创世记 18章1节 到 18章15节   背景资料  上一笔  下一笔
第十八到十九章全部lóng是「耶和华文献」ê资料。Chit种文献tī创世记中占有真大ê份量,包括第二章、第三章、第四章、第十二章、第十三章、第十五章,kah第十六章lóng是属tī chit种文献。这两章lóng是讲tio̍h有关上帝毁灭所多玛城ê故事,hō͘读者印象相当深刻。头前有提起过,「耶和华文献」ê特色,就是用「拟人化」ê笔法teh讲述上帝kah人之间ê关系。Ná亲像第三章,讲上帝tī伊甸园里kah人直接对话。这两章mā是án-ne,上帝亲自kah亚伯拉罕讲话,甚至thang讨论有关所多玛城发生ê问题。Á这两章ê重点就tī第十八章17到19节所提起ê,上帝kah亚伯拉罕有特别亲密ê关系,因为án-ne,上帝kā准备ài惩罚所多玛城ê计画kā亚伯拉罕讲。

上帝亲自显现tī亚伯拉罕ê面前,chit种笔法就是「耶」典资料ê特色,mā说明tī上帝眼中,亚伯拉罕确实是无仝款ê族长。作者并无说明上帝是用怎样ê形式出现 tī亚伯拉罕面前,thang hō͘伊一看就知影he是上帝。作者beh表明ê一个信念:kah上帝有亲密关系ê人,只要一看,就会清楚知影三个人中间必定有上帝ê天使,kah上帝亲自在中间。因为án-ne,当伊一看见这三人行过来,就赶紧趋向前去,而且用「坦覆 (thán-phak)在地」ê方式迎接in三人。Chit种态度tú好说明亚伯拉罕知影in三人m̄是一般人,而且有上帝现身tī伊目chiu前。

第3到5节,第3节chia用「我主」一词,表示单数。亚伯拉罕清楚知影这三人中间有一位是领导者,á是主要ê对象。伊beh接待in,希望in ē-tàng留落来做客。In接受亚伯拉罕ê邀请,成(chiâⁿ)实留落来接受招待。Mā因为án-ne,希伯来书ê作者劝勉早期教会ê信徒,讲:「M̄-thang bē 记得接待出外人,因为án-ne 做会tī 无意中接待tio̍h 天使。(全民版)」(希伯来书十三:2)这ē-sái讲是亚伯拉罕ê亲身经历。

洗脚,这是中东地带非常重要ê待客礼节。耶稣bat受邀请去一位法利赛人西门ê厝作客,m̄-koh西门却无the̍h水hō͘耶稣洗脚,ē-sái讲有一位hō͘人认为是「罪人」ê cha-bó͘人,却用伊ê目屎kā耶稣洗脚,然后用珍贵ê香油膏耶稣ê脚(参考路加福音七:37—39)。Tī最后晚餐ê时,耶稣亲自the̍h水为门徒洗脚(参考约翰福音十三:5),然后希望门徒mā kah伊仝款ê态度学习谦卑家己(参考约翰福音十三:14—15),m̄是beh做别人ê领袖,是beh成做众人ê奴仆(参考马可福音十:45)。

第6到8节,重点并m̄是在tī亚伯拉罕án怎煮食佳肴待客,却是伊真诚ê热情,说明伊kah上帝之间美好ê关系。

第9到15节,chit段经文koh一pái说明上帝对亚伯拉罕ê应允并无改变,他清楚kā亚伯拉罕讲,一年后chit-ê时chūn,撒拉一定会有娠生kiáⁿ。Chìn前亚伯拉罕偷笑,chit-má换做撒拉bih tī帐棚后面「偷偷á笑」,原因是伊清楚知影家己ê 更年期已经过,因为chit时她已经八十九岁ā,用人ê理解kah能力,是绝对无可能有娠生kiáⁿ。M̄-koh圣经作者就是beh强调tī上帝手中,无无法度成就ê事,这mā是第十七章1节所强调ê,上帝是全能ê意思。

Chit段经文siōng主要是teh表明上帝对亚伯拉罕ê应允teh beh实现,而且已经订出时间表,就是tī一年后。这kah以前只有kā亚伯拉罕讲beh赐hō͘伊kiáⁿ,ná亲像天顶ê星辰、海边ê细沙hiah-ni̍h chē,真无仝款。Chit-pái是kā伊讲明确ê时间是tī一年后,伊ê bó͘撒拉会生一个kiáⁿ。圣经作者一再强调一件事:上帝所应允ê约必定会实现,而且实现ê时间mā是tī他ê计画中,m̄是人ē-tàng替上帝决定时间。性命ê事,lóng是tī上帝手中,上帝决定性命ê时间,生kah死lóng是tī上帝ê手中决定。


重新查询 专卷研经 创世记系列
错误回报,请联系comm[@]fhl.net