Chit章继续第四十三章描述雅各因为存粮已经用尽，koh一pái差遣众细kiáⁿ到埃及买粮ê情形，讲述约瑟án怎设计以知影伊ê众兄哥对待年老ê老父雅各kah年轻ê小弟便雅悯ê态度。chit章ê主题中心，是用犹大对约瑟ê表白做主轴，充分说明犹大后来继承「大kiáⁿ」名份ê角色kah意义。Tī前一章提起犹大出面向雅各表示伊愿意负起便雅悯安危ê责任，chit章则描述犹大就tī约瑟beh「扣」落来便雅悯ê时，伊出面解释一定tio̍h负起担保责任ê原因。犹大向约瑟表示愿意「终生担受罪责」做奴隶（第33节）。chit章内容有真大部分是重复叙述in出发前，tī厝里雅各kah伊众细kiáⁿ ê对话。

约瑟命令管家hō͘伊众兄弟ê粮袋装满粮食，并且koh khah重要ê是「Kā各人ê钱khǹg tńg去袋子里」，chit种情形kah第一pái去买粮ê时ê情形仝款（参考四十二：35）。Á chit-pái in带去ê钱是双倍，原因是beh kā第一pái买粮ê钱mā归还（参考四十三：12）。chit-má约瑟koh一pái kā chiah-ê钱lóng全部khǹg tī in ê粮袋中，á in kah第一pái买粮ê时仝款，并m̄知约瑟koh kā全部ê钱khǹg tńg去in ê粮袋中。

第2到3节，因为约瑟ê命令，除了埃及国王ē-tàng改变外，全埃及国ê人lóng一定tio̍h遵守。约瑟命令管家除了kā雅各ê gín-á带来ê钱全部lóng khǹg tńg去in ê粮袋，同时iáu beh kā约瑟专用ê「银酒杯」hē tī便雅悯ê袋子中。管家只有ē-tàng听从约瑟照án-ne去做。隔工就hō͘雅各ê 众kiáⁿ离开tńg去厝里。In终其尾顺利地kā西缅kah便雅悯chhōa tńg来。

第4到5节，续落来约瑟koh命令管家带人去追雅各ê众细kiáⁿ，并问in为甚么「以恶报善」，偷the̍h宰相ê「银酒杯」，强调he是宰相mā用来「占卜」ê神器，讲in「犯严重ê罪」。管家当然知影这一切经过，m̄-koh伊只有ē-tàng照宰相ê话去做。