创世记 21章22节 到 21章34节   背景资料  上一笔  下一笔
Chit段经文kah第廿六章以撒kah亚比米勒ê族群争夺水井ê记事有类似ê所在。水井,对当时游牧民族来讲是相当严肃ê事,因为这牵涉tio̍h生存ê问题。早tī亚伯拉罕kah侄á罗得之间就有chit种问题(参考十三:1—9)。当时亚伯拉罕就真有大族长ê风度,hō͘罗得家己选择伊想beh ê区域。

Chit-má是亚伯拉罕kah亚比米勒之间ê奴仆,为tio̍h争水井ê问题á卯上à。Tio̍h注意ê是亚伯拉罕先用「七」只小母羊当做代价,然后chiah讲in是证明该水井是属tī亚伯拉罕ê证物。Chit种作法mā是一种技巧kah谋略。人类社会ê问题,小ê tùi家庭中ê地位、争家产,大ê到kui个家族地位、祖产,甚至到国家、区域ê领导权、经济利益等。Chit段经文teh说明人kah人之间ê问题就是在tī经济利益。

第22到24节,chit段经文说明亚伯拉罕因为有上帝同在,因为án-ne tī「每一件事」lóng显示兴旺ê气力。亚比米勒ê元帅出面讲话,mā teh暗示亚伯拉罕族群ê发展,已经威胁tio̍h基拉耳ê安危。因为án-ne,用chit种方式mā teh表明双方和平共存ê约定。

第25到31节,chit段经文说明亚伯拉罕真有技巧地用「七只小母羊」kah「一kóa牛羊」作礼物kah证物,当做家己挖到ê井ê权利,免得koh再有任何纠纷出现。

第32到34节,种树mā teh表示占有ê记号,m̄-koh亚伯拉罕真清楚,若无上帝带领,伊ê努力会付诸流水。因为án-ne,敬拜上帝,mā teh表明需要上帝ê带领kah看顾,特别是寄居tī异域之地koh khah需要上帝ê保守。

重新查询 专卷研经 创世记系列
错误回报,请联系comm[@]fhl.net