Chit段经文特别强调地下深渊ê水冒出来，天空ê水闸门mā phah开，án-ne天顶kah地下脚互相夹攻人类khiā起ê大地，表示必定毁灭殆尽无疑。

第11到12节，chia讲出挪亚六百岁ê hit年「二月十七日」，大水开始泛滥，ē-sái讲是一发bē-tàng收拾。天顶ê水闸门phah开后，就「倾盆大雨」倒落来，á地下ê「泉源lóng裂开」，án-ne时间长到「四十暝日」，表示天顶降落ê水kah地下脚冒出来ê水，连续无停，直到饱和为止。

第13到15节，ná亲像重新创造仝款，所有进入大船中ê挪亚一家人，kah「野兽、牲畜、爬虫，kah飞鸟mā各照它ê类」，这mā表明非常有秩序tī大船中。大船本身ná亲像新ê创造一般。

第16节，「上帝替挪亚kā船门关起来」，这表示有上帝保护、看守，一定真安全，水bē渗透到船ê内面去。