创世记 45章1节 到 45章15节   背景资料  上一笔  下一笔
Chit章是由「耶和华文献」kah「以罗伊文献」chit两种资料混合编辑而成ê。第1节a句、第2节b句、第4到5节a句、第9到11节、第13到14节、第19到21节a句、第28节lóng是属tī「耶和华文献」ê资料。其它lóng是属tī「以罗伊文献」。

Chit章主要重点khǹg tī约瑟kah伊ê兄弟相认,并且引起埃及国王ê重视,进一步koh正式邀请雅各家族进入埃及,hō͘ kui个约瑟族长ê故事达tio̍h siōng koân峰,mā是雅各家族进入埃及ê序曲。Koh讲,chit章iáu有另外一个主要ê目的,是teh说明约瑟确实是真有信仰ê人,伊kah伊ê兄弟重新修好,并无因为今á日ê发达,就kā过去ê积怨the̍h来做报复ê手段,无,因为伊是一个信靠上帝ê人,知影这一切lóng是上帝ê安排。

约瑟听完犹大讲顶面所讲ê经过,mā知影in兄弟确实疼便雅悯,以及对年老老父雅各ê忠实。伊深受感动,koh khah án怎都无法度忍tiâu内心ê激动,因为án-ne,命令所有身边ê随从lóng离开,伊向伊ê众兄弟表白家己ê身分。

第2节,chit节是为第16节后面,埃及国王听tio̍h约瑟kah兄弟相认ê事,做伏笔。Mā回应了第四十章14到15节、第22节约瑟向酒政长恳求落空ê事。原来伊讲hō͘人绑架,犯chit种错事ê就是伊ê兄哥。

第3到4节,约瑟向伊ê众兄弟公开家己ê身分就是in出卖到埃及来ê约瑟。In听当然会吓到无法度讲出话来,而且惊受tio̍h报复性ê惩罚。

第5到8节,chit段经文ē-sái讲是约瑟故事ê中心。主要teh说明chit件出卖伊ê事,完全是出tī上帝ê旨意,「为tio̍h保存大家ê性命」,上帝「亲自」差遣伊到埃及来ê。约瑟强调,一切lóng是出tī上帝特别ê旨意,ài伊来埃及管理粮荒年代ê事务,用chit种方法来救众人,特别是救家族ê性命。Chit种讲词,tú好说明约瑟tī信仰上ê敬虔kah谦卑。第6节讲大饥荒iáu有五年,表示iáu会真痛苦。

第9到15节,chit段经文为第四十六章先作一个序言,说明雅各后来带所有家眷、一切所有进入埃及ê原因。

Chit-má约瑟ài伊ê众兄弟赶紧tńg来到老父hia去,kā老父和全部家眷,包括家畜等所有财产chhōa过来埃及避难。伊叫众兄弟tńg去照伊,以及in亲目所见ê一切lóng向老父说明,thang hō͘老父雅各thang安心迁徙到埃及来。

约瑟siōng关心ê iáu是同母生ê小弟便雅悯,因为án-ne,两人相揽大哭,然后伊koh kah其他众兄哥相揽、chim嘴,chiah-ê动作lóng teh表明和好、亲密ê意思。Mā表示约瑟无koh为过去ê事受气、不满。

重新查询 专卷研经 创世记系列
错误回报,请联系comm[@]fhl.net