Chit段经文主要是teh讲述摩押人kah亚扪人ê祖先是tùi何而来ê。Koh讲，chit段经文mā提供一个重要ê题材：以色列人民kah摩押人、亚扪人之间ê深仇大恨之背景，chit点tùi民数记第廿二到廿五章，申命记第廿三章3到6节，以及士师记第三章12到30节等等，thang看tio̍h以色列民族kah chit两个民族之间ê对敌状态。M̄-koh，当以色列人民对摩押人、亚扪人带有历史情结ê仇恨、歧视时，路得记chit本经册ê作者提供了另外一个观点，是非常值得大家注意ê。

Chit段经文mā是有关罗得记事ê结束，tùi第十一章记载伊丧父，到第十二章伊跟tòe伯父离开哈兰，然后选择看起来真肥美ê土地khiā起，却因为án-ne远离了上帝透过亚伯拉罕带来ê赐福，á kah罪恶tòa做伙，结果是丧失了所有ê一切。

Koh讲，醉酒sià面子，这mā是挪亚事件了后ê另外一个例（参考九：21—27）。圣经作者一再提醒bē-tàng醉酒，因为会乱了该做ê事（参考箴言三十一：4，以赛亚书廿八：7，罗马书十三：13，哥林多前书五：11、六：10）。

第二十章除了最后一节（18节）是「耶和华文献」ê资料以外，其余所有ê 17节lóng是属tī「以罗伊文献」ê资料。

Ná亲像头前已经叙述过ê，有关亚伯拉罕kābó͘撒拉当做家己ê小妹看待，chit件记事应该kah第十二章、第廿六章可能是仝一件事，m̄-koh，经过无仝ê流传kah资料ê收集有差别。因为如果照经文ê编辑顺序看，chit时ê撒拉应该mā有八十九岁了，而且已过了更年期，根本无算是所讲ê súi、少年。M̄-koh，ná亲像tī前段所讲ê，这是「以」典提供ê资料，á第十二章则koh khah古老ê「耶」典资料，表明he是无仝资料ê来源。

Tio̍h注意ê是：kui个故事ê中心内容是tī第3到13节ê对话、辩解等chit部分。重点在tī beh厘清tāi-chì ê真相：到底是甚么人tio̍h、甚么人m̄-tio̍h。

Chit段经文mā提供一个真重要ê信息：上帝会阻止人犯罪，bē hō͘无辜ê陷入罪恶中。只要人ê心中保持纯洁ê心仰望上帝，上帝必定会设法阻止无辜ê犯罪。