创世记 47章1节 到 47章12节   背景资料  上一笔  下一笔
Chit章是由「祭司文献」(第5到6节a句、第9到11节、第28节),kah其余lóng是「耶和华文献」ê资料混合编辑而成ê。

Chit章主要teh说明约瑟án怎办理放粮ê政策,mā tùi chia看到落尾伊kā埃及全国人民lóng变成国王ê「奴隶」;意思是因为粮食缺乏ê问题,为tio̍h生存落去,大家lóng变成国王ê「财产」。

Chit段经文讲tio̍h约瑟礼貌上一定tio̍h带伊ê兄弟kah老父去晋见埃及国王。
第1到6节,chia讲雅各ê家族是tòa tī「歌珊地区」。歌珊,chit-ê字tī希伯来文是「边疆」意思,m̄-koh tī埃及人ê眼中却是「国中siōng好ê地区」(参考第6节、11节,对照四十五:18)。根据民数记第十一章5节ê记载,以色列人民(雅各后来tī埃及ê kiáⁿ孙)tī埃及ê时,是「常食鱼,m̄免开钱;iáu有黄瓜、西瓜、韭菜、葱、蒜等好食ê物件」,因为这地方土地相当肥沃,chiah有án-ne丰富ê物产。Mā因为án-ne,雅各家族tī chit-ê地方chiah ē-tàng快速成长,「以色列人gâu 生koh gâu 湠,人口加添真chē koh 兴旺,非常强盛,充满hit-ê 所在。(全民版)」(出埃及记一:7)m̄-koh却mā因为án-ne,后来遇tio̍h埃及人ê嫉妒、不满。

第2到4节,当约瑟带领伊ê「五个兄弟」去见埃及国王ê时,就ná亲像约瑟所料到ê,国王问约瑟ê众兄弟是「Lín做甚么头路?」?佳哉,约瑟有事先kā伊ê兄弟提起过,一定tio̍h讲是「以放牧牲畜为生」。伊ê众兄弟就照án-ne回答埃及国王,并且提请国王允准in tòa tī歌珊地区。

第5到6节,埃及国王一嘴就答应落来,并且mā ài in帮忙「看管伊ê牲畜」。这对雅各一家人来讲,真正是非常难得ê好机会kah礼遇。

第7到8节,约瑟mā引领伊ê老父雅各去晋见国王。Chia讲雅各看见国王ê时,就kā国王祝福,chit-ê意思是teh指礼貌上讲祝福ê话。Koh讲,因为雅各比国王ê年纪大,年长ê kā少年ê祝福,mā是当时中东地带ê一种礼节。

第9到12节,埃及国王一下见tio̍h雅各,就问伊几岁?雅各回答讲「有一百三十岁」,m̄-koh伊强调讲chit种年纪「koh短koh苦」,远不如伊ê祖先。这是一种谦卑、礼貌ê回答,伊用chit种方式来表达生活ê境遇真苦,特别是chit-má koh tú-tio̍h大饥荒,佳哉有埃及国王收容in。

第12节ē-sái讲是为雅各ê家族带来极大ê福利,因为in tī粮荒ê时代,大家lóng需要用尽家产chiah ē-tàng兑换到粮食维生,á in却thang得tio̍h免费ê配给粮食,同时因为替国王饲家畜,iáu有犒赏thang the̍h。


重新查询 专卷研经 创世记系列
错误回报,请联系comm[@]fhl.net