Tùi顶pái约瑟提醒酒政长chhōe机会kah埃及王讲伊是hō͘人绑架卖来埃及ê（参考四十：15），到落尾酒政长出监狱复职了后，kā约瑟ê事bē记得kah chheng-khì-liu-liu（参考四十：23），到chit-má因为埃及王连续做两个梦bē-tàng解ê时，伊chiah想起家己tī王宫监狱tú-tio̍h约瑟会解梦ê事，án-ne已经经过两年ê时间（第1节）。酒政长kā约瑟替伊kah厨房长解梦ê经历kā埃及王讲，主要目的是建议国王请约瑟来听伊ê梦看māi，有可能会有解梦ê可能á无。

Tī chit段叙述中，酒政长无bē记得提醒埃及王，约瑟是一个「希伯来青年」。Chit种提醒真重要，因为tī埃及人眼中希伯来人地位相当低贱（参考四十三：32），何况koh是一个奴隶而且囚犯。高贵ê埃及王是m̄是ài beh见chit种对象？这只有国王家己chiah ē-tàng决定。