创世记 42章1节 到 42章17节   背景资料  上一笔  下一笔
Chit章mā是用「以罗伊文献」为主轴,加上第2节、第4到5节、第7节、第27到28 节、第38节是用「耶和华文献」ê资料编辑而成。

对雅各来讲,约瑟ê事早已经过去,甚至认定伊已经被野兽所吞食(参考三十七:33)。换句话讲,tùi第三十八章到四十一章,是插入「以罗伊」典ê大部分资料,致使雅各以及伊gín-á kah约瑟之间关系ê连续故事中断à。编辑者利用chit段插入ê资料详细绍介了约瑟受卖到埃及后ê发展。然后,tī第四十二章用迦南地大饥荒,hō͘原本雅各kah约瑟之间断了ê音讯,开始有一丝连线ê发展。因为án-ne,chit章mā thang讲是约瑟故事ê第二个阶段。

Tùi chit章开始到第四十六章,lóng是用约瑟kah伊ê众兄弟会面ê经过为主轴,以及后来连in老父雅各mā kah伊会面。Chit段故事mā tú好应验了以前约瑟所作ê「梦」(参考三十七:9)ê实现。

开始chit句「埃及有粮食」,tú好回应了第四十一章49节,tī约瑟管理下ê埃及,kā七年丰收期间储存起来准备饥荒来临ê时thang用ê粮食。

埃及,自古以来一直是中东地区ê粮仓,á迦南地则不时发生饥荒(参考十二:10、廿六:1-2)。chit-má是koh一pái发生饥荒,迫hō͘雅各一定tio̍h差派gín-á去埃及买粮。

第1到4节,当雅各听tio̍h「埃及有粮食」,就差遣伊ê 众kiáⁿ去埃及购买。M̄-koh雅各kā伊疼ê拉结所生尾子便雅悯留tī身边。这可能kah雅各认为约瑟已经往生,伊无法度koh再hō͘便雅悯koh死去有关。

第5到9节,雅各ê kiáⁿ一到埃及,就去见约瑟,beh向伊买粮食。因为伊已经是埃及首相,而且管理粮食政务,á这mā是当时siōng重要ê政务,伊thang决定卖á是m̄卖。当chiah-ê众兄哥一下见tio̍h约瑟,随时就「坦覆 (thán-phak)tī土脚叩拜」,chit句话tú好回应了第三十七章7节约瑟所做ê梦。Koh khah重要ê,是经过十gōa年时间,伊ê众兄哥早已经bē记得伊,而且bē认得伊,m̄-koh约瑟却一见面就认出是伊ê众兄哥。因为án-ne,故意问in tùi tó位来?并且假做怀疑in是来做侦探,并m̄是真正beh来买粮食。

第10到13节,chiah-ê众兄哥回答否认约瑟ê质疑,甚至自认是「老实人」。这听tī约瑟耳中,一定会感觉真荒谬。因为án-ne,伊故意koh一pái强调in是「探子」,m̄是「老实人」。Chiah-ê众兄哥为tio̍h beh证实家己ê清白,就kā身世背景小khóa说明一下,m̄-koh in讲「有一个小弟已经死去」,in并m̄知hit-ê in眼中认为已经死去ê小弟,就khiā tī in面前。

第14到17节,chia约瑟第三pái指控伊ê众兄哥是「探子」,并且ài in tńg去带siōng小ê小弟便雅悯来hō͘伊看,若无,就无法度证明所讲是真。为tio̍h án-ne,iáu拘禁in「三工」。约瑟chit种做法ē-sái讲是hō͘伊ê众兄哥一个下马威。

重新查询 专卷研经 创世记系列
错误回报,请联系comm[@]fhl.net