创世记 12章10节 到 12章20节   背景资料  上一笔  下一笔
Chit段经文ê记事tī第二十章、第廿六章lóng重复出现,因为án-ne,tī圣经学界引起真chē议论。真有可能是仝一件事,经过真chē无仝ê传述后有差别,m̄-koh lóng表明圣经beh说明ê一个道理:有上帝同在,并无表示lóng bē tú-tio̍h困境,却是有够额ê性命力,ē-tàng超越困境,甚至赢过困境。Tī chit段经文中描述亚伯兰tú-tio̍h饥荒,tùi án-ne进入埃及,m̄-koh mā同时面临性命危险。

第10节第一pái提起埃及对以色列民族ê「贡献」,因为án-ne,摩西律法清楚ài以色列人民「bē-tàng轻视埃及人」(参考申命记廿三:7)。圣经真chē pái提起埃及常常是以色列民族「避难」ê场所,亲像:后来雅各家族因为饥荒ê缘故进入埃及(参考四十二章起);耶稣降生时,希律王下令杀灭所有犹太人两岁以下ê男婴,耶稣ê父母为tio̍h避难mā进入埃及,直到大屠杀事件过了后chiah tńg来(参考马太福音二:13— 23)。

Chit段经文mā thang看tio̍h亚伯兰不诚实,而且因为chit-pái ê不诚实换来到「真chē牛、羊、驴、骆驼,kah奴隶」,chit种不义之财真紧to̍h teh kah罗得分地时消失à。Koh khah严重ê是,原本亚伯兰受呼召是beh hō͘ koh khah chē人得tio̍h上帝赐福,m̄-koh却因为伊不诚实, hō͘帮助伊ê埃及王国m̄-nā无得tio̍h赐福,反tńg带来灾难,这是真值得深思ê一件事。

另外一方面,亚伯兰会án-ne做,mā是一种权宜之计,因为当时有chit种风俗:为tio̍h beh夺取对方ê bó͘,可能会动用武力强夺。亚伯兰知影家己无法度赢过埃及国王,为tio̍h要求得生存,只好用chit种方式保护kui个家族。M̄-koh上帝为tio̍h beh实现他对亚伯兰拣选ê应允,因为án-ne,hō͘埃及发生传染病,hō͘埃及国王明白家己所犯ê 错误。

另外一种看法:埃及发生传染病,埃及国王卜卦了后知影kah伊娶撒拉做bó͘有关系。因为án-ne,认为撒拉是一个祸首,怪罪亚伯兰无告知,并且赶紧kā它驱离出境。

重新查询 专卷研经 创世记系列
错误回报,请联系comm[@]fhl.net