创世记 12章1节 到 12章9节   背景资料  上一笔  下一笔
第十二章开始到第五十章,是创世记ê第二部分。Chit-ê部分是用四个族长ê历史为主轴,说明上帝kah所拣选子民之间ê关系。Tī chit四位族长中,以亚伯拉罕kah雅各ê份量siōng重,记载篇幅siōng简短ê是用撒,用约瑟结束族长历史,m̄-koh,约瑟并无被列入tī后代ê族谱中,却是用雅各ê第四个kiáⁿ犹大当做族谱传承ê代表(参考马太福音一:1,路加福音三:34),有可能就是一般所讲ê「人对家己ê祖先之记忆,只限tī三代」。Chit三代就是teh指亚伯拉罕、以撒kah雅各。虽然án-ne,族长历史lóng环绕tī一个重要ê主题:上帝ê拣选kah拯救。

族长历史mā呈现出创世记编撰者想beh处理人类社会ê基本问题,就是家庭所延伸出来ê各种关系。Tī第十二章开始到第廿五章,chit段有关亚伯拉罕族长ê历史中,编撰者kā重点khǹg tī上帝拣选ê族长,怎样回应上帝拣选ê呼召,以及tùi立约得tio̍h上帝赐福。Mā thang án-ne讲:族长历史,就是teh讨论上帝ê拣选kah永bē改变ê约ê关系。

族长ê历史mā关系tio̍h性命ê生kah死ê问题,而且mā thang看见家庭制度ê建立,包括处分财产、律法条文,kah盟约ê问题。Tī最后约瑟族长ê记事中,mā thang看见家庭kah王朝之间ê互动关系。族长历史mā thang看出家庭延伸出来ê是族群,续落来是国家。Chi̍t中间,以家庭kah家族之间关系为重。

第十二章一开始就讲tio̍h上帝拣选亚伯兰。亚伯兰(á是亚伯拉罕)被拣选ê记事,mā ē-sái讲是以色列民族历史ê开始。

圣经谈论拣选,表明ê意思是kah「约」有关系,á拣选必定带来ê是「拯救」。因为án-ne,tùi约→拣选→拯救→上帝ê恩典,这是连结做伙ê。每pái讲tio̍h上帝ê恩典ê时,就会提起上帝ê拯救,并tùi拯救看出上帝拣选kah立约ê背景。

亚伯兰á是亚伯拉罕,chit两个名词ê意思lóng是teh指「崇高ê父」。这表达了两个层面ê意思,一是teh指亚伯兰会成做万民、万邦ê老父。二是teh指伊所信仰ê上帝,就是众人ê上帝。这mā是为甚么后来teh绍介耶和华上帝时,通常lóng会用「亚伯拉罕ê上帝」,原因tī-chia。

上帝拣选亚伯兰ê第一个命令,就是ài伊离开本来ê一切。换句话讲,这是一个全新ê开始,需要kā旧ê放弃掉,án-ne chiah会有新ê开始。就亲像上帝拣选挪亚仝款,全部tùi头开始做起。亚伯拉罕一定tio̍h「离开故乡、亲族,kah老父ê厝」,这对一般人来讲却m̄是一件容易ê事。

Koh讲,离开本来ê故乡kah亲人,照约书亚记第廿四章2节ê记载,原本亚伯拉罕所khiā起ê所在哈兰,是一个「拜别ê神明」之地。因为án-ne,上帝ài伊离开崇拜虚假神明之地,ē-tàng专心一意忠实tī上帝。

第三点,离开亲人、家族,mā teh说明kā人所óa靠ê气力放落,只有án-ne,人chiah会专心óa靠上帝。后来以色列人出埃及进入旷野,mā说明chit-ê意义。

第四点,值得注意ê是上帝并无明确讲出beh带领亚伯兰去tó位,只有讲tio̍h去他所beh「指示ê所在」,希伯来书ê作者因为án-ne讲亚伯兰确实是对上帝有绝对ê信心(参考希伯来书十一:8—10)。

第2节,chit节是说明上帝为何拣选亚伯兰,siōng重要ê意义就是beh藉tio̍h亚伯兰赐福hō͘万民。受上帝拣选,并m̄是beh kā上帝ê恩典独占来享受,á是beh成做上帝ê同工,hō͘ koh khah chē人得tio̍h利益。

Koh讲,上帝讲beh「赐福」hō͘亚伯兰,这是一种应允,mā是一种特有ê福气。这「赐福」一词kah创世记第一章28节所用ê词仝款,表明hō͘亚伯兰有充沛ê性命力,thang延续性命到后代kiáⁿ孙。

第3节,充分显示上帝kah亚伯兰同在,因为án-ne,甚么人祝福亚伯兰,等于teh回应上帝ê疼。相对ê,若是「诅咒」亚伯兰ê,等于kah上帝相对抗仝款。因为án-ne,第3节mā thang án-ne了解:亚伯兰ê朋友,就是上帝ê朋友;亚伯兰ê敌人,就是上帝ê敌人。

第4节是非常重要ê一节,kā亚伯兰对上帝ê信心完全显露,伊「遵照上帝ê指示」去做,然后第5节讲伊就带tio̍h bó͘、家当,以及伊ê侄á罗得同齐离开哈兰。

第6到9节,亚伯兰对上帝ê忠实,tùi伊到示剑ê时起祭坛敬拜上帝thang看出来。然后到伯特利mā是仝款起造祭坛敬拜上帝。

起造祭坛代表两种意义:一是表示家己ê势力范围,二表示kah上帝ê关系亲密结连。上帝对亚伯兰显现,mā teh表明他一直kah亚伯兰同在,虽然并无说明到底beh去tó位,m̄-koh却一直teh陪伴伊、保护伊,带领伊。

重新查询 专卷研经 创世记系列
错误回报,请联系comm[@]fhl.net