何西阿是用十五块银á，án-ne只付了一半价钱，另外一半价钱就是用一百五十公斤ê大麦。Thang比较列王记下第七章1节ê记载，一块银á thang买tio̍h六公斤siōng好ê大麦，án-ne，一百五十公斤就一定tio̍h花去二十五块银á。Án-ne算起来，先知何西阿总共是用去四十块银á ê代价chiah赎回伊ê bó͘，比规定ê三十块银á koh khah-chē ê价码。

第3节，先知何西阿对伊ê bó͘歌蜜提出一个重要ê条件：tòa做伙，m̄-koh无koh kah伊「同房」。为tio̍h是beh hō͘伊ê bó͘ ē-tàng洁身自爱，除去淫妇ê心思意念。仝款ê要件mā用tī以色列人民kah上帝之间ê关系；上帝需要以色列人民经过心灵ê洗荡，hō͘ in知影怎样kā过去错误ê心灵洁净落来。

第4到5节，chit节是比较khah麻烦，因为chit节到底是teh指以色列人民亡国被掠到外国去做奴隶过艰困ê日子？是teh指in确实悔改ê生活态度？经文读起来是真亲像tī亡国tī亚述。Chia讲in虽然是hō͘掠到外国去，m̄-koh in确实是过一个非常敬虔ê圣洁生活，有上帝kah in同在。In过了一段「无祭祀，无石柱，无偶像kah神明thang占卜」ê陶冶ê时间后，知影「koh一pái 回心转意，走chhōe上主—in ê上帝，án-ne，就会知影怎样「敬畏上主，领受伊丰富ê赏赐」。

Chia ê「归回」一词，是何西阿chit本经册中ê主题之一。上帝用尽一切办法，beh hō͘弃sak ê以色列人民知影悔改，m̄-thang koh再继续过拜偶像ê生活。「归回」mā是teh表明「悔改」ê意思，这是非常重要ê信息。