创世记 31章22节 到 31章44节   背景资料  上一笔  下一笔
利用拉班无tī厝ê时chūn,雅各带tio̍h全家大细kah所有ê财产「偷偷á走去」,离开伊khiā起长到二十年久ê丈人mā是阿舅拉班ê厝。

第22到25节,「三工」,这表示有一段真长ê距离ê意思,拉班chiah得tio̍h消息知影chit件事。所以伊需要用一倍ê时间七工来追赶,chiah tī「基列山区」jiok-tio̍h雅各。拉班带领「族人」来jiok,而且ē-tàng jiok-tio̍h,表示伊ê能力iáu-koh比雅各khah强真chē。M̄-koh第24节是真重要ê一节,chit节讲上帝警告拉班,「bē-tàng随便威胁雅各」,表示上帝一直teh庇护tio̍h雅各,只要拉班出手攻击,上帝一定会反击。

    第26到30节,chit段经文是拉班对雅各ê谴责。Tī chit段谴责ê话中,主要有两项:一是雅各为甚么无告别to̍h离开?二是为甚么beh偷伊ê神像?其实拉班chit种谴责mā包含两件事:一是雅各chit种作法,hō͘拉班tī宗族之间面子sià了à。因为连tī in-tau工作二十年ê kiáⁿ婿lóng会瞒伊来离开,甚至包括伊ê cha-bó͘-kiáⁿ、孙á,竟然无一个人kā伊讲、向伊告辞。二是伊认为雅各kā贵重ê财产mā偷偷á带走了(参考三十二:13—15),hō͘伊损失非常重。原因是神像有保证财产权ê含意。Á雅各却kā伊ê神像mā偷,意思是teh指神像若是被偷,等于伊无法度证明雅各手中所有ê牛、羊、骆驼、驴等,是属tī伊ê。最后伊强调有能力伤害雅各,m̄-koh因为有上帝阻止,chiah hō͘伊决定bē出手。

    第31到32节,chit两节是雅各ê回答。伊承认家己真惊拉班「用武力」,因为伊知影拉班比伊ê气力khah强。M̄-koh伊强调家己并无「偷」拉班ê财物(神像)。伊愿意在拉班ê亲族面前接受搜查。原来伊并m̄知拉结暗中偷the̍h老父ê一kóa神像。

    第33到35节,雅各因为m̄知拉结偷the̍h伊老父ê一kóa神像,因此随在拉班搜查。Á拉结则因为偷the̍h神像,一定tio̍h想办法隐藏。伊利用中东地带视妇女生理周期来无清气,bē-tàng接触做理由,阻挡老父拉班搜查伊kah伊ê行李。拉结chit种坐tī装神像ê袋子上ê行为,mā teh表示chiah-ê神像并m̄是真正神。所以用chit种方式侮辱in,mā bē有任何反应。

    第36到42节,雅各因为拉班搜chhōe bē-tio̍h任何赃物,就用强硬ê语气质问拉班,伊当tio̍h拉班带来ê亲友面前提出两项反控:一是拉班指控伊偷the̍h物件,一定tio̍h提出搜查后ê证据,hō͘亲族作公亲审判。二是拉班非常刻薄,欺负伊。因为过去二十年tī in-tau工作,拉班并无好款待伊,而且iáu tī最后六年期间,有chē kah「十pái」改应该有ê工钱,这tú好thang证明是拉班偷伊ê钱。最后,雅各强调是因为上帝kā伊庇护、带领伊,chiah hō͘伊bē致使「空手离开」,意思是teh指hō͘伊bē致使沦为奴隶。第42节是雅各脱离灾难ê中心经文,伊强调若m̄是有上帝ê保护,伊无可能逃离拉班ê手。

    第43到44节,拉班所讲ê话,tú好说明雅各心中ê忿怒kah giâu疑。

注意第43节,拉班强调包括利亚、拉结,kah所有ê孙á lóng是属tī伊ê。原因是当年雅各是「逃走」到伊hia去「避难」ê。所以这二十年来,雅各tī拉班ê眼中一直是「奴隶」ê身分,并无真正kā伊当做侄á á是kiáⁿ婿看待。奴隶ê财产是属tī主人ê,即使伊结婚所生落来ê gín-á mā是(参考出埃及记廿一:3—4)。不过有一点无仝款ê所在,就是当年雅各娶bó͘ kah得tio̍h有斑点ê羊群、牛群等,lóng是kah拉班事先讲好ê「约」。这mā就是为甚么当雅各向两个bó͘解释想beh逃离丈人ê厝时,两个bó͘同时讲老父拉班kā in「当做外人,卖了咱,koh吞食卖咱ê身价」ê理由。

重新查询 专卷研经 创世记系列
错误回报,请联系comm[@]fhl.net