何西阿书 2章14节 到 2章23节   背景资料  上一笔  下一笔
如果tio̍h用一句简单ê话形容先知文献ê特色,就是teh指出以色列人民背叛上帝,去拜偶像神明。伊kā上帝kah以色列人民之间ê关系,以「夫妻」ê关系来比并,说明以色列人民ná亲像时常红杏出墙ê淫妇一般,背叛了伊ê丈夫。伊mā指出siōng可恶ê一件事,就是以色列人民去拜偶像神明ê时chūn,iáu the̍h了上帝所赏赐kā in赐福ê各种食物当做献祭供物去祭拜,甚至讲hiah-ê lóng是偶像神明所赏赐ê,chit点明明是令上帝无法度原谅in。即使是án-ne,上帝是慈悲ê,他有丰富而且坚定ê疼,对悖逆ê以色列人民,他á是想出所有ê办法beh阻止以色列人民继续沉沦落去,希望in ē-tàng醒悟过来归向创造万物ê上帝。先知何西阿提醒以色列人民,如果in iáu继续去拜偶像神明,上帝一定会收tńg来他赏赐hō͘以色列人民所有ê一切。

现在chit段经文是先知何西阿koh一pái用爱情婚姻ê关系,形容上帝会以siōng koân ê爱情来对待以色列人民,为tio̍h是beh希望以色列人民会知影珍惜。上帝beh kah以色列人民重新立约,虽然他bat真受气以色列人民弃sak他,m̄-koh他á是iáu-koh teh疼in,想出所有ê办法beh hō͘ in归回到他ê身边来。Ná亲像一个仁慈ê丈夫,对待伊淫乱ê bó͘仝款,会一再呼吁tńg来到伊ê身边。

第14节,chit节讲上帝beh chhōa以色列人民tńg来「到旷野,安慰伊,赢tńg来伊ê心」。「旷野」chit-ê词可能指ê是以色列人民tī出埃及入旷野ê时代,hit时chūn ē-sái讲是以色列人民kah上帝之间是siōng亲密ê时段。因为tī旷野甚么都无,唯一ê óa靠就是全能ê上帝。现在上帝透过先知何西阿对以色列人民讲,他beh带领in到旷野,就是beh koh一pái hō͘ in学习知影真正性命ê主乃是创造万物ê耶和华上帝。Chit节ê「带领」mā是非常重要ê词,chit-ê词mā thang当做「鼓励」、「劝导」、「招呼」、「诱导」ê意思。Chit-ê词带有一而koh再、koh再而三ê动作ê意思。

第15节,上帝讲「beh kā葡萄园还hō͘伊」,原来是tī旷野之地,无任何ē-thang性命倚赖ê食物,现在却有葡萄园出现,这是真贵重ê礼物。用tī chia,就表示以色列人民会koh一pái明白:赏赐葡萄园kā in赐福,hō͘ in所栽种ê葡萄树ē-tàng结实累累ê,乃是耶和华上帝,m̄是巴力。

Chia ê「灾难谷」,thang参考约书亚记第七章22到26节,意思原本以色列人民因为干犯上帝ê禁令,应该是hō͘严厉ê惩罚。M̄-koh现在,上帝不koh án-ne对待in,而是beh hō͘ in ê性命有新ê希望,而且无koh有人因为违背上帝ê旨意受tio̍h连累。

第16节,节提起以色列人民kah上帝ê关系就是「夫妻」ê关系。这就是kui本何西阿书ê中心主题。Chia讲出夫妻之间ê关系是无法度分开ê,因为有性命相交缠ê关系,无法度分离。

第17节,就提起tī夫妻关系中,bē-sái有第三个对象介入其中,上帝beh以色列人民「忘掉」巴力。Chit-ê「忘掉」就是「根除」ê意思,连名mā无koh提起。

第18节,chit节thang看tio̍h上帝是怎样深深teh疼以色列人民。Chia讲上帝beh kah kui个受造物立约,包括飞禽、行兽、爬虫等物,就是为tio̍h beh hō͘所有受造物lóng知影上帝kah以色列人民乃是夫妻关系,bē-tàng伤害以色列人民,因为伤害in,等于是伤害上帝ê「bó͘」仝款ê严重。作者用chit种方式teh表明:上帝kah以色列人民之间ê关系是亲密到无法度分离ê状态。Án-ne,上帝kah以色列人民立ê「约」,就含有「安全」、「平安」ê意思。Ná亲像chit节所讲ê,上帝beh毁灭所有相战ê武器,他ê子民m̄免担心会有战争发生。Án-ne类似ê诗歌mā出现tī以赛亚书第二章4节kah弥迦书第四章3到4节。

第19到23节,这是一首非常好ê诗歌,koh一pái表明上帝kah以色列人民之间「夫妻」关系ê情景。上帝m̄-nā是beh娶以色列人民做bó͘,iáu koh khah用下列几项「礼物」当做聘金;

一、「仁义公平」:这是teh指上帝ê救赎bē有任何偏私。

二、「慈悲无变ê疼」:chia ê「慈悲」一词是teh指上帝ê引chhōa、保护。「无变ê疼」,指ê是上帝ê怜悯,是关怀in ê需要。这关怀是永恒ê,m̄是暂时性ê。

三、「信实」,指ê是诚实、可靠ê意思。换句话讲:以色列人民ná亲像嫁hō͘一个诚实、可靠ê丈夫仝款,m̄免担心会hō͘ hiat-ka̍k、遗弃,á是被出卖等等。

四、上帝会「垂听」以色列人民ê「祈祷」(tī中文《和合本》用「应允」,意思是仝款ê)。意思是teh指上帝听以色列人民祈祷后,会有实际行动ê回应kā in赐福,chiah-ê行动有两项具体ê内容,一是会hō͘土地产出「五谷、葡萄、橄榄」,而且是大丰收。二是koh一pái确认上帝kah以色列人民之间永远bē分离ê关系。

五、上帝ê应允,就是确认「约」ê关系—上帝就是以色列人民ê上帝;以色列人民乃是上帝ê子民。

重新查询 专卷研经 何西阿书系列
错误回报,请联系comm[@]fhl.net