创世记 16章1节 到 16章4节   背景资料  上一笔  下一笔
第十六章则由古老ê「耶和华文献」、稍晚ê「以罗伊文献」,kah「祭司文献」合编而成。其中「祭司」ê资料只出现 tī第1、3、15到16节,á「以」典ê资料mā kan-taⁿ出现 tī第9、10两节,其余lóng是「耶」典ê文献。

创世记chit本经典其实mā是一本讲以色列chit-ê家族发展ê一本经典。Tùi第十六章开始,真具体讲tio̍h chit-ê家族里所发生ê各种人、事ê问题。亲像有亚伯兰kah 伊ê bó͘撒拉ê问题;有以撒kah伊ê gín-á以扫、雅各ê事;有雅各kah十二个gín-á之间ê互动关系,以及这十二个gín-á彼此之间互动所延伸出来ê问题。Mā有撒拉kah夏甲 ê纠纷,有利百加kah家己所疼ê kiáⁿ雅各之间发生ê问题。串连其中ê是利亚kah拉结两位姊妹之间争夺丈夫之战。作者用chit种材料构成以色列十二支族间ê关系,同时用上帝立「性命ê约」来说明上帝ê拣选,kah他拯救工作ê信仰意义。

续落去tī十五章了后,chit章说明亚伯兰ê信心出了状况。虽然上帝有应允,而且mā真清楚kā伊讲,只有伊亲生ê kiáⁿchiah是伊真正继承人(参考十五:4b)。M̄-koh,无kiáⁿ续接产业,á是家族性命,tī当时ê社会乃是一件大事。因为án-ne,亚伯兰ê bó͘撒拉对伊献计,hō͘婢女夏甲来kah亚伯兰同房,thang延续下一代ê性命。撒拉chit种作法,mā同时teh表明伊对上帝ê应允并无信心,á亚伯兰会接受撒拉ê献计,mā说明伊对上帝hō͘伊ê应允,无坚定ê信心。人用家己ê方式,取代上帝ê应允,结果kan-taⁿ会为家己带来koh khah chē ê烦恼而已。

Chit段经文说明撒拉并无因为hō͘夏甲 kah亚伯兰同房á hō͘家己ê计谋成功来欢喜,颠倒,却为家己带来koh khah大ê困扰,因为家己无法度有娠soah hō͘夏甲看bē起她。早期东方社会对cha-bó͘人hō͘ in ê评价,是看她是m̄是ē-tàng有娠生kiáⁿ来决定,一个cha-bó͘人ē-tàng有娠生kiáⁿ,chiah有存在ê价值。


重新查询 专卷研经 创世记系列
错误回报,请联系comm[@]fhl.net