创世记 2章1节 到 2章17节   背景资料  上一笔  下一笔
创造中以「第七工」达tio̍h高峰。作者讲上帝因为「完成了伊创造ê工作就歇工」,这表示第一章所叙述ê创造已经全部完工,因此tī chit-ê「第七工」歇工歇困,m̄-koh上帝特别「赐福」、「圣化」chit工。这mā是第一个创造故事siōng重要ê中心思想。

「安息日」就是tùi chia延伸出来ê(参考出埃及记二十:8—11)。作者讲chit工是带有上帝「赐福」ê日子,mā就是tī chit工所有ê人lóng tio̍h停止一切工作,专心敬拜上帝,用chit种方式来回应上帝ê疼,mā因此得tio̍h上帝ê赐福来加添性命ê气力。

Chit段经文通常hông称做是第二个创造ê故事。

Chit份创造ê资料来源,比头前第一章创造ê资料来源会khah早。Tī chit份创造故事中,作者以「地」做基础,以「人」做中心,人是一切受造物ê开始,然后地上所有受造物lóng是为tio̍h人ê需要来造。Chit-ê观念kah第一章所表达ê人是万物最后chiah造出来,为tio̍h是beh替上帝管理受造物,二者之间看法完全无仝。

作者用「拟人法」chit种特殊笔法写创造ê故事,亲像:上帝用捏土ê方式造人,这就ná亲像一个陶匠teh捏造陶器仝款。Kah下一章kah人讲话ê景况,lóng是kā上帝以「人ê型态」表达出来。

第5节,chia有一个关键ê字眼,就是「无」。作者以「无」当做创造ê开始,表明ê kah第一章是仝款ê基本信仰:上帝是tùi从来m̄-bat有来开始他ê创造。作者特别强调tú开始之初,地上无草木、菜蔬、雨水等,意思是teh指一切生物lóng iáu未开始,mā无生存ê条件。

第7节,chit节讲上帝造人了后,「Kā性命ê气pûn入去」人ê鼻孔,hō͘人「成做有性命ê人」。重点tī上帝「pûn气」。Chia所讲ê「气」并m̄是指「灵魂」,却是teh强调人会「有性命」,是kah上帝有bē-tàng分离ê关系。Á第一章则重视tī人ê身上有「上帝ê形像」(参考一:26—27)。

第8到15节,chit段经文开始绍介「伊甸园」,意思是teh指「乐园」。有含「快乐」、「欢喜」、「满意」ê意思,mā thang讲是一种性命ê泉源ê意思(参考以赛亚书五十一:3),ná亲像顾羊人牧放牛羊四界chhōe青草水源时,发见一大片绿洲ê心情般,hit种兴奋之情,表达出来ê是ná亲像chhōe-tio̍h一片「伊甸园」。

Tī「伊甸园」中有「相对」ê存在,一是赐性命ê树,二是hō͘人辨别善恶ê树。所谓「辨别善恶」是teh指:hō͘人远离认bat上帝。

Chit段经文为第三章人犯罪先埋一个案底,因为人并无注意tio̍h tī siōng súi ê伊甸园中有「约」。

第15节,是chit-ê创造故事ê中心经文:chia讲上帝造人,为tio̍h是beh人「种作」,看守「伊甸园」。这kah第一章所提起ê上帝ài人管理万物ê意思仝款。

第16到17节,chia真清楚提起禁止令,就是「绝对bē-sái食」园中hit丛「ē-tàng hō͘人辨别善恶ê树所结ê果子」,若食了,「hit工一定会死」。Chia所讲ê「死」,表明kah上帝创造ê本意相违背,会hō͘上帝隔离出来。

重新查询 专卷研经 创世记系列
错误回报,请联系comm[@]fhl.net