以斯拉记 9章1节 到 9章15节   背景资料  上一笔  下一笔
Chit章主要是记载以斯拉为人民所犯ê错误献上ê祈祷文。真正ê问题并m̄是通婚ê问题,却是因通婚来致使以色列人民跟tòe去拜当地ê偶像神明,án-ne chiah是第1节所讲ê「做仝款可恶ê事」ê意思。Á koh khah严重ê是连人民ê领袖mā án-ne,无坚持信仰ê原则,chit种事例kā引发连串ê问题,包括带外族人进入圣殿参与祭祀礼仪,这会hō͘人认为污秽了圣殿ê圣洁、神圣,连带影响tio̍h hiah-ê遵守圣洁礼仪ê人ê心灵平静。

第1到2节,chia提起以色列人民ê宗教领袖带獳「做仝款可恶ê事」,这是teh指「以色列人民、祭司,kah利未人」,in并无kah迦南地ê人「隔离」出来,却是家己á是家己ê kiáⁿ孙lóng kah chiah-ê外族人通婚。因为这是违背摩西律法ê行为,原因是in会藉tio̍h通婚,致使对耶和华上帝ê忠实心灵降低á是减弱(参考出埃及记三十四:16)。

第3到5节,chia讲以斯拉听tio̍h chit-ê消息,痛心到极点,因为án-ne,伊用「拆裂衫裤,koh拔头毛kah胡须」,来表示伊心中ê悲愤。这「拔头毛kah胡须」chit种动作,是圣经中唯一ê一pái,用来表示心内非常痛苦ê方式。尼希米ê作法则拔掉hiah-ê娶外族人做bó͘、背叛上帝ê人ê头毛(参考尼希米记十三:25)。以斯拉ê反应会án-ne激烈,是因为过去会亡国,就是以色列人民弃sak上帝,跟tòe外族人去拜偶像ê结果。伊知影上帝会对付chiah-ê tùi奴隶之地巴比伦tńg去ê以色列人民,若是in koh一pái悖逆上帝旨意ê话,一定会受tio̍h严厉惩罚。就án-ne,以斯拉teh献晚祭ê时chūn,伊无换衫裤,iáu-koh穿插拆裂ê衫裤跪落来向上帝祈祷。

第6到9节,chit段以斯拉向上帝祈祷ê内容,主要是认罪。以斯拉承认回乡ê以色列人民án-ne做,是得罪上帝ê行为。伊表示过去以色列人民kah祭司kah王等官员会hō͘掳,就是因为得罪上帝所带来ê结果。M̄-koh即使án-ne,上帝iáu是怜悯,hō͘以色列人民中间留落来一kóa残存ê子民thang脱离束缚,重见光明。chit-má iáu hō͘波斯皇帝好款待以色列人民,hō͘ in thang tńg去故乡重建毁坏ê圣殿,并且hō͘ khiā起犹大kah耶路撒冷ê人民thang得tio̍h安全。

第10到12节,chia以斯拉讲chit-má竟然违背先知警告过ê话,就是bē-tàng重犯过去kah外族人通婚致使弃sak上帝ê事。摩西律法有真清楚规定禁止kah外族人通婚,原因是beh防止in因为án-ne而弃sak上帝,跟tòe去拜别ê神明(参考申命记七:3—4)。以斯拉tńg来到故乡后,siōng致意ê就是tī耶路撒冷kah犹大地区,大力推动全民重新tńg来遵守摩西ê律法,而且伊是亲自教导民众认bat kah遵守实行摩西律法(参考以斯拉记七:10)。

第13节,chit节真重要,以斯拉表示上帝ê恩典表现tī:以色列人民无论犯jōa大ê罪,上帝对in ê惩罚lóng是比in犯ê罪轻。Chit句话tú好说明上帝并无按照人所犯ê罪来惩罚,mā无因人所犯ê过错而施行报应(参考诗篇一○三:10),m̄-koh chit句话mā teh表示上帝有丰富ê恩典,ē-sái讲是人却m̄知感恩,却是一犯koh再犯。

第14到15节,就是因为上帝án-ne特别ê慈爱,以色列人民应该知影珍惜、感恩。M̄-koh chit-má tú好颠倒,m̄-nā m̄知感恩,iáu去做chit种惹怒上帝ê事。

Tùi chit篇忏悔文中,thang看出重点主要有两点:一是提起有关「残存ê人民」chit种观念。Mā就是讲以色列民族原本因为弃sak上帝可能致使亡国kah灭族,却因为上帝ê怜悯,hō͘ in留落来「残存之民」(第8节、第13节、第15节)。Á以色列民族会亡国,并m̄是政治、军事ê问题,却是因为in ê罪(第7节、第13节),而chit-ê罪ê主要内容就是弃sak上帝,去敬拜偶像神明(to̍h是圣经作者一再用ê「行可恶ê事」)。Chit种观念lóng是延续申命记派作者ê观点:对上帝beh绝对忠心(参考申命记六:5)。

重新查询 专卷研经 以斯拉记系列
错误回报,请联系comm[@]fhl.net